Հա

Ազգային

20/02/2021 - 12:55

Բաժակը յորդա՛ծ է այլեւս

Աշխարհասփիւռ հայութեան ակնարկները այսօր անգամ մը եւս պիտի ուղղուին Երեւան, ուր Օփերայի «Ազատութեան» հրապարակին վրայ տեղի պիտի ունենայ «Հայրենիքի Փրկութեան Շարժումին» ժողովրդային հանրահաւաքը՝ «Փրկենք մեր հայրենիքը» նշանախօսքով։

ՎԻԳԷՆ ԱՒԱԳԵԱՆ

 

Աշխարհասփիւռ հայութեան ակնարկները այսօր անգամ մը եւս պիտի ուղղուին Երեւան, ուր Օփերայի «Ազատութեան» հրապարակին վրայ տեղի պիտի ունենայ «Հայրենիքի Փրկութեան Շարժումին» ժողովրդային հանրահաւաքը՝ «Փրկենք մեր հայրենիքը» նշանախօսքով։

Պատահական չէ հանրահաւաքին համար ճշդուած թուականն ու վայրը։ 33 տարի առաջ, այսօրուան պէս, 20 Փետրուար 1988-ին, «Ազատութեան» հրապարակն ու շրջակայքը յորդեցան Արցախի մայր Հայաստանին միացումը պահանջող մէկ միլիոննոց ցոյցով։

33 տարի առաջ, այսօր, մեր ժողովուրդը մէ՛կ մարդու նման իր ողնայարը շտկեց եւ ո՛չ ըսաւ անարդարութեան, ստրկութեան եւ համակերպումին։

Արցախեան պայքարի սքանչելի շարժումով ծայր տուաւ Հայաստանի վերանկախացման երթը, որ իր պատմական ու յաղթական պսակումին արժանացաւ 21 Սեպտեմբեր 1991-ին։ Այնուհետեւ, իւրաքանչիւր տարուան 20 Փետրուարը դարձաւ Արցախեան գոյապայքարի եւ մեր պետականութեան վերականգնումի յիշատակութեան օր, ուխտի եւ յանձնառութեան օր՝ Արցախն ու Հայաստանը աւելի հզօր, աւելի ամուր եւ աւելի բարգաւաճ տեսնելու, իսկ բախտաւոր օր մը երկուքը իրարու միացած տեսնելու, իբրեւ կորիզ, վէմ ու հիմնաքար՝ ամբողջական հայութեամբ կերտուելիք ամբողջական Հայաստանին։

Դժբախտաբար, Արցախեան վերջին պատերազմը շատ բան շրջեց մեր իրականութեան մէջ։ Հայութիւնը կորսնցուց հող ու սահման, 33 տարիներու պայքարի արդիւնքով ձեռք ձգուած հայրենիք, տարածքնե՛ր, այդ տարածքներու վրայ հսկայական զոհողութիւններու գնով կատարուած ներդրումներ, սերունդներու արիւն-քրտինքով արձանագրուած նուաճումներ՝ բանակ, տնտեսութիւն, պետական կառոյցներ եւ ամէնէն կարեւորը՝ ազգային գերիշխանութիւն, արժանապատուութիւն եւ ապահովութիւն։

9 Նոյեմբերի խայտառակ յայտարարութեամբ եւ անոր հետեւած 11 Յունուարի համաձայնութեամբ Արցախի հարցը վերադարձաւ իր նախքան 1988-ի կարգավիճակին, մինչ Հայաստանը յայտնուեցաւ կատարեալ անձնատուութեան եւ նուաստացումի մէջ, իր ժողովուրդէն վարկաբեկուած եւ իր թշնամիներէն պարտուած իշխանութեամբ։

Հետեւաբար, «Փրկենք մեր հայրենիքը» նշանախօսքով այսօրուան հանրահաւաքը կու գայ ժողովրդային լուրջ ազդարարութիւն տալու իշխանութեան ղեկին գտնուող «Իմ քայլ»ական պատասխանատուներուն, թէ՝ ժամանակը եկած է վերադառնալու Փետրուար 1988-ի ազատութեան եւ գերիշխանութեան գաղափարական ակունքներուն, անգամ մը եւս պատմութեան անիւը շրջելու համար ի նպաստ հայութեան եւ անոր վախճանական նպատակներուն իրականացման խնդիր։

Այսօր, «Ազատութեան» հրապարակին վրայ հաւաքուող մեր ժողովուրդը պատմական պարտականութիւնը ունի 9 Նոյեմբերէն ի վեր սգաւոր մեր Եռագոյնը իր երբեմնի հպարտութեամբ ծածանելու կառավարութեան շէնքին վրայ։

Այսօր, մեր ժողովուրդը իրաւունքն ու պարտաւորութիւնը ունի հաշի՛ւ պահանջելու 2.5 տարի զինք խաբած իշխանութիւններէն, որոնք «Արցախը Հայաստան է եւ վե՛րջ» յայտարարեցին, բայց Հայաստան հռչակուած հայրենիքի այդ կտորը չկարողացան պահել ո՛չ պատերազմով եւ ո՛չ ալ խաղաղութեամբ։ Անոնք կորսնցուցին պատերազմը եւ տեղի տուին բանակցութիւնները։

