Հա

Ազգային

22/02/2021 - 13:35

Առարկայական Ու Ենթակայական Ազդակներու Փոխազդեցութիւնը

Աւելի քան երեք ամիսէ ի վեր, տարակուսանքի ենթակայ է, թէ ինչո՞ւ կը յամենայ Նիկոլ Փաշինեանի իշխանութիւնը: Դեկտեմբեր 2018-ի խորհրդարանական ընտրութիւններուն Նիկոլ Փաշինեան փայլուն յաղթանակ արձանագրեց եւ տիրացաւ աննախընթաց բացարձակ մեծամասնութեան: Այդ մեծամասնութիւնը իրեն հնարաւորութիւն կու տար միանձնեայ որոշումներ կայացնել, շրջանցելով կարեւոր որոշումները, յատկապէս նշանակումները ընդդիմութեան հետ համադրելու սահմանադրական պահանջները: Նիկոլ Փաշինեան աներեր օգտուեցաւ այդ հնարաւորութենէն: Կառավարութեան կազմութենէն եւ առաջին օրինակարգումներէն հազիւ քանի մը ամիս անցած, Փաշինեանի ի նպաստ քուէարկած շատ մը քաղաքացիներ յուսախաբ դարձած էին, սակայն կը մտածէին, որ պէտք է յարգել ժողովրդային քուէով ստեղծուած դրութիւնը եւ համբերութեամբ սպասել, որ նախընտրական խոստումները իրականանան:

ՏԻԳՐԱՆ ՃԻՆՊԱՇԵԱՆ

Աւելի քան երեք ամիսէ ի վեր, տարակուսանքի ենթակայ է, թէ ինչո՞ւ կը յամենայ Նիկոլ Փաշինեանի իշխանութիւնը: Դեկտեմբեր 2018-ի խորհրդարանական ընտրութիւններուն Նիկոլ Փաշինեան փայլուն յաղթանակ արձանագրեց եւ տիրացաւ աննախընթաց բացարձակ մեծամասնութեան: Այդ մեծամասնութիւնը իրեն հնարաւորութիւն կու տար միանձնեայ որոշումներ կայացնել, շրջանցելով կարեւոր որոշումները, յատկապէս նշանակումները ընդդիմութեան հետ համադրելու սահմանադրական պահանջները: Նիկոլ Փաշինեան աներեր օգտուեցաւ այդ հնարաւորութենէն: Կառավարութեան կազմութենէն եւ առաջին օրինակարգումներէն հազիւ քանի մը ամիս անցած, Փաշինեանի ի նպաստ քուէարկած շատ մը քաղաքացիներ յուսախաբ դարձած էին, սակայն կը մտածէին, որ պէտք է յարգել ժողովրդային քուէով ստեղծուած դրութիւնը եւ համբերութեամբ սպասել, որ նախընտրական խոստումները իրականանան:

Այդ խոստումները ոչ միայն չիրականացան, այլ հետզհետէ անհասանելի երազներու վերածուեցան: Չկատարուած խոստումներուն դառն պսակը հանդիսացաւ 44-օրեայ պատերազմը, պարտութիւնն ու անձնատուական յայտարարութիւնը: Պատերազմը դադրեցնելու համար կատարուած զիջումներուն վրայ եկան աւելնալու յետպատերազմեան խուսանաւումները, նահանջները, անպատասխանատու յայտարարութիւնները եւ արարքները: Սխալներու շարքը երկարեցաւ ու տակաւին կը շարունակուի:

Բոլոր պայմանները առկայ են, որպէսզի ժողովուրդը պահանջէ կառավարութեան հրաժարականը: Իրերու դրութիւնը գրեթէ երեք տարիներէ ի վեր կը վատթարանայ, փոփոխութիւնը անհրաժեշտ դարձնող առարկայական ազդակները ակներեւ են, տեսանելի ու զգալի բոլորին կողմէ, սակայն փոփոխութեան պահանջը ժողովրդային լայն զանգուածներու կողմէ չ՛որդեգրուիր:

Փոփոխութեան պահանջը չ՛որդեգրուիր, թէ՞ չէր որդեգրուեր: Ժողովրդային պահանջին համայնացումը կարելի չէր, որովհետեւ պարտութեան յաջորդած հասկնալի տեղատուութեան պայմաններուն մէջ, մտքերու հոլովոյթը իր հասունացման ուղին չէր գտած: Առարկայական ժխտական պայմաններուն ենթակայ, պարտութեան ու կորուստի հոգեբանական անկումէն շշմած բազմութիւնները փնտռտուքի մէջ էին, անկարող կողմնորոշուելու: Ժամանակ պէտք էր մտքերը պարզելու, դէպքերը սթափ վերլուծելու համար: Ենթակայական ազդակները եւս պէտք է պարզուէին, իրենց բնական հոլովոյթը ապրէին, որպէսզի ժողովուրդը ի վերջոյ սթափուէր ու մերժէր ինչ որ ժամանակ առաջ բնական կը համարէր:

