Հա

Ազգային

20/02/2021 - 12:52

Հայանալու եւ հայրենանալու հանրահաւաքը

Կ՚ուզէ՞ք գիտնալ մեր հաւաքական դիմադրականութեան գաղտնիքը։ Կ՚ուզէ՞ք իմանալ մեր վերընձիւղուելու խորհուրդը։

ՍԵԴՕ ՊՈՅԱՃԵԱՆ

 

Կ՚ուզէ՞ք գիտնալ մեր հաւաքական դիմադրականութեան գաղտնիքը։ Կ՚ուզէ՞ք իմանալ մեր վերընձիւղուելու խորհուրդը։

Նայեցէք մեր պատմութեան փորձառութեան։

Ծանրագոյն գրոհներու ենթարկուած ենք։ Մահացու հարուածներու զոհը դարձած ենք։ Բնաջնջումի գողգոթաներէն անցած ենք։ Հայրենի հողեր կորսնցուցած ենք։ Մեր պատմական հայրենիքի երեք հարիւր հազար քառակուսի քիլոմեթր հսկայ տարածքէն մեզի մնացած է տասը տոկոսը միայն։ Եղած են ժամանակաշրջաններ, երբ նոյնիսկ Հայաստան անունը անյայտացած է։

Բայց վերականգնած ենք։ Մեր համրանքի կէսէն աւելիին կոտորումէն ետք, կրկին ու կրկին վերընձիւղած ենք, վերածնած ենք։ Քալած ենք առաջ։ Կրկին կառուցած ենք, կրկին ստեղծագործած ենք։ Վերակառուցած ենք մեր պետական անօթը։ Ազատագրած ենք նորէն, ինչ որ կրնանք, հայրենի հողեր։

Եղած են փորձեր խորթացնելու մեր ազգային արժէքները, խաթարելու մեր հաւաքական գիտակցութիւնը, սպիացնելու մեր պատմութեան յիշողութիւնը, շեղելու մեր հայրենական նպատակները։

Բայց դիմադրած ենք այդ փորձերուն մեր հայեցի նկարագրի կայուն յատկութիւններով, մեր մշակոյթի զրահներով, մանաւա՛նդ պայքարողի մեր հնամեայ բայց մշտանորոգ մարտունակութեամբ։

Այդպէս ենք եղած եւ այդպէս ենք, որովհետեւ կը մնանք հաւատարիմ ու յանձնառու տեւաբար հայանալու մեր ազգային առաքելութեան։

Այսօր, դարձեալ կը գտնուինք դէմ յանդիման՝ երեք տարիներէ ի վեր մեզ հաւաքականօրէն խորթացնելու փորձերուն։ Փորձառութիւն մը, որ կը միտի ջնջել մեր պատմական յիշողութիւնը, ապազգայնացնել մեր մշակոյթը, եւ ապականել մեր ընկերութիւնը։ Փորձառութիւն մը, որ տնտեսապէս քանդեց մեր ժողովուրդը եւ մեր ազատագրուած հայրենիքի եօթանասուն եւ հինգ տոկոսը յանձնեց թշնամիին։ Թշնամիին կողմէ կրկին բնաջնջուելու սպառնալիքը հիմա կը թակէ մեր հայրենիքի դռները։

Հիմա նորէն հայանալու պահն է՝ վերակերտելու եւ վերակերտուելու համար։

Հայանալու երթը կը սկսի այսօր Երեւանի Ազատութեան հրապարակէն՝ ժողովրդային հանրահաւաքով, տարածուելու համար հայրենիքի ամենէն հեռաւոր աւաններն ու գիւղերը։

Այս հանրահաւաքը մեր հայացման մեկնակէտն է։

Աւելին, այս հանրահաւաքը մեր վերստին հայրենացման պայքարն է։

Հայրենի ժողովուրդը առանձին չէ հայացման եւ հայրենացման կռիւին մէջ։ Հայրենիքի հետ եւ հայրենի ժողովուրդին մէջքին կանգնած է ամբողջ Սփիւռքահայութիւնը՝ հոգիով, ոգիով, մտքով, կամքով եւ բոլորանուէր ուժերով։

