Հա

Ազգային

25/05/2021 - 12:05

Հոգեւոր եւ մշակութային ժառանգութեան աւարառութիւնը եւ մենք

Այժմ արդէն յստակ է, որ թուրքեւատրպէյճանական վերջին նախայարձակումը (aggression), Իսրայէլի բացայայտ օգնութեամբ, ոչ միայն յանգեցաւ Շուշիի, Հատրութի, Քարվաճառի, Քաշաթաղի եւ այլ հայրենական տարածքներու բռնագրաւման, ան յանգեցաւ ոչ միայն 5000-է աւելի մատաղ կեանքերու սպանդին, ռազմագերիներու շարունակուող ողբերգութեան, ազգային տնտեսութեան աղէտին, այլեւ մեր հոգեւոր եւ մշակութային հարստութեան գերեվարման եւ ճգնաժամին։ 

ԿԱՐՕ ԱՐՄԵՆԵԱՆ

 

Այժմ արդէն յստակ է, որ թուրքեւատրպէյճանական վերջին նախայարձակումը (aggression), Իսրայէլի բացայայտ օգնութեամբ, ոչ միայն յանգեցաւ Շուշիի, Հատրութի, Քարվաճառի, Քաշաթաղի եւ այլ հայրենական տարածքներու բռնագրաւման, ան յանգեցաւ ոչ միայն 5000-է աւելի մատաղ կեանքերու սպանդին, ռազմագերիներու շարունակուող ողբերգութեան, ազգային տնտեսութեան աղէտին, այլեւ մեր հոգեւոր եւ մշակութային հարստութեան գերեվարման եւ ճգնաժամին։ Այսօր, Ալիեւ եւ իր պատերազմական վոհմակը մեր հոգեւոր եւ մշակութային գանձարանին հետ կը վերաբերուին որպէս ռազմական աւարի ճիշտ այնպէս ինչպէս թուրք իշխանութիւնները՝ Արեւմտեան Հայաստանի մեր ազգային ժառանգութեան։

Այն ինչ որ կը պատահի այսօր մեր աչքերուն առջեւ անկասկած պիտի ունենայ շատ ծանր հետեւանքներ։ Երբ թշնամիիդ կը յանձնես քու հայրենական հողդ, ինքնաբերաբար կը յանձնես նաեւ այդ հողը հայրենացնող բոլոր բանալի կենսագործօնները։ Հողի առեւանգումը կը վերածուի լեզուի առեւանգման։ Կը վերածուի մշակոյթի առեւանգման։ Կը վերածուի քաղաքակրթութեան եւ արժէքային համակարգի առեւանգման։ Եւ ի վերջոյ կը վերածուի ինքնութեան առեւանգման։

Վերջին հարիւր տարուան ընթացքին, իրերայաջորդ թուրք իշխանութիւնները լայնօրէն յաջողեցան դիմազեղծել Արեւմտեան Հայաստանի քաղաքական եւ մշակութային ինքնութիւնը։ Ջնջեցին հետքերը մեր քաղաքակրթութեան, յատուկ եւ հետեւողական ռազմավարութեամբ աղաւաղեցին փաստերը մեր պատմութեան։ Փոխեցին տեղանուները։ Փոխարէնը ստեղծեցին մէկ կեղծ պատմութիւն գործի լծելով նաեւ շարք մը հեղինակաւոր դէմքեր Արեւմուտքի ակադեմական ոլորտէն։Ջնջեցին ու նենգափոխեցին պատմական յիշողութիւնը։ Եւ ապացուցեցին, որ այդ ոճրային աւերածութիւնը իրենք կրնան իրագործել քաղաքակիրթ մարդկութեան աչքերուն առջեւ եւ այս վերջինի իսկ մեղսակցութեամբ։

