Հա

Ազգային

11/02/2021 - 14:00

ՀՅԴ Հայ Դատի կենտրոնական խորհրդի յայտարարութիւնը` ՀՀ խորհրդարանում արտգործնախարար Ա. Այւազեանի հնչեցրած դիրքորոշման վերաբերեալ

2021 թւականի փետրւարի 10-ին, Ազգային Ժողով-կառավարութիւն հարց ու պատասխանի ժամանակ, ՀՀ արտաքին գործերի նախարարը արել է յայտարարութիւններ, որոնք Հայ Դատի կենտրոնական խորհրդի մօտ լուրջ մտահոգութիւնների տեղիք են տւել։

2021 թւականի փետրւարի 10-ին, Ազգային Ժողով-կառավարութիւն հարց ու պատասխանի ժամանակ, ՀՀ արտաքին գործերի նախարարը արել է յայտարարութիւններ, որոնք Հայ Դատի կենտրոնական խորհրդի մօտ լուրջ մտահոգութիւնների տեղիք են տւել։

Մասնաւորապէս, նախարարը յայտարարել է. «Թուրքիան միջազգային հանրութեան ճնշման ներքոյ հետզհետէ պէտք է վերադառնայ բնականոն գործընթացի, եւ, նախեւառաջ, խօսքը գնում է այն մասին, որ այլեւս պատճառ չկայ Հայաստանի հանդէպ կիրառելու շրջափակում։ Ինչպէս գիտէք շրջափակումը եւ սահմանների փակւելը թուրքական կողմը պայմանաւորում էր Արցախում ստատուս-քւոյի հետ, որը փոխւել է ուժի կիրառման միջոցով, եւ այլեւս Թուրքիան որեւէ պատճառ չունի սահմանը փակ պահելու Հայաստանի ուղղութեամբ։ Այս պահի դրութեամբ որեւէ գործընթաց տեղի չի ունենում, բայց Հայաստանը եւ մեր դիւանագիտութիւնը գործուն ջանքեր են գործադրելու, որ մեր անմիջական շրջապատը դառնայ նպաստաւոր մթնոլորտ Հայաստանի անվտանգութեան ամրապնդման համար։ Կրկնում եմ, որ անվտանգութեան մթնոլորտն իր մէջ պարունակում է շատ տարրեր»։

Խիստ խնդրայարոյց այս յայտարարութիւնից ուղղակիօրէն կարող են բխել հետեւեալ հաստատումները.

1) Հայաստանի Հանրապետութեան կառավարութիւնը պատրաստւում է համակերպւել Արցախի Հանրապետութեան նկատմամբ թուրք-ադրբեջանական տանդեմի կողմից ագրեսիայի կիրառման հետեւանքով ձեւաւորւած ստատուս քւոյի հետ՝ Արցախի տարածքի զգալի մասի բռնազաւթմանը, բնակչութեան տեղահանմանն ու էթնիկ զտումներին։ Այս դէպքում Հայաստանի կառավարութիւնն, ըստ էութեան, հրաժարւում է Արցախի Հանրապետութեան անվտանգութեան երաշխաւորի իր պարտակա-նութիւններից։

2) Հայաստանի կառավարութիւնը փաստօրէն հաւատում է, որ Հայաստան-Թուրքիա միջպետական յարաբերութիւնների ոլորտում ղարաբաղեան հիմնախնդրից բացի, որեւէ այլ կնճռոտ հարց չկա։ Մասնաւորապէս հիմնաւոր կասկած է ձեւաւորւում առ այն, որ Հայաստանի կառավարութիւնը պատրաստւում է մոռացութեան մատնել Հայոց Ցեղասպանութեան միջազգային ճանաչման եւ հատուցման հետապնդման քաղաքականութիւնը, ինչպէս նաեւ Հայաստան-Թուրքիա միջպետական սահմանին առնչւող խնդիրները։

