Հա

Ազգային

02/03/2021 - 13:35

Ժողովուրդը պիտի ըսէ իր վճռական խօսքը

Թէ՛ Լիբանանի եւ թէ՛ Հայաստանի մէջ կը տիրէ քաղաքական անորոշութեան վտանգաւոր վիճակ:

Լիբանանի փլուզուած պետական համակարգը վերակառուցման կարիք ունի: Արմատական տարակարծութիւններ ունեցող քաղաքական փտած վերնախաւը ի վիճակի չեղաւ նոյնիսկ ֆրանսական հոգատարութեամբ լուծում մը առաջադրելու, հակառակ տրուած խոստումներուն: 

ՏԻԳՐԱՆ ՃԻՆՊԱՇԵԱՆ

 

Թէ՛ Լիբանանի եւ թէ՛ Հայաստանի մէջ կը տիրէ քաղաքական անորոշութեան վտանգաւոր վիճակ:

Լիբանանի փլուզուած պետական համակարգը վերակառուցման կարիք ունի: Արմատական տարակարծութիւններ ունեցող քաղաքական փտած վերնախաւը ի վիճակի չեղաւ նոյնիսկ ֆրանսական հոգատարութեամբ լուծում մը առաջադրելու, հակառակ տրուած խոստումներուն: Մարոնի պատրիարքը կ՛առաջարկէ միջազգային ընտանիքին դիմել ներլիբանանեան խնդիրներուն լուծում գտնելու համար: Անգամ մը եւս Լիբանան կը պատրաստուի անկազմակերպ բազմախոհութիւնը կազմակերպուած բազմակարծութեամբ փոխարինելու, օտարներու միջամտութեամբ: Այսինքն, անկախութենէն զիջելու եւ ուրիշներու շահերուն համապատասխան քաղաքականութիւն վարելու: Շրջանի երկիրներու տագնապներու ու հակամարտութիւններուն նկատմամբ չէզոքութիւն որդեգրելու անունին տակ նոր կախուածութիւն յառաջացնելու:

Այսքանը Լիբանանի մասին, քանի որ Հայաստանի մէջ դէպքերը գահավէճ ընթացք առած են:

Վարչապետ Նիկոլ Փաշինեան ճակատագրական սխալ մը գործեց-մէկը սխալներու երկար շարքին- երբ վիրաւոր ու դժգոհ բանակին բախեցաւ: Արդա՞ր է անդադար բանակը խծբծել, սեփական սխալները պարտկելու համար: Սպայակոյտի պետի առաջին տեղակալին պաշտօնազրկումը մղեց բանակի հրամանատարութիւնը յայտարարելու, որ կառավարութիւնը անկարող է երկրին դիմագրաւած հարցերուն լուծում գտնելու, եւ պահանջեց վարչապետին եւ կառավարութեան հրաժարականը:

Հրաժարականի պահանջը մեկնաբանուեցաւ իբրեւ պետական զինուորական հարուածի փորձ, մինչ եղածը լոկ յայտարարութիւն մըն էր: Յաջորդեց սպայակոյտի պետին պաշտօնազրկման առաջարկը, զոր հանրապետութեան նախագահը մերժեց ստորագրել: Ի վերջոյ, գնդակը պիտի գլտորուի դէպի Սահմանադրական դատարան, որ տասնօրեայ ժամկէտով պէտք է վճռէ որոշումին համապատասխանութիւնը Սահմանադրութեան:

Դէպքերու այս անմեղ պատումը կրնար սովորական դարձած դէպքերու շղթային մէկ օղակը համարուիլ, եթէ Նիկոլ Փաշինեան չդիմէր իր փայփայած գործելաձեւին ու ժողովուրդը չհրաւիրէր հաւաքի ու քայլարշաւի: Բանակի սպայակազմին նախաձեռնութիւնը հակասահմանադրական համարող վարչապետը իր համակիրներուն միջոցով ճնշում կը բանեցնէ հանրապետութեան նախագահին ու… Սահմանադրական դատարանին վրայ: Ամբոխավարական ժողովրդավարութիւնը ընդդէմ օրինական ժողովրդավարութեան:

Հայաստանը խորհրդարանական ղեկավարմամբ կառավարուող երկիր է: Ո՞ւր է Ազգային ժողովը, որուն Իմ քայլական մեծամասնութիւնը չի ներկայանար ընդդիմութեան նախաձեռնած արտակարգ նիստին: Խորհրդարանական կառավարումը փոխարինուած է «ժողովրդական» կառավարմամբ: Ժողովուրդը, ըստ Փաշինեանի ընտրութեամբ իրեն պատուիրակած է իշխանական լիազօրութիւնը. ուրեմն, Փաշինեանը ցնոր տնօրինութիւն ժողովուրդը կը ներկայացնէ: Սահմանադրութիւնը կ՛ըսէ, որ իշխանութիւնը կը պատկանի ժողովուրդին, ժողովուրդն ալ զայն վստահած է վարչապետին: Այլեւս ինչ կարիք կայ խորհրդարանին ու կառավարութեան:

Շատոնց սողացող ինքնիշխանութիւնը, որ բռնատիրութեան տարատեսակ մըն է, չի քողարկուիր այլեւս: Ժողովուրդը վստահօրէն պիտի ըսէ իր վճռական խօսքը, իր անունով Հայաստանի պետականութիւնը խորտակումի առաջնորդող վարչապետին դէմ:

Բախտորոշ օրերու սեմին կանգնած ենք: Պետականութեան քանդումին դէմ, ժողովուրդի զաւակներէն կազմուած բանակի վարկաբեկման դէմ ընդվզումը ժողովրդային հեղեղ պիտի յառաջացնէ ու Հայաստանը ազատագրէ անպատասխանատու իշխանութենէն:

 

«Ազդակ»

Յարակից լուրեր

  • Խորքային ճշմարիտ փոփոխութեան մը սպասումով
    Խորքային ճշմարիտ փոփոխութեան մը սպասումով

    Նախընտրական հետզհետէ թէժացող մթնոլորտին մէջ, երբ քաղաքացիներու հայեացքները սեւեռուած էին իշխանութեան փոփոխութեան ուղղութեամբ, Ազրպէյճան կատարեց իր հերթական հակահայկական գրոհը. Սիւնիքի եւ Գեղարքունիքի շրջաններուն մէջ ազրպէյճանական զինուած ուժերը ներխուժեցին Հայաստանի գերիշխան տարածքներ, յայտարարելով, որ անոնք իրենցն են: Իր տարած յաղթանակէն գինովցած, Իլհամ Ալիեւ իր լկտի յայտարարութիւնները կը գործնականացնէ ու լպիրշ եղանակով կը սպառնայ նոյնիսկ… Հայաստանի գոյութեան:

  • Ո՛չ ամբոխայինին, այո՛ առարկայական տրամաբանութեան
    Ո՛չ ամբոխայինին, այո՛ առարկայական տրամաբանութեան

    Հայաստան այսօր պաշտօնապէս կը մտնէ նախընտրական ժամանակաշրջանի մէջ: Արդարեւ, ձեւական քուէարկութեամբ մը Ազգային ժողովը պիտի «չյաջողի» ընտրել վարչապետ երկրորդ անգամ ըլլալով ու օրէնքի ուժով պիտի լուծուի: Անցնող երկու շաբաթներուն ընթացքին, հակառակ կառավարութեան հրաժարականին, խորհրդարան ու կառավարութիւն շարունակեցին գործել բնականոն ձեւով, կարծէք ոչինչ պատահած է: 

  • Պահանջատիրութեան դադար չկայ
    Պահանջատիրութեան դադար չկայ

    Հայոց Ցեղասպանութեան հարիւրամեակին` 2015-ին, եկեղեցին սրբադասեց Մեծ Եղեռնի զոհերը, զանոնք վերածելով խմբովին անանուն նահատակներու: Գաղափարի` հաւատքի ու հայրենիքի համար կամաւորապէս իրենց կեանքը տուած սուրբերու:

  • Ճշմարիտ ժողովրդավարութեան ակնկալութեամբ
    Ճշմարիտ ժողովրդավարութեան ակնկալութեամբ

    Եթէ Հայաստանի Ազգային ժողովը, որ ընտրուած է հինգ տարուան պաշտօնավարման համար ժամկէտէն առաջ լուծուի, բնականաբար տեղի կ՛ունենայ նոր Ազգային ժողովի ընտրութիւն: Ե՞րբ կը լուծուի Ազգային ժողովը: Եթէ, վարչապետի հրաժարականէն ետք, երկու անգամ տասնչորս օրերու ընթացքին չյաջողի նոր վարչապետ մը ընտրել: Իսկ վարչապետի հրաժարականի երկու հնարաւորութիւն կայ. Ազգային ժողովը անվստահութիւն կը յայտնէ կառավարութեան, կամ վարչապետը ինքնակամ կը հրաժարի:

  • Գռեհիկ ժողովրդավարութեան մասին
    Գռեհիկ ժողովրդավարութեան մասին

    Օրերը կ՛անցնին ու ճգնաժամը կը յամենայ:

    Հայաստանի մէջ ու Լիբանանի մէջ: Ո՛չ միայն ճգնաժամի յաղթահարման հանրայայտ ու շատոնց անհրաժեշտ դարձած լուծումները չեն որդեգրուիր, այլ նոր արգելքներ երեւան կու գան: Այդ արգելքներուն նպատակը հանրութեան ուշադրութիւնը դէպի մասնակի խնդիրներ շեղելու կը ծառայէ, մոռցնել տալու համար գլխաւորը, հիմնականը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։