Հա

Ազգային

08/02/2021 - 11:55

Ե՞րբ պիտի գայ արդար ցասումը

Ընկերային ցանցերու վրայ կը կարդամ դպրոցական աշակերտուհիի մը ողբաձայն բողոքը. «Երկու հայրենիք ունիմ, երկուքն ալ` տագնապահար»: Բնականաբար նկատի ունի իր ծննդավայրը ու բնակավայր հայրենիք Լիբանանը եւ Մայր Հայրենիք Հայաստանը:

ՏԻԳՐԱՆ ՃԻՆՊԱՇԵԱՆ

 

Ընկերային ցանցերու վրայ կը կարդամ դպրոցական աշակերտուհիի մը ողբաձայն բողոքը. «Երկու հայրենիք ունիմ, երկուքն ալ` տագնապահար»: Բնականաբար նկատի ունի իր ծննդավայրը ու բնակավայր հայրենիք Լիբանանը եւ Մայր Հայրենիք Հայաստանը:

Լիբանանի մէջ «Քորոնա» ժահրի պատճառով ամբողջական փակումը թէեւ կը մեղմացուի, սակայն լրիւ բնականացման համար պէտք է համբերել երկուքական շաբաթներ տեւող չորս հանգրուաններու ընթացքին, երբ հետզհետէ պիտի արտօնուի կենցաղային եւ աշխատանքային մարզերու գործունէութիւնը:

Միւս կողմէ, կառավարութեան կազմութիւնը կ՛ուշանայ: Նշանակեալ վարչապետը զանազան երկիրներ այցելելով իր պատկերացումին նեցուկներ կը փնտռէ, մինչ հանրապետութեան նախագահը կը շարունակէ իր հակոտնեայ պատկերացումին վրայ անխախտ մնալ: Մեզի կը մնայ հասկնալ կամ տարակուսիլ, թէ՛ մէկուն եւ թէ՛ միւսին կեցուածքներուն արդարացիութեան իմաստը: Առ այժմ, Լիբանանը կառավարութիւն չունի ու լուծման սպասող հարցերու պատկառելի խումբ մը կը սպառնայ երկիրը մխրճել տնտեսական, ընկերային ու առողջապահական անդունդը: Հասկնալը դժուար է, հանդուրժելը` անկարելի, սակայն բացի անգործ սպասումէն տարբեր ընելիք չկայ:

Հայաստանի մէջ կացութիւնը աւելի քաջալերական չէ: Այնտեղ մետալին միւս երեսն է տիրականը. փոփոխութիւնը աներկբայօրէն անխուսափելի է, սակայն կառավարութիւնը կառչած կը մնայ իր պաշտօնավարման: Սպասուած փոփոխութիւնը, պարտութենէն ետք պարտադիր, չի վերաբերիր այս կամ այն կալուածին մէջ կարկտան սրբագրութիւններու, այլ կառավարման համակարգի ամբողջական վերանայման, ոճի փոփոխութեան, նախապատուութիւններու վերասահմանման:

Իշխանութեան կառչած վարչախումբը, իր կառավարումը խանգարող երեւոյթները հակակշռելու համար, կը դիմէ, հապճէպով եւ առանց հանրային քննարկման, կասկածելի օրէնքներու հրապարակման: Դատական իշխանութեան անկախութիւնը ապահովելու պատրուակով, կը ստեղծուի դատաւորներու որոշումները քննող մարմին մը: Դատաւորը այսուհետեւ պէտք է առաջնորդուի ոչ թէ օրէնքով ու խղճի թելադրանքով, այլ քննիչ մարմնի, հասկնալ գործադիր իշխանութեան, ենթադրեալ համամտութեամբ:

Շաբթուան երկրորդ գայթակղիչ նորութիւնը կը վերաբերի տեղեկատուութեան: Սուտերու թագաւոր իշխանութիւնը կ՛ուզէ արգիլել չբացայայտուած աղբիւրներէ ստացուած լուրերու հրապարակումը: Ուրիշ խօսքով, պատերազմի օրերուն նման, տեղեկացնելու իրաւունքը վերապահել միայն իրեն: Մամուլի ազատութեան դէմ այս արշաւանքը կը կատարուի քաղաքական ուժի մը կողմէ, որուն համար հնարովի լրատուութիւնը եւ պարսաւանքը եղած են քաղաքական պայքարի հիմնական զէնքերը:

Այսպէս, մեր «երկու հայրենիքները», Լիբանանը եւ Հայաստանը, կը գտնուին պատասխանատուութեան աններելի չգոյութեամբ յատկանշուող իշխանութիւններու ենթակայութեան տակ: Հաւաքականը, ազգայինը, պետականը մէկդի դրած, պետական այրեր բացառապէս կ՛առաջնորդուին սեփական պատկերացումով, հակազգային վնասակար քաղաքականութիւն կը վարեն եւ երկրին ապագան կը վտանգեն:

Ե՞րբ պիտի ազատուինք իրենց անսխալականութիւնը մտասեւեռումի վերածած այս անպատասխանատու տիպարներէն:

Համբերենք եւ սպասենք տառապող ժողովուրդի արդար ցասումին:

«Ազդակ»

Յարակից լուրեր

  • Պահանջատիրութեան դադար չկայ
    Պահանջատիրութեան դադար չկայ

    Հայոց Ցեղասպանութեան հարիւրամեակին` 2015-ին, եկեղեցին սրբադասեց Մեծ Եղեռնի զոհերը, զանոնք վերածելով խմբովին անանուն նահատակներու: Գաղափարի` հաւատքի ու հայրենիքի համար կամաւորապէս իրենց կեանքը տուած սուրբերու:

  • Ճշմարիտ ժողովրդավարութեան ակնկալութեամբ
    Ճշմարիտ ժողովրդավարութեան ակնկալութեամբ

    Եթէ Հայաստանի Ազգային ժողովը, որ ընտրուած է հինգ տարուան պաշտօնավարման համար ժամկէտէն առաջ լուծուի, բնականաբար տեղի կ՛ունենայ նոր Ազգային ժողովի ընտրութիւն: Ե՞րբ կը լուծուի Ազգային ժողովը: Եթէ, վարչապետի հրաժարականէն ետք, երկու անգամ տասնչորս օրերու ընթացքին չյաջողի նոր վարչապետ մը ընտրել: Իսկ վարչապետի հրաժարականի երկու հնարաւորութիւն կայ. Ազգային ժողովը անվստահութիւն կը յայտնէ կառավարութեան, կամ վարչապետը ինքնակամ կը հրաժարի:

  • Գռեհիկ ժողովրդավարութեան մասին
    Գռեհիկ ժողովրդավարութեան մասին

    Օրերը կ՛անցնին ու ճգնաժամը կը յամենայ:

    Հայաստանի մէջ ու Լիբանանի մէջ: Ո՛չ միայն ճգնաժամի յաղթահարման հանրայայտ ու շատոնց անհրաժեշտ դարձած լուծումները չեն որդեգրուիր, այլ նոր արգելքներ երեւան կու գան: Այդ արգելքներուն նպատակը հանրութեան ուշադրութիւնը դէպի մասնակի խնդիրներ շեղելու կը ծառայէ, մոռցնել տալու համար գլխաւորը, հիմնականը:

  • Շրջանցենք փորձութիւնը
    Շրջանցենք փորձութիւնը

    Լիբանան անդունդի եզրին է: Եզրը գործածուած է լաւատեսութեան նշոյլ մը յուսալու համար: Խորքին մէջ, Լիբանան անդունդի եզրէն սայթաքած ու ինկած է յատակը:

  • Ժողովուրդը պիտի ըսէ իր վճռական խօսքը
    Ժողովուրդը պիտի ըսէ իր վճռական խօսքը

    Թէ՛ Լիբանանի եւ թէ՛ Հայաստանի մէջ կը տիրէ քաղաքական անորոշութեան վտանգաւոր վիճակ:

    Լիբանանի փլուզուած պետական համակարգը վերակառուցման կարիք ունի: Արմատական տարակարծութիւններ ունեցող քաղաքական փտած վերնախաւը ի վիճակի չեղաւ նոյնիսկ ֆրանսական հոգատարութեամբ լուծում մը առաջադրելու, հակառակ տրուած խոստումներուն: 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։