Մենք տեսանք, որ մարդը չէ հասած տակաւին ինքնագիտակցութեան այն մակարդակին, որ ինքնաբերաբար տէր կանգնի իր համամարդկային յիշողութեան։ Պատմական ճշմարտութիւնը հաստատութենական (institutional) տէր չունի։ Խնդրեմ մի խօսիք Իւնեսքոյի մասին։ Մի խօսիք զանազան ակադեմիաներու մասին։ Որոշ մասնագէտներ միայն պատահականօրէն կը լծուին հայ ժողովուրդի պատմութեան ուսումնասիրութեան եւ Աստուած գիտէ, թէ ինչպիսի՜ նորմերու կիրարկումով։ Նաեւ պատահականօրէն որոշ հայ պատմաբաններու գործերը կը մտնեն համաշխարհային շրջանառութեան մէջ։ Փոխարէնը Թուրքիա ստեղծած է «գիտական» փարթամ հիմնարկներ եւ հայոց պատմութեան փաստերու նենգափոխութիւնը վերածած է ամէնօրեայ գործողութեան։ Թուրք պետութիւնը առատ փող կը հոսեցնէ համաշխարհային այս զեղծարարութեան (կոռուպցիայի) գետերը պարենաւորելու։

Տասնամեակներու ընթացքին, այս կեղծ գրականութիւնն է, որ կը դառնայ նորմ…Եւ յանկարծ կը տեսնենք, որ թրքական այս հաստատութիւններու «ասպնջականութիւն»ը վայելող նորահաս հայ պատմաբաններ ալ, իրենց կարգին, կ՚ընդգրկուին այս նենգ հոսանքին մէջ…Հիմա կ՚ըստիպուինք մեր պատմութիւնը պաշտպանել այս նորահաս «օսմանագէտ»ներու «արշաւ»-ներէն…

Իսկ Փաշինեանական իշխանութիւնը արդէն կը գամէ վերջին գամերը այս դագաղին իր թրքաբովանդակ կրթական քաղաքականութեամբ։ Այս բոլորը մատնանշեցի ըսելու համար, որ մենք այժմ կը գտնուինք Արեւելեան Հայաստանի պատմական յիշողութիւնը կորսնցնելու իրական վտանգին առջեւ։

Ալիեւ ֆաշիստ բռնատէր մըն է, որ այս պարագային յստակօրէն կը գիտակցի, թէ իր մեծագոյն թշնամին… ինքը՝ պատմութի՛ւնն է։ Այս առումով, գործ ունինք հեռատեսութեամբ օժտուած թշնամիի մը հետ, որ սկսած է հսկայ գումարներ ծախսել իր այս թշնամիին՝ այսինքն պատմութեա՛ն բնաջնջման ծրագրին վրայ։ Ան համոզուած է, որ այս ռազմադաշտին վրայ ինք կրնայ գործել անպատիժ եւ իր աւերը սփռել ամէն կողմ։

Անշուշտ պէտք է գոհունակութեամբ յիշել ԵւրոԽորհրդարանի Մայիս 19, 2021-ի բանաձեւը հայ ռազմագերիներու մասին, որուն 16-երորդ պարբերութիւնը կը խօսի մշակութային ժառանգութեան ապահովութեան մասին։ Կ՚արտագրեմ յօդուածը բանաձեւի անգլերէն բնագրէն՝

«…16. (The European Parliament) Strongly insists that both parties refrain from any actions destroying Armenian heritage in Azerbaijan and Azeri heritage in Armenia; calls for the full restoration of demolished sites and for greater involvement of the international community in protecting world heritage in the region․»

Ինչպէս միշտ, Ատրպէյճանն ու Հայաստանը արուեստականօրէն կը հաւասարեցուին բանաձեւին մէջ աւերածութեան մեղքը տարածելով նաեւ անմեղ կողմին վրայ, որ բացայայտ անարդարութիւն մըն է հայկական կողմին հանդէպ։ Այս բանաձեւն իսկ - որ այլապէս ողջունելի դիրքորոշում մըն է ԵւրոԽորհրդարանին կողմէ - կու գայ հաստատելու, որ համաշխարհային մշակոյթի պահպանութիւնը այսօր տէր չունի աշխարհի բեմին վրայ։

Մեր հոգեւոր եւ մշակութային ժառանգութեան տէրը միայն մենք կրնանք ըլլալ։ Հետեւաբար մեր պարտաւորութիւնն է պատրաստուիլ նաեւ այս պատերազմին։

 

Մայիս 24, 2021

Ուաշինկթըն

 

