Հա

Ազգային

03/03/2021 - 09:30

«Եթէ ՀՀ նախագահը հանրութեան արժանապատիւ հատւածի պահանջն ի կատար ածի, պէտք է վաղը դիմում ներկայացնի ՍԴ՝ վիճարկելով Փաշինեանի՝ ԳՇ պետին ազատելու առաջարկութեան սահմանադրականութիւնը». Արծւիկ Մինասեան

Այն, ինչ ՀՀ նախագահը յայտարարեց, անբացատրելի ու անտրամաբանական է նրա առաջին քայլից յետոյ, որովհետեւ նրա առարկութեան հիմքում դրւած էին սահմանադրական այն նորմերը, որոնք բացառիկ իրաւունք են վերապահում 5 տարի ժամկէտով նշանակւող ԳՇ պետին: 

«alikonline.ir» - Այն, ինչ ՀՀ նախագահը յայտարարեց, անբացատրելի ու անտրամաբանական է նրա առաջին քայլից յետոյ, որովհետեւ նրա առարկութեան հիմքում դրւած էին սահմանադրական այն նորմերը, որոնք բացառիկ իրաւունք են վերապահում 5 տարի ժամկէտով նշանակւող ԳՇ պետին: Այս մասին Tert.am-ի «Բանակ եւ անվտանգութիւն» խորագրով քննարկմանը ասաց ՀՅԴ ԳՄ անդամ Արծւիկ Մինասեանը՝ անդրադառնալով ՀՀ նախագահ Արմէն Սարգսեանի կողմից ԳՇ պետ Օնիկ Գասպարեանին պաշտօնից ազատելու հրամանագրի նախագիծը չստորագրելուն եւ «Զինւորական ծառայութեան եւ զինծառայողի կարգավիճակի մասին» նախագծի սահմանադրականութեան հարցով ՍԴ դիմելուն:

«Աւելին՝ ազատման հիմքերի տեսակէտից բաւարար հիմնաւորւածութիւն ներկայացւած չէ, թէ ինչ պատճառով պէտք է ազատւի մի կառոյցի ղեկավարը, որը, ըստ Սահմանադրութեան, անվտանգութեան երաշխաւորն է: Չի կարող որեւէ անձ, ներառեալ՝ Կառավարութեան ղեկավարը, առանց որեւէ հիմքի, ըստ քմահաճոյքի, ցանկութեան ազատել ԶՈՒ ԳՇ պետին, կամ որ նոյնն է՝ ԶՈՒ անմիջական հրամանատարին»,-ասաց Մինասեանը:

Նա նշեց նաեւ՝ Սահմանադրութեան կարգաւորման համաձայն՝ ԶՈՒ ԳՇ պետը քաղաքական կամ հայցողական պաշտօն չէ, այն մի կարգավիճակով անձ է, որ մասնագիտական եւ սահմանադրական լիազօրութիւնների շրջանակում դուրս պէտք է լինի քաղաքական ղեկավարութեան որեւէ վարքագծից:

Դիտարկմանը, թէ իշխանութիւնը հակասում է՝ նշելով, որ Նիկոլ Փաշինեանի հրաժարականը պահանջելը քաղաքական յայտարարութիւն է, Մինասեանն արձագանքեց, թէ այդ կերպ ներկայացնելը կոպտագույն սխալ է:

«Դա մանիպուլիացիա է, որովհետեւ ԶՈՒ ԳՇ-ն, հրամանատարական կազմը տւել է գնահատական այն մարմնի գործունէութեան վերաբերեալ, որը պէտք է ապահովէր ԶՈՒ-ի համար պատշաճ այնպիսի հնարաւորութիւններ, որ վերջինս կարողանար ապահովել անվտանգութիւնը, մինչդեռ «ոչ ադեկվատ» արտայայտութիւնը պատահական չէ, որ Կառավարութիւնը ոչ ադեկվատ է, այսինքն՝ չկան այն անհրաժեշտ հիմքերը, որոնք հնարաւորութիւն կը տային հայոց բանակին՝ իրականացնել իր սահմանադրական առաքելութիւնը»,-ասաց նա՝ ընդգծելով նաեւ, թէ ԶՈՒ ԳՇ յայտարարութեան մէջ շատ կոնկրետ մեղադրանքներ կային անարդիւնաւէտութեան, ապիկարութեան եւ բանակը հեղինակազրկելու մասին:

«Ես կարող եմ համոզմունք յայտնել, որ այս գնահատականների ներքոյ կան նաեւ դրանք հիմնաւորող փաստեր, որոնք ծանր յանցագործութիւնների եւ առանձնապէս ծանր յանցագործութիւնների փաստեր են: Հիմա պէտք է ԶՈւ հրամանատար կազմը պահանջի քրէական գործի հարուցում՝ Քրէական օրէնսգրքի՝ պետական անվտանգութեան յօդւածներին համապատասխան՝ պետական դաւաճանութիւնից մինչեւ վնասարարութիւն, պաշտօնէական դիրքի չարաշահում, որի դէպքում Գլխաւոր դատախազութիւնն ուղղակի պարտաւոր պէտք է լինի յարուցել քրէական գործ»,- ասաց նա՝ նշելով, որ Քրէական դատավարութեան օրէնսգրքի համաձայն՝ Դատախազութիւնը պարտաւոր է ժամանակաւորապէս կասեցնել վարչապետի աթոռն զբաղեցրած անձի գործունէութիւնը:

«Ամէն Սարգսեանը խաղում է նոյն խաղում, ինչ վարչապետն էր ի սկզբանէ ծրագրել: Եթէ նախագահը հետեւողական լինի իր առաջին գործողութեանը եւ հանրութեան արժանապատիւ հատւածի պահանջն ի կատար ածի, պէտք է գոնէ վաղը դիմում ներկայացնի ՍԴ՝ վիճարկելով Փաշինեանի առաջարկութեան սահմանադրականութիւնը»,- ասաց Արծւիկ Մինասեանը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։