20 փետրուարի հաւաքը ցոյց տուաւ, որ առարկայական ու ենթակայական ազդակներու փոխազդեցութիւնը վերջապէս ընթացք առած է: Վատը հանդուրժելու վիճակէն դուրս գալով, բանականութեան գերակայութեան դրսեւորման փաստը ցուցադրեց բազմահազարանոց բազմութիւնը: Ստեղծուած առարկայական վատթար պայմաններուն ենթագիտակցական մղումով մերժումը պիտի առաջնորդէ ցանկալի փոփոխութեան:

Առարկայական ու ենթակայական ազդակներու փոխազդեցութիւնն ու համադրումը պիտի առաջնորդեն, անտարակոյս, համաժողովրդական պոռթկումի, որուն նախանշանները տեսանելի դարձան փետրուարի ժողովրդային հաւաքին:

 

aztagdaily.com

 

Յարակից լուրեր

  • Պահանջատիրութեան դադար չկայ
    Պահանջատիրութեան դադար չկայ

    Հայոց Ցեղասպանութեան հարիւրամեակին` 2015-ին, եկեղեցին սրբադասեց Մեծ Եղեռնի զոհերը, զանոնք վերածելով խմբովին անանուն նահատակներու: Գաղափարի` հաւատքի ու հայրենիքի համար կամաւորապէս իրենց կեանքը տուած սուրբերու:

  • Ճշմարիտ ժողովրդավարութեան ակնկալութեամբ
    Ճշմարիտ ժողովրդավարութեան ակնկալութեամբ

    Եթէ Հայաստանի Ազգային ժողովը, որ ընտրուած է հինգ տարուան պաշտօնավարման համար ժամկէտէն առաջ լուծուի, բնականաբար տեղի կ՛ունենայ նոր Ազգային ժողովի ընտրութիւն: Ե՞րբ կը լուծուի Ազգային ժողովը: Եթէ, վարչապետի հրաժարականէն ետք, երկու անգամ տասնչորս օրերու ընթացքին չյաջողի նոր վարչապետ մը ընտրել: Իսկ վարչապետի հրաժարականի երկու հնարաւորութիւն կայ. Ազգային ժողովը անվստահութիւն կը յայտնէ կառավարութեան, կամ վարչապետը ինքնակամ կը հրաժարի:

  • Գռեհիկ ժողովրդավարութեան մասին
    Գռեհիկ ժողովրդավարութեան մասին

    Օրերը կ՛անցնին ու ճգնաժամը կը յամենայ:

    Հայաստանի մէջ ու Լիբանանի մէջ: Ո՛չ միայն ճգնաժամի յաղթահարման հանրայայտ ու շատոնց անհրաժեշտ դարձած լուծումները չեն որդեգրուիր, այլ նոր արգելքներ երեւան կու գան: Այդ արգելքներուն նպատակը հանրութեան ուշադրութիւնը դէպի մասնակի խնդիրներ շեղելու կը ծառայէ, մոռցնել տալու համար գլխաւորը, հիմնականը:

  • Շրջանցենք փորձութիւնը
    Շրջանցենք փորձութիւնը

    Լիբանան անդունդի եզրին է: Եզրը գործածուած է լաւատեսութեան նշոյլ մը յուսալու համար: Խորքին մէջ, Լիբանան անդունդի եզրէն սայթաքած ու ինկած է յատակը:

  • Ժողովուրդը պիտի ըսէ իր վճռական խօսքը
    Ժողովուրդը պիտի ըսէ իր վճռական խօսքը

    Թէ՛ Լիբանանի եւ թէ՛ Հայաստանի մէջ կը տիրէ քաղաքական անորոշութեան վտանգաւոր վիճակ:

    Լիբանանի փլուզուած պետական համակարգը վերակառուցման կարիք ունի: Արմատական տարակարծութիւններ ունեցող քաղաքական փտած վերնախաւը ի վիճակի չեղաւ նոյնիսկ ֆրանսական հոգատարութեամբ լուծում մը առաջադրելու, հակառակ տրուած խոստումներուն: 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։