Հա

Ազգային

25/04/2021 - 12:20

Խաղաղասիրական ճիգերը միակողմանի են եւ իրականանալի չեն, քանի դեռ մեր թշնամին դրա համար ոչ մի քայլի չի դիմել

«Լուրեր.com»-ը Հայոց Ցեղասպանութեան զոհերի յիշատակութեան օրւան ընդառաջ զրուցել է Հալէպի «Գանձասար» շաբաթաթերթի գլխաւոր խմբագիր Զարմիկ Պօղիկեանի հետ:

«alikonline.ir» - «Լուրեր.com»-ը Հայոց Ցեղասպանութեան զոհերի յիշատակութեան օրւան ընդառաջ զրուցել է Հալէպի «Գանձասար» շաբաթաթերթի գլխաւոր խմբագիր Զարմիկ Պօղիկեանի հետ:

 

- Տիկի՛ն Պօղիկեան, ի՞նչ միջոցառումներ էք իրականացնելու ապրիլի 24-ին:

- Հայոց Ցեղասպանութեան 106-րդ տարելիցը կը յիշատակւի Սիրիայի բոլոր նահանգներում` ինչպէս ամէն տարի: Սիրիահայութիւնը միջոցառումներ պիտի իրականացնի մի քանի նպատակներով: Առաջինը, անշուշտ, մեր երիտասարդութեան յիշողութեան մէջ վառ պահելու մեր իրաւունքների ձեռքբերման հրամայականը, երկրորդը` քարոզչական տարբեր միջոցներով բացատրել ցեղասպանութեան էութիւնը: Թուրքիայի ներկայ իշխանութիւնների կողմից մինչեւ օրս շարունակւում է հայ ազգի իրաւունքների ոտնահարումը, հայ ժողովրդի բնաջնջումը, սպանութիւնը, ինչպէսեւ տեսանք Արցախում վերջին պատերազմի ժամանակ: Հալէպում կը կազմակերպւի ջահերով երթ, քայլարշաւ՝ Նոր Գիւղից մինչեւ ազգային գերեզմանատուն, որտեղ տեղի կունենայ հանրահաւաք եւ ներկայ կը լինեն սիրիական լրատւամիջոցներ, տեղացի հիւրեր, հայկական միութիւնների ու կազմակերպութիւնների ներկայացուցիչներ: Սիրիայի 3 հայ համայնքներում տեղի կունենայ ոգեկոչման հանդիսութիւն՝ հովւապետերի կազմակերպմամբ եւ ներկայութեամբ: Կը լինեն երիտասարդական հաւաքներ, դասախօսական շարքեր, բանախօսութիւններ: Կենտրոնական հանդիսութիւնը տեղի կունենայ ապրիլի 24-ի երեկոյեան՝ սիրիահայ կազմակերպութիւնների եւ միութիւնների մասնակցութեամբ: Երկրում բոլոր պայմանները թոյլատրւած են մեզ, որպէսզի ազատ, անկաշկանդ ձեւով իրականացնենք այս միջոցառումները:

 

- ՀՀ ներկայ իշխանութիւնները Թուրքիայի եւ Ադրբեջանի հետ խաղաղութիւն եւ բարեկամութիւն հաստատելու կոչեր են հնչեցնում. ի՞նչ էք կարծում, արդեօ՞ք դա հնարաւոր է:

- Խաղաղասիրական այս ճիգերը բնական են. ցանկացած երկիր ձգտում է իր հարեւանների կողքին խաղաղ պայմաններում ապրել, բայց խաղաղասիրութիւնը միակողմանի չի ընթանում եւ պայմաններով առաջ չեն գնում: Իմ կարծիքով` Հայաստանը միշտ ձգտել է խաղաղ պայմանների, սակայն այս բոլորն օգտագործւել են Թուրքիայի եւ Ադրբեջանի կողմից: Թուրքիան եւ Ադրբեջանը միշտ էլ նախապայմաններով են առաջ շարժւել եւ, փաստօրէն, դրանց մէկ մասն իրականացրին՝ վերագրաւելով Արցախի մեծ մասը: Կարծում եմ, որ այս թեզը մէջտեղ նետելով Թուրքիան կրկին պայմաններ առաջ կը քաշի եւ կը ջանայ իրականացնել դրանք՝ ստիպելով հայկական կողմին հրաժարւել Հայոց Ցեղասպանութեան ճանաչման հետապնդման հարցից, ինչը նշանակում է ոտնահարել հայ ժողովրդի իրաւունքները: Այս խաղաղասիրական ճիգերը միակողմանի են եւ իրականանալի չեն այնքան ժամանակ, քանի դեռ հակառակ կողմը, որ մեր թշնամին է, խաղասիրական ոչ մի քայլի չի դիմել։ Արցախեան վերջին պատերազմն էլ ցոյց տւեց, որ Թուրքիան հնարաւոր բոլոր ձեւերով նեցուկ կանգնեց Ադրբեջանին եւ 5000 նահատակների պատճառ դարձաւ. այսպիսի հոգեբանութեամբ եւ վարքագծով պետութիւնների հետ խաղաղասիրութեան կոչերն անպտուղ եմ համարում։ Այդ երկրները խլում են միւսների իրաւունքները, ոտնահարում են դրանք, առաջ են շարժւում ահաբեկչական նկրտումներով, եւ խաղաղութիւն կը հաստատւի միայն այն պարագայում, երբ իրենք ընդունեն պատմական իրողութիւնները, հաստատեն հայ ժողովրդի իրաւունքները, ապահովեն մեր անվտանգութեան երաշխիքները, ճանաչեն Հայոց Ցեղասպանութիւնը, այլապէս Թուրքիան կը շարունակի պանթուրքական ծրագրերը:



- Այսօր, երբ յեղափոխութեան էյֆորիան անցել է, արդեօ՞ք հասարակութիւնը նորից կընտրի այս իշխանութիւններին, եւ եթէ ոչ, ապա, ըստ Ձեզ, ինչպիսի՞ ուժեր կընտրւեն:

- Մենք հաւատում ենք, որ հայ ժողովուրդն ունի այն գիտակցութիւնն ու յանդգնութիւնը, որ այսքան կորուստներ ունենալուց յետոյ պիտի ոտքի կանգնի, ընտրի այնպիսի ուժերի, որոնք կը պաշտպանեն երկրի ազգային, քաղաքական շահերը։ Այդ ուժերը չեն մղւի տարածաշրջանային գերտէրութիւնների շահերի ապահովման համար մեր երկրի շահերն անտեսման տանող այնպիսի քաղաքականութեամբ, որը, ի վերջոյ, երկիրն աւելի կաղքատացնի, ժողովրդին աւելի խեղճ կը դարձնի եւ կը ստրկացնի: Տարածաշրջանային մեծ պետութիւնների, գերտէրութիւնների շահը յստակ է. նրանք ուզում են ամէն ինչ լուծւած տեսնել, կարեւոր չէ՝ ում հաշւին, ուժն է խօսողը, այնպէս որ, եթէ մենք մեր երկրի, ժողովրդի իրաւունքները չպաշտպանենք, գերտէրութիւնները սկուտեղի վրայ մեր իրաւունքները չեն յանձնի մեզ: Պիտի մեր տարակարծութիւնները մի կողմ դնենք, մեր կարելիութիւններն առաւելագոյն ձեւով օգտագործենք: Պիտի յուսանք, որ այս ընտրութիւններում կընտրւեն այնպիսի ուժեր, որոնք այս բոլորը քայլ առ քայլ, առանց զգացական պոռթկումների կիրականացնեն եւ Հայաստանը ոտքի կը կանգնեցնեն։

Արցախի հարցը փակւած չէ, մեզ համար Արցախը մնում է այն արժէքը, որ իր ներկայութեամբ կը պաշտպանի նաեւ Հայաստանի սահմանները: Անհրաժեշտ է Արցախի կարգավիճակի լուծման քայլերն արագացնել եւ չանտեսել, որովհետեւ եթէ մենք չբարձրաձայնենք, Ադրբեջանն այդ հարցն ի նպաստ իրեն կլուծի՝ օգտագործելով իր տնտեսական ռեսուրսները եւ տարբեր միջոցներ, Թուրքիան էլ կաջակցի նրան: Դիւանագիտական լարւած ճիգերով պէտք է հետապնդել Արցախին կարգավիճակ տալու հարցը։

 

Արփինէ Յակոբեան

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։