Յարակից լուրեր

  • Կարմիր գիծերը քաշուած համարեցէք
    Կարմիր գիծերը քաշուած համարեցէք

    Դիտեցէք լուսանկարը, որ հատորներու դառն պերճախօսութեամբ մեզի կ՚ըսէ, թէ ով ենք մենք եւ ով է մեր թշնամին եւ ինչ է այն ուժը, որուն ձեռքերուն մէջ կը գտնուի մեր երկրին ղեկը։ Հոս այլեւս նրբերանգներ չկան։ «Մեղմացուցիչ դէպք յանցանաց»-ներ գոյութիւն չունին, որոնց ետին կարողանաք պահուըտիլ։ Թշնամին է, որ օր-ցերեկով կը ժպրհի ձեր արժանապատւութիւնը քուրջի վերածել եւ դուք ոչինչ ունիք ըսելու։

  • Ասիկա մեր պարտութիւնը չէ
    Ասիկա մեր պարտութիւնը չէ

    Այսօր ընդվզած ենք բոլորս ի տես այն անորակելի քաղաքական խեղճութեան, որուն մատնուած կը թուի ըլլալ հայրենի մեր հասարակութեան հսկայ մէկ զանգուածը։ Խեղճութիւնը, որուն կ՚ակնարկեմ, անկարողութիւնն է ոտքի կանգնելու եւ քաղաքացիական ողնայար ցուցաբերելու հաւաքական կեանքի վճռական րոպէներուն։ Անատակութի՛ւնը՝ ինքնիր ճակատագիրը տնօրինելու։ Քաղաքական կամքի ահաւոր բա՛ցը՝ որ ազգերու մահավճիռն իսկ է։

  • Իլհամ Ալիեւի մղձաւանջը
    Իլհամ Ալիեւի մղձաւանջը

    Այսօր անգամ մը եւս կ՚անդրադառնանք, թէ ինչպիսի՜անասելի նուէր մըն է, որ ըրած է թշնամիին Նիկոլ Փաշինեանի պարտութեան վարչակարգը սնուցանելով Ալիեւի հիւանդկախ երեւակայութիւնը։ Եւ ինչպիսի՜ աններելի առաւելութիւն մը զիջած ենք թշնամիին մենք՝ ՀՀ քաղաքացիներս 44-օրեայ պատերազմի վաղորդայնին լքելով մեր անկախ պետականութեան սանձերը եւ արտօնելով, որ Փաշինեան խլէ այդ սանձերը եւ իր աւերը շարուանակէ գործել անպատիժ։ Եւ ամէն օր աւելի նուաստացնել մեզ եւ մեր երկիրը Ալիեւի լկտի գոռոզամտութեան առջեւ։ 

  • Մեր պայմանագրութիւնը ազգի՛ն հետ է
    Մեր պայմանագրութիւնը ազգի՛ն հետ է

    Ես կը հաւատամ, որ ՀՀ ընտրական դաշտը այսօր արդէն կը գտնուի ինքնաբիւրեղացման յստակ հոլովոյթի մը մէջ։ Կը հաւատամ, որ ՀՀ հասարակութիւնը պիտի կրնայ թօթափել իր վրայէն քաղաքական բարոյալքումի ներկայ վարակը եւ բացարձակապէս մերժէ պարտութեան վարչակարգին կողմէ իրեն պարտադրուող այս ամօթը։ Մեր ժողովուրդը պիտի կրնայ ՈՉ ըսել իր արժանապատւութիւնն ու պատմութիւնը արատաւորող այս թիւրիմացութեան։ Այս ազգը չի կրնար ընդունիլ որեւէ համակեցութիւն մարդու այս տեսակին հետ, որ տարրական քաջութիւնն իսկ չունի իր թշնամին ճանչնալու։ 

  • Անհոգութիւն՝ որ համազօր է ոճիրի
    Անհոգութիւն՝ որ համազօր է ոճիրի

    Օրերէ ի վեր, ամէն հայ ինքզինք կը գտնէ մահացու ապշութեան մը գերիրական ոլորտին մէջ, ուր խախտած կը թուին ըլլալ տիեզերական կշիռները եւ տրամաբանութիւնը՝ ենթակա՛յ այլանդակ շրջադարձերու։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։