Մեր ժողովուրդը հաշիւ ունի նաեւ պահանջելիք պատերազմի դաշտին վրայ ինկած 5000 նահատակներուն, անյայտ կորսուածներուն, գերիներուն, դիակները չգտնուած զոհերուն եւ տակաւին հազարաւոր հաշմանդամներու եւ վիրաւորներու համար, որոնք չափազանց սուղ գին վճարեցին իշխանութիւններու կազմակերպուած անկազմակերպութեան, դիտաւորեալ պարտութեան, խեղճացման եւ խայտառակ յայտարարութեան ստորագրութեան համար։

Վերջապէս, մեր ժողովուրդը հաշիւ ունի պահանջելիք GPS-ով հայրենիքի սահմաններ ճշդող, գիւղ, արօտավայր եւ մայրուղի թշնամիին յանձնող իշխանութիւններէն, որոնք երբեք հարց չեն տեսներ այս բոլորին մէջ եւ ստեղծուած փակուղիէն դուրս գալու համար յամառօրէն կը մերժեն ընդառաջել սահմանադրական միջոցներով անցնցում հեռացման բոլոր կոչերուն՝ ինքնակամ հրաժարականէն մինչեւ Ազգային Ժողովի արտահերթ ընտրութիւններ։

Համբերութեան բաժակը սակայն յորդա՛ծ է այլեւս եւ հաշուետուութեան ժամը հնչած է, որպէսզի կարելի ըլլայ կասեցնել մեր հայրենիքի անկումային վիճակը եւ այսօրուան ու վաղուան սերունդներուն ներշնչել լաւ օրերու վերադարձի յոյսն ու հաւատքը։

Յարակից լուրեր

  • Մեր երիտասարդութեան հետ դէմ յանդիման
    Մեր երիտասարդութեան հետ դէմ յանդիման

    Երիտասարդութիւնը նորութիւն եւ արդիականութիւն կը փնտռէ իր շուրջ։ Հետամուտ է լայն հորիզոններու։ Այսօրուան երիտասարդութիւնը չի փափաքիր կառուցային-կանոնագրային կաղապարներու ենթարկուիլ։ Ան կը նախընտրէ միութենական աշխատանքներու մասնակցիլ, բայց միութեան մը չանդամակցիլ։ Կը նախընտրէ մնալ համակիր՝ քան յանձնառութիւն եւ պատասխանատուութիւն ստանձնել։ Կը նախընտրէ գործել որոշ նպատակի մը համար, բայց ոչ՝ միութենական պարտաւորութիւններու շարքի մը համար։

  • Վերյիշելով Համազգայինի Հայագիտական բարձրագոյն հիմնարկը
    Վերյիշելով Համազգայինի Հայագիտական բարձրագոյն հիմնարկը

    Կարօ Արմէնեանի «Փնտռելով հետքերը մեր իրազեկութեան» դիմատետրեան գրառումը, յատկապէս 1950-ական տարիներու Հայագիտական հիմնարկի գործունէութեան իր բաժինով, մեր մէջ արթնցուց Համազգայինի Հայագիտական Բարձրագոյն Հիմնարկին կապուած բազմաթիւ յուշեր եւ մտորումներ։ Հիմնարկը, որուն աշակերտելու բախտն ու պատիւը ունեցած ենք 1986-1990, շատ բան տուաւ մեր իրականութեան։ Այդ շատին կ’անդրադառնան երախտագիտութեան եւ յարգանքի ստորեւ տրուած տողերը։ 

  • Ողջմիտ որոշումը
    Ողջմիտ որոշումը

    Սովորաբար, ամէն տարի, 27-28 Փետրուարին, հայութիւնը կը նշէր Սումկայիթի հայութեան ջարդը, աշխարհին ներկայացնելով 1988-ի Արցախեան շարժումին իբրեւ հակադարձութիւն, Պաքուի հայատեաց իշխանութիւններուն Սումկայիթի եղեռնագործութիւնը, որուն զոհ գացին 1500 հայորդիներ եւ գաղթական դարձան 18 հազար ուրիշներ։

  • Խօսքը դարձեա՛լ ժողովուրդին է
    Խօսքը դարձեա՛լ ժողովուրդին է

    «Հայրենիքի փրկութեան կոմիտէ»-էն մինչեւ «Հայրենիքի փրկութեան շարժում» ուղիղ 100 տարուան պատմութիւն մը կայ։

    18 Փետրուարը խորհրդանիշն է այդ պատմութեան։ Խորհրդանիշն է իրաւազրկումի եւ անարդարութեան դէմ հայ մարդու արդար ծառացումին, հայրենիքի մէջ ստեղծուած անհանդուրժելի կացութեան դէմ համաժողովրդային մերժումին եւ պոռթկումին։

  • Յայտնաբերուել է…
    Յայտնաբերուել է…

    Նահատակուած եւ դիակները չգտնուած զինուորներու պարագան Արցախեան 44-օրեայ պատերազմի բաց վէրքերէն մէկն է։

    Հայ մարդը մղկտացող ցաւով մը կը հետեւի փրկարարական ջոկատներու որոնողական աշխատանքներով օրական յայտնաբերուող նոր դիակներուն։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։