Հա

Ազգային

22/06/2021 - 12:00

Ասիկա մեր պարտութիւնը չէ

Այսօր ընդվզած ենք բոլորս ի տես այն անորակելի քաղաքական խեղճութեան, որուն մատնուած կը թուի ըլլալ հայրենի մեր հասարակութեան հսկայ մէկ զանգուածը։ Խեղճութիւնը, որուն կ՚ակնարկեմ, անկարողութիւնն է ոտքի կանգնելու եւ քաղաքացիական ողնայար ցուցաբերելու հաւաքական կեանքի վճռական րոպէներուն։ Անատակութի՛ւնը՝ ինքնիր ճակատագիրը տնօրինելու։ Քաղաքական կամքի ահաւոր բա՛ցը՝ որ ազգերու մահավճիռն իսկ է։

ԿԱՐՕ ԱՐՄԵՆԵԱՆ

 

Այսօր ընդվզած ենք բոլորս ի տես այն անորակելի քաղաքական խեղճութեան, որուն մատնուած կը թուի ըլլալ հայրենի մեր հասարակութեան հսկայ մէկ զանգուածը։ Խեղճութիւնը, որուն կ՚ակնարկեմ, անկարողութիւնն է ոտքի կանգնելու եւ քաղաքացիական ողնայար ցուցաբերելու հաւաքական կեանքի վճռական րոպէներուն։ Անատակութի՛ւնը՝ ինքնիր ճակատագիրը տնօրինելու։ Քաղաքական կամքի ահաւոր բա՛ցը՝ որ ազգերու մահավճիռն իսկ է։ 

Իմ լուսահոգի ընկերոջ՝ Զօրայր Խալափեանի «Ոսկէ Միջինը» վիպակին մէջ դաժան իրապաշտութեամբ տրուած է հոգեբանական անելը այն մարդուն, որուն յանկարծ առիթ կ՚ընծայուի փախուստ տալու Սիպերիոյ կեդրոնացման ճամբարներէն եւ որ ազատութեան մէջ յայտնուելէ ետք իսկ՝ ի վերջոյ կ՚որոշէ ինքն իր կամքով վերադառնալ եւ վերստին յանձնուիլ ճամբարային բռնատիրութեան նախընտրելով կալանքն ու պատիժը՝ ազատութեան մղձաւանջային հարցերը դիմագրաւելու փոխարէն։ 

Յստակ է, որ մեր երկրի հասարակութեան մէկ մեծ շերտը որոշումէ կը խուսափի որոշում առնելու քողին տակ... Ֆրանսացիք այս հոգեվիճակը կը կոչեն adhesion de desespoir։ Մարդոց այս կամազուրկ հոգեվիճակին ապաւինելով է, որ կրցաւ ինքզինք մշտնջենաւորել Խորհրդային Միութիւնը մէկ ամբողջ դար։ Մենք ընդունած էինք ապրիլ կեղծ ազատութեան մէջ եւ այնուամենայնիւ ապրիլ ստեղծագործ կեանքով մինչեւ որ հասնէին ազատութեան օրերը։ 

Ազատութեան օրերը հասան։ Գերութեան հասարակակարգը թաղեց ինքզինք երեսուն տարի առաջ եւ սակայն ահաւասիկ երեսուն տարի ետք մեր հասարակութեան մէկ մեծ շերտը կը մերժէ ինքնիր ինքնութեան տէր կանգնիլ։ Կը մերժէ կերտել իր քաղաքական մտածողութիւնը ազատութեա՛ն նորմերով։ 