Անհասկանալի է, թէ ինչպէս է ՀՀ կառավարութիւնը պատկերացնում Հայաստան-Թուրքիա յարաբերութիւնների կարգաւորումը, երբ ընդամենն ամիսներ առաջ Թուրքիայի լիակատար եւ անթաքոյց աջակցութեամբ մեր հայրենիքի մի հատւածի նկատմամբ կիրառւել է ագրեսիա՝ զուգորդւած պատերազմական յանցագործութիւններով։ Ընդ որում Հայաստանի կառավարութեան ներկայացուցիչը Թուրքիայի հետ յարաբերութիւնների կարգաւորման հեռանկարի մասին խօսում է այն պարագայում, երբ Հայաստանի սահմանների մօտակայքում իրականացւում են թուրք-ադրբեջանական լայնամասշտաբ զօրավարժութիւններ, որոնք համընկնում են Թուրքիայի եւ Ադրբեջանի բարձրաստիճան պաշտօնեաների՝ Հայաստանի ինքնիշխան տարածքի հանդէպ յաւակնութիւններ արտայայտող յայտարարութիւններին։

Նոյնիսկ Հայաստանի իշխանութիւնների հետ սկզբունքային հակադրութիւնների պայմաններում ՀՅ Դաշնակցութեան Հայ Դատի համաշխարհային ցանցը ոչ միայն քայլ անգամ չնահանջեց Հայաստանի ու Արցախի Հանրապետութիւնների շահերի պաշտպանութեան դիրքերից, այլեւ շարունակում է սերտ փոխգործակցութիւնը տարբեր պետութիւններում գործող դեսպանատների եւ միջազգային կազմակերպութիւններում գործող ՀՀ ներկայացուցչութիւնների հետ։

Նախարարի երէկւայ յայտարարութիւնը, սակայն, սպառնում է գաղափարական լրջագոյն հակասութիւն ստեղծել տասնեակ երկրներում եւ բազմաթիւ կազմակերպութիւններում հանրային դիւանագիտութեան գործիքակազմով Հայաստանի շահերը պաշտպանող Հայ Դատի ցանցի եւ հայրենի պետութեան Արտաքին գործերի նախարարութեան միջեւ։

Խնդիրն այն է, որ Թուրքիան չի հրաժարւել Հայաստանի Հանրապետութեան հետ դիւանագիտական յարաբերութիւններ հաստատելու եւ ՀՀ-ի ցամաքային շրջափակումը հանելու դիմաց երեսուն տարուց ի վեր առաջ քաշած իր միւս նախապայմաններից՝ Հայոց Ցեղասպանութեան միջազգային ճանաչման գործընթացի եւ Հայաստան-Թուրքիա իրաւական սահմանի հարցերում ՀՀ կողմից զիջումների պահանջից։ Թուրքիան պահպանում է Հայաստանի ու հայ ժողովրդի նկատմամբ իր թշնամական վերաբերմունքը, ինչը դրսեւորւեց 2020 թ. սեպտեմբերի 27-ին Ադրբեջանի կողմից սանձազերծւած պատերազմում Թուրքիայի բացայայտ մասնակցութեամբ եւ շարունակւում է Թուրքիայի իշխանութիւնների կողմից Թուրքիայի ներսում եւ այդ երկրից դուրս կիրառւող հակահայ քայլերով։ Մինչեւ Թուրքիան հիմնովին չփոխի իր հակահայ քաղաքականութիւնը, վերջինիս հետ ՀՀ-ի կողմից երկխօսութեան ցանկացած փորձ Թուրքիայի կողմից օգտագործւելու է իր վերոնշեալ նպատակների իրականացման համար։ Յատկապէս Հայոց Ցեղասպանութեան տարելիցի նախօրէին՝ Թուրքիայի համար այն կը լինի շահարկման ընձեռւած հնարաւորութիւն։

Մեզ համար ՀՀ քաղաքական իշխանութեան յանցաւոր անպատրաստութիւնը եւ Հայաստանի կենսական շահերը սպասարկելու անկարողութիւնը այլեւս վաղուց նորութիւն չեն։ Ակնկալում ենք, սակայն, որ ՀՀ պետական համակարգի դեռեւս ամբողջովին չքանդւած ինստիտուտներից մէկը՝ ՀՀ արտաքին գործերի նախարարութիւնը կը ցուցաբերի զգօնութիւն չտրւելու համար Թուրքիայի նենգամիտ քաղաքականութեանը։ Հայաստանի, ներառեալ Արցախի, անվտանգութեան ամրապնդման առաջին նախապայմանը Հայաստանի ներսում իրավիճակի հիմնական փոփոխութիւնն է, ինչը միայն կարող է սկսւել երկիրը պարտութեան առաջնորդած եւ ՀՀ վարչապետի պաշտօնից կառչած անձնաւորութեան հեռացումով։ Միայն այդ ժամանակ կարելի է մտածել, խօսել, ծրագրել եւ գործել այնպէս, որպէսզի. «մեր անմիջական շրջապատը դառնայ նպաստաւոր մթնոլորտ Հայաստանի անվտանգութեան ամրապնդման համար»։

 

ՀՅԴ Հայ Դատի Կենտրոնական խորհուրդ

11.02.2021 թ.

