Print this page
25/04/2021 - 08:20

Հ.Յ.Դ. Բիւրօն ողջունում է Ա.Մ.Ն. նախագահի կողմից Հայոց Ցեղասպանութեան ճանաչումը հաստատող ուղերձը

2021թ. Ապրիլի 24-ը պատմական օր է հայութեան համար։ Պատմական օր է, որովհետեւ Հայոց Ցեղասպանութեան 106-րդ տարելիցի օրը, Ամերիկայի Միացեալ Նահանգների գործադիր իշխանութիւնը, յանձինս նախագահ Ջոզէֆ Բայդէնի, պաշտօնապէս վերահաստատեց Հայոց Ցեղասպանութեան իրողութիւնը։

2021թ. Ապրիլի 24-ը պատմական օր է հայութեան համար։ Պատմական օր է, որովհետեւ Հայոց Ցեղասպանութեան 106-րդ տարելիցի օրը, Ամերիկայի Միացեալ Նահանգների գործադիր իշխանութիւնը, յանձինս նախագահ Ջոզէֆ Բայդէնի, պաշտօնապէս վերահաստատեց Հայոց Ցեղասպանութեան իրողութիւնը։

Այսպիսով, փաստօրէն, Ամերիկայի Միացեալ Նահանգները անցան այն բազմաթիւ երկրների շարքը, որոնց ո՛չ միայն օրէնսդիր, այլ նաեւ գործադիր իշխանութիւններն են ճանաչել Հայոց Ցեղասպանութիւնը։

Ամերիկայի Միացեալ Նահանգների նախագահի կողմից Ցեղասպանութիւն եզրոյթի գործածութիւնը այս օրերին յոյժ կարեւոր է նաեւ այն պատճառով, որ փաստացի գնահատական է տրւում Արցախեան վերջին՝ 44-օրեայ պատերազմին ուղղակիօրէն ու անթաքոյց ներգրաւուած Թուրքիայի՝ սրանից 106 տարի առաջ կատարած ու առաւել քան մէկ դար շարունակուող ցեղասպանական գործողութիւններին։

Արձանագրուած յաջողութիւնը արդիւնքն է տասնամեակներ շարունակ Հ.Յ.Դ. Ամերիկայի Միացեալ Նահանգների մարմինների, Հայ Դատի յանձնախմբերի եւ գրասենեակների եւ հազարաւոր նուիրուեալների անդուլ, անխոնջ ու անկոտրում պայքարի։ Այն՝ արգասիքն է մեր մարմինների, գրասենեակների ու յանձնախմբերի հանդէպ ամերիկահայութեան հաւատքի, հայութեան հետեւողական աշխատանքի, Հայ Դատի ամերիկացի բարեկամների, աջակիցների ու քաղաքական գործիչների։

Հ.Յ.Դ. Բիւրօն, այսու իր շնորհակալութիւնն է յայտնում բոլոր նրանց, ովքեր անվհատ պայքարեցին այս յաջողութեան համար։ Վարձքներդ կատա՛ր։

Ամերիկայի Միացեալ Նահանգների այս յայտարարութեան պատգամը մեզ համար միանշանակ է. պայքարը շարունակւում է, մինչեւ Թուրքիան ընդունի իր պատմական պատասխանատւութիւնը եւ կատարի արդարացի հատուցում։ Հայ Դատը ժամանցելիութիւն չի ճանաչում։ Հայութեան ոտնահարուած իրաւունքները պիտի՛ վերականգնուեն։ Հայաստանն ու հայութիւնը իրենց արժանի տեղը պիտի՛ ունենան ազգերի համաշխարհային ընտանիքում։ Հայութիւնը պիտի՛ ունենայ անվտանգ ապրելու եւ արարելու հնարաւորութիւն իր բնօրրանում։

Ուրեմն, օն անդր առաջ՝ դէպի նոր յաղջողութիւններ ու նոր յաղթանակներ։

Հ.Յ.Դ. ԲԻՒՐՕ

24 ապրիլ, 2021

ԵՐԵՒԱՆ

 

Յարակից լուրեր