ՀՀ հասարակութեան այս շերտը համոզուած կը թուի ըլլալ, որ Փաշինեան այսօր նախընտրուած է տարածաշրջանին տիրութիւն ընելու քաղաքականութեամբ գործող արտաքին ուժերուն կողմէ։ Աւելի վա՛տը։ Ան համոզուած կը թուի, որ պարտութեան կարգավիճա՛կն է իր ապահովութեան հոգեբանական գօտին եւ ոչ՝ ազատութեան կարգավիճակը... Եւ համոզուած է, որ Փաշինեան - իր կերպարով - աւելի ատակ է պարտութեան այդ կարգավիճակը կառավարելու... Չեմ ուզեր այս կերպարը իր իսկական անունով բնորոշել, բայց յստակ է, թէ ի՞նչ կերպար է անիկա եւ թէ քաղաքական կեանքի ինչպիսի՞ նուաստացման մէջ կ՚ուզէ մեզ պահել արտաքին ուժերու մեծապետական համակարգը։ Փաշինեանով կը շարունակուի պարտութեան վարչակարգը Հայաստանի մէջ եւ այդ է, որ կ՚ուզեն գերտէրութիւնները մեր երկրին մէջ, եթէ այդ բանը տրուի իրենց։ Այս խնդրին մէջ, Ռուսաստանն ու Արեւմուտքը նոյն դիրքերէն կը գործեն եւ իւրաքանչիւրը իր յատուկ շահերէն խթանուած։ Անոնք չեն ուզեր Հայաստանի գահին վրայ տեսնել հայ ազգի ազատ կամքը։ Անոնք կ՚ուզեն կամակատար հայը - ի փոխարէն ազատակա՛մ հայուն - եւ զայն խլել մէկզմէկու ձեռքէն...

Եւ անշուշտ պարզ է, թէ վերջին այս ընտրութիւններով ինքզինքին ի՞նչ գնահատական տուած է ՀՀ հասարակութիւնը... Ինքզինք դատապարտած է ինչպիսի՜ ապաշնորհ կարգավիճակի։

1890-ին, հասարակութեան այս իսկ կարգավիճակը ջարդուփշուր ընելու առաքելութեամբ էր, որ հրապարակ իջաւ Հայ Յեղափոխական Դաշնակցութիւնը։ Մարտահրաւէրը նոյնն էր 130 տարի առաջ։ Նոյնն է նաեւ այսօր։ Մեր առաքելութիւնն է ժողովուրդի այս աղաւաղուած տեսակին չնմանիլ։ Մեր առաքելութիւնն է ծառայել մեր ազգին անոր կապուած ըլլալով ամենէն դառն եւ կարծր սիրով եւ ընտրել իր ազատութիւնը իր ներկայ կարգավիճակին փոխարէն։ Ընտրել մանաւանդ իր վաղուա՛ն սերունդներու ազատութիւնը։ Մեր առաքելութիւնն է ընել այնպէս, որ մեր ժողովուրդը անհատ առ անհատ եւ իր ազատ կամքով ընտրէ արժանապատիւ կեանքը եւ բացարձակապէս մերժէ այս պարտադիր ստրկահաճութիւնը։ Եւ կարեւոր չէ, թէ որո՞ւն լկտի դիմագծով կը ներկայանայ ան։ Ան վերջ պիտի գտնէ։

Ներկայիս, իսկական պատերազմը այս ճակատին վրայ է, որ տեղի կ՚ունենայ եւ մեր գործը նոր է, որ կ՚ըսկսի։ Մենք չենք վերջացած։ Մենք չենք վերջանար։ Կը կրկնե՛մ։ Մեր պայմանագրութիւնը մեր ազգին հետ է եւ մեր յանձնառութիւնը ժամանցումի չ՚ենթարկուիր։ Մենք պատուհասն ենք թշնամիին առանց որեւէ սահմանափակիչ եզրերու (with no statute of limitation) եւ - կասկած մի՛ ունենաք - մեր յաղթանակը անպայման պիտի գայ։

 

Յունիս 21, 2021

Ուաշինկթըն

 

Յարակից լուրեր

  • Ազրպէյճանական զինուժի անպատիժ խափանարարութիւնը ՀՀ մայրուղիներուն վրայ․․․ եւ մեր ժողովուրդի համբերութեան բաժակը
    Ազրպէյճանական զինուժի անպատիժ խափանարարութիւնը ՀՀ մայրուղիներուն վրայ․․․ եւ մեր ժողովուրդի համբերութեան բաժակը

