Հա

Ազգային

18/06/2021 - 08:10

Դէպի ուժեղ Հայաստան

Հայ Յեղափոխական Դաշնակցութեան աշխարհասփիւռ կառոյցը ոտքի է կանգնել իր աջակցութիւնը յայտնելու «Հայաստան» դաշինքին, որն այսօրւայ պայմաններում Հայաստանի պետականութեան յարատեւման եւ զարգացման միակ երաշխաւորն է:

Հայ Յեղափոխական Դաշնակցութեան աշխարհասփիւռ կառոյցը ոտքի է կանգնել իր աջակցութիւնը յայտնելու «Հայաստան» դաշինքին, որն այսօրւայ պայմաններում Հայաստանի պետականութեան յարատեւման եւ զարգացման միակ երաշխաւորն է:

Աշխարհի բոլոր անկիւններից Դաշնակցութեան կուսակցական մարմիններն ու յարակից կառոյցների եւ քոյր միութիւնների պատասխանատուները կոչ են ուղղում իրենց հայրենաբնակ քոյրերին եւ եղբայրներին՝ մերժել չարիքի իշխանութիւնը եւ վերականգնել ազգայինը:

Իւրաքանչիւր դաշնակցականի համար հայրենիքը կայ եւ եղել է այն սրբութիւն սրբոցը, յանուն որի որպէս դաշնակցական մկրտւելու առաջին իսկ օրից երդւել է «բոլոր ուժերով, իսկ եթէ հարկ լինի՝ նաեւ կեանքի գնով ծառայել Հայաստանի եւ հայութեան ազատագրութեան դատին»: Այդ երդմանը հաւատարիմ մնալով՝ Դաշնակցութիւնն այսօր ասպարէզում է:

Հայաստանի անկախութիւնից ի վեր առաջին անգամ է, որ Դաշնակցութիւնն ընտրութիւններին մասնակցում է դաշինքով: Դաշնակցութեան համար այս ընտրութիւնները հերթական քաղաքական մրցավազք չեն: Սեղանին հայրենիքի լինելիութեան հարցն է դրւած: «Հայաստան» դաշինքի եւ Դաշնակցութեան համար գլխաւոր կողմնորոշիչը պետական կեանքում ազգային մտածողութեան վերակազմաւորումով համազգային ներուժը արտաքին եւ ներքին մարտահրաւէրներին ծառայեցնելու հրամայականն է:

Վերականգնելով Հայաստանի արտաքին քաղաքական վարկը՝ անհրաժեշտ է յստակեցնել պետական ռազմավարական առաջնահերթութիւնները, վերականգնել միջազգային հանրութեան եւ դաշնակիցների հետ ներկայումս խաթարւած յարաբերութիւնները եւ մշակել փոխլրացնող ու հաւասարակշռւած դիւանագիտական կապեր:

Թէ՛ Դաշնակցութեան եւ թէ՛ Արցախի առաջին ու Հայաստանի երկրորդ նախագահ Ռոբերտ Քոչարեանի անցած ուղին վկայակոչում են, որ այդ ուժերի միասնութեամբ հնարաւոր է իրականացնել վերոյիշեալ արտաքին քաղաքականութիւնը:

Այս համագործակցութեան միւս կարեւոր ճակատը Հայաստան-Սփիւռք բնականոն փոխյարաբերութիւնների վերականգնման անհրաժեշտութիւնն է: Յիշենք, որ Ռոբերտ Քոչարեանի նախագահութեան օրօք Հայոց Ցեղասպանութեան հարցը ներառւեց Հայաստանի արտաքին քաղաքականութեան օրակարգում, որը հնարաւորութիւն ստեղծեց ամբողջ հայութեան քաղաքական եւ տնտեսական ներուժը բարձրացնել ռազմավարական մակարդակի:

Այս ամենի կողքին «Հայաստան» դաշինքի շուրջն է համախմբւած փորձառու եւ պետական կառավարման համակարգում իր արդիւնաւէտ աշխատանքն ապացուցած մարդուժ, որն ունակ է երկիրը դուրս բերել առկայ սոցիալ-տնտեսական ահագնացող ճգնաժամից, վերստեղծել պետական կառավարման առողջ եւ արդիւնաւէտ համակարգ:

Վերը նշւածին զուգահեռ աղէտալի պատերազմից յետոյ հայկական բանակի հզօրացումը մնում է օրախնդիր եւ պատերազմի կանխման գլխաւոր երաշխիք: Միտումնաւոր հեղինակազրկւած եւ քայքայման եզրին գտնւող բանակը, պարտւողական մտածողութեամբ հասարակութիւնը, պետական համակարգի թուլացած իրավիճակը, ժողովրդի կողմից հեղինակազրկւած եւ մերժւած իշխանութիւնը պարարտ հող են Հայաստանի դէմ նոր պատերազմ սանձազերծելու համար:

Եւ, ի վերջոյ, «Հայաստան» դաշինքն իր ազգային, քաղաքական, հասարակական եւ տնտեսական հեռանկարով արժանանալով համազգային վստահութեան, միակ ունակ ուժն է՝ վերացնելու հայութեանը ջլատող ներկայ բեւեռացումն ու բաժանարար գծերը եւ առաջնորդելու ազգն ու հայրենիքը դէպի համերաշխ, կայուն, կանխատեսելի, անվտանգ, արդար եւ շարունակաբար զարգացող ուժեղ Հայաստան:

 

«Ապառաժ»-ի խմբագրական

17 յունիս, 2021 թ.

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։