Հա

Ազգային

12/07/2021 - 13:20

ՀՅԴ Արցախի 26-րդ Շրջանային Ժողովի յայտարարութիւնը

2021թ. յուլիսի 10-11-ը տեղի ունեցաւ ՀՅԴ Արցախի կազմակերպութեան 26-րդ Շրջանային Ժողովը, որին մասնակցում էին ՀՅԴ Արցախի բոլոր շրջանների պատգամաւորները, շրջանաւարտ ՀՅԴ Արցախի ԿԿ անդամները, ՀՅԴ Հայաստանի ԳՄ, ՀՅԴ Բիւրոյի ներկայացուցիչները, հրաւիրեալ ընկերներ:

2021թ. յուլիսի 10-11-ը տեղի ունեցաւ ՀՅԴ Արցախի կազմակերպութեան 26-րդ Շրջանային Ժողովը, որին մասնակցում էին ՀՅԴ Արցախի բոլոր շրջանների պատգամաւորները, շրջանաւարտ ՀՅԴ Արցախի ԿԿ անդամները, ՀՅԴ Հայաստանի ԳՄ, ՀՅԴ Բիւրոյի ներկայացուցիչները, հրաւիրեալ ընկերներ:

Ժողովը քննարկեց ՀՅԴ Արցախի կառոյցի անցած երկամեայ գործունէութիւնը եւ ճշտեց առաջիկայ երկամեակի ռազմավարական թիրախներն ու ուղեգիծը:

Ժողովը արձանագրեց, որ անցած երկամեակի ընթացքում ՀՅԴ Արցախի կառոյցը դիմագրաւել է քաղաքական եւ ռազմական բարդ պայմաններից թելադրւած մարտահրաւէրներին: Շրջանաւարտ Կենտրոնական կոմիտէն իր երկամեայ գործունէութեան ընթացքում դրսեւորել է սկզբունքային կեցւածք, կայացրել ծանրակշիռ որոշումներ:

Արցախի կրած կորուստների հետեւանքով ստեղծւած ծանր քաղաքական եւ տնտեսական իրավիճակը պարտադրում է ուժերի գերլարում հայ ժողովրդի ազգային-ազատագրական պայքարի այս փուլը յաղթահարելու եւ յաջողութիւններ արձանագրելու համար:

 

Անդրադառնալով առաջիկայ գործունէութեանը՝ ժողովը որոշեց, որ ՀՅԴ Արցախի կազմակերպութիւնն իր գործունէութիւնը ծաւալելու է հետեւեալ ռազմավարական ուղղութիւններով. 

- Յանուն Արցախի բնակչութեան անվտանգութեան երաշխաւորման առաջնորդւելով ԱՀ Սահմանադրութեան դրոյթներով՝ շարունակել պայքարը Արցախի անկախութեան եւ Հայաստանի Հանրապետութեան հետ ցամաքային կապով ճշգրտւած սահմաններով Արցախի տարածքային ամբողջականութեան ապահովման ուղղութեամբ:

- Ակնյայտ է, որ արհեստածին եւ անարդարացի որեւէ ստատուս-քւօ չի կարող կայուն խաղաղութիւն ապահովել եւ անհրաժեշտ է վերականգնել ու նոր թափ հաղորդել ԵԱՀԿ Մինսկի խմբի համանախագահների միջնորդութեամբ իրականացւող բանակցային գործընթացին:

- Հաշւի առնելով հայ-ռուսական ռազմավարական գործընկերութեան եւ փոխվստահութեան կարեւորութիւնը՝ գործուն հիմքերի վրայ դնել Արցախի Հանրապետութեան ու Ռուսաստանի Դաշնութեան քաղաքական ուժերի եւ իշխանութիւնների հետ փոխյարաբերութիւնները:

- Ելնելով Արցախի Հանրապետութեան ժողովրդի ինքնորոշման իրաւունքը յարգելու եւ գոյութենական անվտանգութիւնը երաշխաւորելու հրատապ անհրաժեշտութիւնից՝ Շրջանային Ժողովը պահանջում է ԱՀ նախագահից եւ Ազգային Ժողովից պաշտօնապէս դիմել Հայաստանի Հանրապետութեանը եւ ԵԱՀԿ Մինսկի խմբի համանախագահող երկրներին՝ ճանաչելու Արցախի Հանրապետութեան անկախութիւնը:

- Հրատապ անհրաժեշտութիւն է յետպատերազմեան ֆորս-մաժորային իրավիճակից եւ Արցախի սուբիեկտայնութեան ամրապնդման հրամայականից ելնելով հայեցակարգային մօտեցումների յստակեցումը, հանրային իշխանութեան գործուն եւ արդիւնաւէտ կառուցւածքի ձեւաւորումը՝ ի խնդիր ժողովրդի միասնականութեան եւ համախմբման:

- Արցախի ժողովրդի իրաւունքների պաշտպանութիւնն ու սոցիալական արդարութեան հաստատումը պետական համակարգի առանցքային գործառոյթներից է: Այդ նկատառումով ամէն ջանք պէտք է գործադրել՝ պետական համակարգը զերծ պահելու խմբակային շահերի սպասարկման աղէտաբեր գործելաոճից:

- Պատերազմի հետեւանքով անօթեւան մնացած եւ տեղահանւած բնակչութեան վերադարձն իրենց հայրենի օջախներ եւ նրանց կենցաղային, սոցիալական հարցերի լուծումը պէտք է լինի ոչ միայն պետական համակարգի, այլ նաեւ համահայկական կառոյցների եւ կազմակերպութիւնների ուշադրութեան կենտրոնում:

- ՀՅ Դաշնակցութիւնը պէտք է հնարաւոր բոլոր միջոցներով հակազդի Արցախին տիրանալու նպատակով Ադրբեջանի ծաւալած քաղաքական, քարոզչական եւ բիրտ ուժի գործադրման քաղաքականութեանը՝ զորաշարժի ենթարկելով համահայկական ողջ ներուժը:

Ժողովն իր մտահոգութիւնն է յայտնել նաեւ ՀՀ-ում ստեղծւած կացութեան վերաբերեալ, յատկապէս Սիւնիքի, Վայոց ձորի, Գեղարքունիքի եւ Տաւուշի մարզերում տարածքային ամբողջականութեանը սպառնացող վտանգների առումով:

Հայ Յեղափոխական Դաշնակցութիւնը շարունակելու է իր նւիրական առաքելութիւնը՝ ի խնդիր հայ ժողովրդի ազգային-ազատագրական պայքարի յաղթանակի:

 

ՀՅԴ Արցախի 26-րդ Շրջանային Ժողով,

11 յուլիսի, 2021թ.

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։