    Օգոստոսի 25-ին, Ազրպէյճանական Բանակի միաւորներ փակեցին Կապան-Գորիս ճանապարհը Կարմրաքար-Շուռնուխ հատուածի մօտակայքը։ Օգոստոսի 26-ին, երթեւեկի խափանման այս կամայական ռեժիմը տարածուեցաւ նոյն ճանապարհի Գորիս-Որոտան մատոյցներուն վրայ։ Օգոստոսի 27-ին, ընթացք տալով Մոսկուայի ճնշումներուն, Ազրպէյճանական Զինուժի հրամանատարութիւնը յօժառեցաւ վերցնել երթեւեկի արգելքը եւ առիթ տալ, որ մեքենաներու եւ մարդոց շրջանառութիւնը վերահաստատուի, բայց…

  • Կարմիր գիծերը քաշուած համարեցէք
    Կարմիր գիծերը քաշուած համարեցէք

    Դիտեցէք լուսանկարը, որ հատորներու դառն պերճախօսութեամբ մեզի կ՚ըսէ, թէ ով ենք մենք եւ ով է մեր թշնամին եւ ինչ է այն ուժը, որուն ձեռքերուն մէջ կը գտնուի մեր երկրին ղեկը։ Հոս այլեւս նրբերանգներ չկան։ «Մեղմացուցիչ դէպք յանցանաց»-ներ գոյութիւն չունին, որոնց ետին կարողանաք պահուըտիլ։ Թշնամին է, որ օր-ցերեկով կը ժպրհի ձեր արժանապատւութիւնը քուրջի վերածել եւ դուք ոչինչ ունիք ըսելու։

  • Իլհամ Ալիեւի մղձաւանջը
    Իլհամ Ալիեւի մղձաւանջը

    Այսօր անգամ մը եւս կ՚անդրադառնանք, թէ ինչպիսի՜անասելի նուէր մըն է, որ ըրած է թշնամիին Նիկոլ Փաշինեանի պարտութեան վարչակարգը սնուցանելով Ալիեւի հիւանդկախ երեւակայութիւնը։ Եւ ինչպիսի՜ աններելի առաւելութիւն մը զիջած ենք թշնամիին մենք՝ ՀՀ քաղաքացիներս 44-օրեայ պատերազմի վաղորդայնին լքելով մեր անկախ պետականութեան սանձերը եւ արտօնելով, որ Փաշինեան խլէ այդ սանձերը եւ իր աւերը շարուանակէ գործել անպատիժ։ Եւ ամէն օր աւելի նուաստացնել մեզ եւ մեր երկիրը Ալիեւի լկտի գոռոզամտութեան առջեւ։ 

  • Մեր պայմանագրութիւնը ազգի՛ն հետ է
    Մեր պայմանագրութիւնը ազգի՛ն հետ է

    Ես կը հաւատամ, որ ՀՀ ընտրական դաշտը այսօր արդէն կը գտնուի ինքնաբիւրեղացման յստակ հոլովոյթի մը մէջ։ Կը հաւատամ, որ ՀՀ հասարակութիւնը պիտի կրնայ թօթափել իր վրայէն քաղաքական բարոյալքումի ներկայ վարակը եւ բացարձակապէս մերժէ պարտութեան վարչակարգին կողմէ իրեն պարտադրուող այս ամօթը։ Մեր ժողովուրդը պիտի կրնայ ՈՉ ըսել իր արժանապատւութիւնն ու պատմութիւնը արատաւորող այս թիւրիմացութեան։ Այս ազգը չի կրնար ընդունիլ որեւէ համակեցութիւն մարդու այս տեսակին հետ, որ տարրական քաջութիւնն իսկ չունի իր թշնամին ճանչնալու։ 

  • Անհոգութիւն՝ որ համազօր է ոճիրի
    Անհոգութիւն՝ որ համազօր է ոճիրի

    Օրերէ ի վեր, ամէն հայ ինքզինք կը գտնէ մահացու ապշութեան մը գերիրական ոլորտին մէջ, ուր խախտած կը թուին ըլլալ տիեզերական կշիռները եւ տրամաբանութիւնը՝ ենթակա՛յ այլանդակ շրջադարձերու։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։