Հայրենիքի հայացումով եւ հայրենացումով աւելի կը հայանայ ու կը հայրենանայ նաեւ Սփիւռքը։

 

Փետրուար 20, 2021

Լոս Անճելըս

Յարակից լուրեր

  • Խաժակին՝ հին զինուորը չի մահանար, ան պարզապէս կ՚ անյայտանայ
    Խաժակին՝ հին զինուորը չի մահանար, ան պարզապէս կ՚ անյայտանայ

    Թանկագին Խաժակ,

    Կը հեռանաս հին զինուորի նման։ Մեր ճանապարհը, ուրկէ քալեցինք միասին, կը մնայ անշեղ։ Երկար է այդ ճանապարհը, այնքան դժուար նոյնքան քաղցր։ Համոզուած էինք, որ այդ ճամբուն վրայ անմահը գաղափարն է, մնայունը պայքարն է։ 

  • Նիկոլ Փաշինեանը ոչ վարչապետ է, ոչ էլ վարչապետի պաշտօնակատար
    Նիկոլ Փաշինեանը ոչ վարչապետ է, ոչ էլ վարչապետի պաշտօնակատար

    Հիմք ունենալով ՀՀ Սահմանադրութեան եւ «Կառավարութեան կառուցուածքի եւ գործունէութեան մասին» Օրէնքի տրամադրութիւնները, Նիկոլ Փաշինեան դադրեցաւ Հայաստանի վարչապետի պաշտօնէն Ապրիլ 25-ին, երբ ան ներկայացուց իր հրաժարականը։ Ներկայիս ան պաշտօնանկի կարգավիճակ ունի եւ, ըստ օրէնքի, իրաւունք չունի շարունակելու պաշտօնավարել իբրեւ վարչապետ։ Ներկայիս իր հանգամանքը պարզ քաղաքացիի հանգամանք է։

  • Թող այս ապրիլ 24-ը վերածուի իշխանափոխութեան
    Թող այս ապրիլ 24-ը վերածուի իշխանափոխութեան

    Մեծ Եղեռնի յիշատակման օրը կը մօտենայ։ Ժողովուրդը հաւատարմօրէն պիտի կատարէ իր պարտականութիւնը, պիտի մատուցէ իր յարգանքը, պիտի վերանորոգէ պահանջատիրական պայքարը շարունակելու իր ուխտը։ 

  • Հայութեան ապաւէնը Լիբանանէն մինչեւ Հայաստան
    Հայութեան ապաւէնը Լիբանանէն մինչեւ Հայաստան

    Այսօր, 46 տարի առաջ՝ Ապրիլ 13, 1975-ին, բռնկեցաւ Լիբանանի քաղաքացիական կռիւը։ Լիբանահայութիւնը պատրաստ չէր այս եղբայրասպան կռիւին, բայց պատրաստ ու վճռակամ էր պաշտպանելու բոլոր Լիբանահայերուն՝ Պէյրութէն Պուրճ Համուտ, Այնճար եւ Լիբանանի ամենէն հեռաւոր անկիւնները, ուր կը բնակէին համախումբ հայեր։

  • Դիմակաւորները
    Դիմակաւորները

    Ականատես կ՚ըլլանք հայութեան դէմ անխնայ գրոհի մը։ Գրոհը թիրախ ունի թէ՛ հայրենի ժողովուրդը եւ թէ Սփիւռքի գաղթօճախները։ Անոր անմիջական նպատակն է պառակտել եւ թուլացնել մեր հաւաքական դիմադրականութիւնը։ Խորտակելով մեր դիմադրականութիւնը, ան կը ձգտի նսեմացնել մեր ազգային առաքելութիւնը, հակակշռել մեր քաղաքական օրակարգը եւ անղեկ հաւաքականութեան վերածել հայութիւնը՝ հայրենիքէն ներս թէ դուրս։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։