Յարակից լուրեր

  • Յայտարարութիւն ՀՅԴ Արեւմտեան Ամերիկայի Կեդրոնական կոմիտէի
    Յայտարարութիւն ՀՅԴ Արեւմտեան Ամերիկայի Կեդրոնական կոմիտէի

    Տեղեակ ենք, որ Սփիւռքի գործերու գրասենեակի յանձնակատար Զարեհ Սինանեան Լոս Անճելըս պիտի այցելէ մայիս 2-10։

    Իւրաքանչիւր օր, որ պրն. Սինանեան չի դատապարտեր Նիկոլ Փաշինեանը, անոր նախապատերազմեան, պատերազմի օրերու եւ յետպատերազմեան աւերին համար, կը նշանակէ, որ ինք մեղսակից է այն դաւաճանութեան, որուն կ՚ենթարկուի մեր հայրենիքը եւ ժողովուրդը։

  • ՀՅԴ Բիւրոյի յայտարարութիւնը
    ՀՅԴ Բիւրոյի յայտարարութիւնը

    Վերջին օրերին Հայաստանում նոր թափ են ստացել իրաւապահ մարմինների ապօրինութիւնները։ Արժանապատիւ քաղաքացիների բողոքի ձայնը փորձ է արւում լռեցնել ոստիկանական բիրտ ուժի կիրառմամբ, ձերբակալութիւններով եւ շինծու քրէական գործեր յարուցելով։

  • Յայտարարութիւն ՀՅԴ Արեւմտեան Եւրոպայի Կեդրոնական կոմիտէի
    Յայտարարութիւն ՀՅԴ Արեւմտեան Եւրոպայի Կեդրոնական կոմիտէի

    Հայ Յեղափոխական Դաշնակցութեան Արեւմտեան Եւրոպայի (Ֆրանսա, Հոլանտա, Պելճիքա) շարքերուն անունով խստիւ կը դատապարտենք Հայաստանի իրաւապահ մարմիններու ընթացքը, որուն դէմ ժողովրդային բողոքի արդար ելոյթներ տեղի ունեցան երէկ Երեւանի մէջ: Մարզերու եւ Երեւանի դաշնակցական ընկերներ՝ պատասխանատու, գործիչ թէ շարքային պարզ անդամ «կը հրաւիրուին» քննչական կոմիտէ, տարբեր պատրուակներով, որ սակայն ունի մէկ հասարակ յայտարար՝ քաղաքական հետապնդում:

  • ՀՅԴ Հայաստանի ԳՄ յայտարարութիւնը
    ՀՅԴ Հայաստանի ԳՄ յայտարարութիւնը

    Իրաւապահ մարմինների յանցաւոր վարքագիծը ստիպում է արժանապատիւ քաղաքացիներին՝ սեփական ուժերով պաշտպանել իրենց իրաւունքները: Ոստիկանութիւնը վերածւել է իշխանութեան եւ յատկապէս վարչապետի աթոռին կառչած անձի քաղաքական պատւէրն ու ապօրինի հրահանգներն իրականացնող ռեպրեսիւ գործիքի:

  • ՀՅԴ Հիւսիսային Իրանի Կենտրոնական Կոմիտէի յայտարարութիւնը
    ՀՅԴ Հիւսիսային Իրանի Կենտրոնական Կոմիտէի յայտարարութիւնը

    2021 թւականի Ապրիլի 24-ը դարձաւ պատմական օր Հայոց Ցեղասպանութեան ճանաչման գործընթացում: ԱՄՆ նախագահ Ջոզէֆ Բայդէնը իր յայտարարութեան մէջ պաշտօնապէս հաստատեց Հայոց Ցեղասպանութեան իրողութիւնը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։