Հա

Ազգային

14/06/2021 - 13:05

Հայաստան` ամէն բանէ վեր

Հայաստանի խորհրդարանական արտահերթ ընտրութիւններու քարոզարշաւի հինգերորդ օրն ենք. ուրբաթ, 11 յունիս 2021: Յօդուածը երբ լոյս տեսնէ, երկու կամ երեք յաւելեալ օրեր անցած կ՛ըլլան. արդեօք աւելի յստակութեան ականատես կը դառնա՞նք, թէ՞ կը շարունակուի ցարդ ցուցադրուած անմակարդակ ու անհեռանկար քարոզչութիւնը: Իշխանութիւնը ժամանակաւորապէս գրաւող ուժը յամառօրէն կը շարունակէ բանավիճիլ անցեալի քննադատութեան նիւթերուն շուրջ, ինչպէս որ ըրած էր իր իշխանութեան երեք տարիներու տեւողութեան: 

ՏԻԳՐԱՆ ՃԻՆՊԱՇԵԱՆ

 

Հայաստանի խորհրդարանական արտահերթ ընտրութիւններու քարոզարշաւի հինգերորդ օրն ենք. ուրբաթ, 11 յունիս 2021: Յօդուածը երբ լոյս տեսնէ, երկու կամ երեք յաւելեալ օրեր անցած կ՛ըլլան. արդեօք աւելի յստակութեան ականատես կը դառնա՞նք, թէ՞ կը շարունակուի ցարդ ցուցադրուած անմակարդակ ու անհեռանկար քարոզչութիւնը: Իշխանութիւնը ժամանակաւորապէս գրաւող ուժը յամառօրէն կը շարունակէ բանավիճիլ անցեալի քննադատութեան նիւթերուն շուրջ, ինչպէս որ ըրած էր իր իշխանութեան երեք տարիներու տեւողութեան: Վերջին երեք տարիներու ձախողումները եւս կը վերագրուին նախկիններուն: Իսկ մօտաւոր թէ միջին հեռաւորութեամբ ապագային մասին ոչ մէկ ծրագիր, ոչ մէկ նախատեսութիւն: Ոչ մէկը լրիւ կ՛արտայայտէ կրկնուող իշխանական պատգամը. կայ վերադարձ երեք տարուան վաղեմութեամբ սպառնալիքներուն: Նիկոլ Փաշինեան ընտրողներուն առնուազն 60 առ հարիւրին ձայները կ՛ակնկալէ, խոստանալով «թաւշեայ» ղեկավարումը փոխարինել «պողպատեայ» ղեկավարմամբ, այսինքն` առկայ քաոսային վիճակը աւելի խորացնել, թշնամանքը արմատացնել, հանրութեան երկպառակութիւնը մնայուն դարձնել: Քաղաքական, տնտեսական, ընկերային, առողջապահական, ուսումնական-կրթական ոչ մէկ ծրագիր: Ըստ Նիկոլ Փաշինեանի, ամէն բան լաւ ու ճշգրիտ է կատարուած, բայց խանգարողներ կան, որոնք պէտք է պատուհասել:

Հարցերու ներկայացման այս եղանակին նպատակն է շեղել գոյութիւն ունեցող բարդ ու անմիջական լուծում պահանջող խնդիրներուն արծարծումը, լուծումներու որոնումը, առաջարկներու ներկայացումը: Ամէնօրեայ խծբծանքներուն պատասխանելով, ընդդիմադիրները հնարաւորութիւն չեն ունենար իրենց գաղափարները ներկայացնելու եւ բանական քարոզարշաւ կատարելու: Բարեբախտաբար, ընդդիմադիրները հասկցած են արդէն մաշած այս մարտավարութիւնը եւ քիչ, շատ քիչ կ՛արձագանգեն ցեխարձակումներուն: Արդի՞ւնքը. կը ստացուի ոչ թէ բանավէճ, այլ խուլերու խօսակցութիւն: Ընտրողը հրաւիրուած է ոչ թէ ծրագիրներու ու գաղափարներու միջեւ ընտրութիւն կատարելու, այլ ընտրացուցակները գլխաւորող անհատներէն մէկը ընտրելու: Համակրանքի կամ հակակրանքի հիման վրայ: Իսկ շատ պոռացողը, շատ ճվճվացողը, շատ ամբաստանողը կը կարծէ, որ որքան բարձր գոռայ, այնքան իրաւունք կ՛ունենայ:

Քարոզարշաւի մնացած օրերուն կը յուսանք, որ պղտոր ջուրերը հետզհետէ կը պարզուին, բանականութիւնը կը փոխարինէ ամբոխավարութիւնը եւ տրամաբանութիւնը կը յաղթանակէ: Սովորական ու ընթացիկ ընտրութիւն մը չէ, որ կոչուած ենք կատարելու: Ընդդիմութիւնը կ՛ուզէր, որ ստեղծուէր առժամեայ կառավարութիւն մը, որ խաղաղեցնէր մթնոլորտը ու ապա դիմէր ընտրութեան: Իշխանութիւնը, գիտնալով, որ հանդարտ ու բանական մթնոլորտի մէջ կատարուող ընտրութիւնը նպաստաւոր չէ ամբոխավարութեամբ կերակրուող իր ընթացքին, պարտադրեց ընտրութեան արագացուած կայացումը, ինչպէս ըրած էր 2018-ի դեկտեմբերին: Բայց ժողովուրդի զգալի թիւ մը արդէն հասկցած է նման հապճեպ, դաւադիր որոշումին դրդապատճառը ու երես թեքած սուտ յեղափոխականներէն, որոնք երկիրը մատնեցին աղէտի:

Շատ չմնաց. Հայաստանը պիտի ազատուի պետական ու ազգային մտածողութենէ զուրկ բախտախնդիրներէն ու իրենց առաջնորդ հանդիսացող մակաբոյծէն: Պիտի յաղթանակէ ճշմարտութիւնը, իմաստութիւնը, ազգ, հայրենիք ու պետութիւն ամէն բանէ վեր դասող բանականութիւնը:

21 յունիսին պիտի դիմաւորենք նոր արշալոյս մը, վերստին անկախացած Հայաստանի արշալոյսը. կորսուածը վերագտնելու, աւերուածը վերաշինելու, քանդուածը վերակերտելու համար յամառ ու քրտնաթոր աշխատանքի հրաւիրման առաւօտը:

Հայաստան` ամէն բանէ վեր:

«Ազդակ»

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։