Հա

Ազգային

04/09/2021 - 11:40

2 սեպտեմբերը պայքարի շարունակման յուշարար

Կար ժամանակ, երբ 2 Սեպտեմբերը հոմանիշ էր ազգային յաղթանակի եւ հպարտութեան օրուան։

Կար ժամանակ, երբ Արցախի Հանրապետութեան անկախութեան տօնը՝ 2 Սեպտեմբերը յուշարարն էր դէպի Միացեալ Հայաստան մեր համահայկական երթի առաջին հանգրուանին։

ՎԻԳԷՆ ԱՒԱԳԵԱՆ

 

Կար ժամանակ, երբ 2 Սեպտեմբերը հոմանիշ էր ազգային յաղթանակի եւ հպարտութեան օրուան։

Կար ժամանակ, երբ Արցախի Հանրապետութեան անկախութեան տօնը՝ 2 Սեպտեմբերը յուշարարն էր դէպի Միացեալ Հայաստան մեր համահայկական երթի առաջին հանգրուանին։

Կար ժամանակ նաեւ, երբ 2 Սեպտեմբերը խորհրդանիշն էր յաղթական պատերազմներու, յաջող բանակցութիւններու, պետականութեան եւ բանակի կառուցման, վերաբնակեցման աշխատանքներու եւ ընդհանրապէս Արցախ-Հայաստան-Սփիւռք եռամիասնութեան ամրապնդման։

Այսօր, 2021 թուականի 2 Սեպտեմբերը, 30 տարուան մէջ առաջին անգամ ըլլալով, մեզի կը ներկայանայ տարբեր իմաստով ու թելադրականութեամբ։

44 օրուան պատերազմի եւ անոր հետեւած անձնատուական ամօթալի յայտարարութենէն ետք։ Արցախի երեք չորրորդի կորուստէն եւ արցախահայութեան կրած ահաւոր վնասներէն ետք՝ զոհեր, վիրաւորներ, գերիներ, անյայտ կորսուածներ, այսօր շատ բան փոխուած է հայ իրականութեան մէջ։ Լրջօրէն վտանգուած են Արցախի ու Հայաստանի զոյգ պետականութիւններուն անվտանգութիւնն ու պաշտպանողականութիւնը։ Թշնամին հասած է Սիւնիքի եւ Գեղարգունիքի դռները։ Հարցականի տակ առնուած են մեր ժողովուրդին ազգային արժանապատուութիւնը եւ սեփական, ինքնիշխան կեանքի իրաւունքը։

Այս պայմաններուն մէջ, 2 Սեպտեմբերը առաջին հերթին համայն հայութեան կը յիշեցնէ 44 օրեայ պատերազմին հետեւանքները դարմանելու եւ թշնամիին՝ թուրք-ազերիին պետական յանցագործութիւնները դատապարտելու անհրաժեշտութիւնը։

2 Սեպտեմբերը կը յիշեցնէ Արցախի եւ արցախահայութեան մարդկային աղէտները օր առաջ յաղթահարելու հրամայականը՝ անմիջական լուծումներ գտնելով գերիներու, հաշմանդամներու եւ անյայտ կորսուածներու հարցերուն, գաղթականներու եւ պատերազմէն իրենց տուներն ու աշխատանքները կորսնցուցած ընտանիքներու տառապանքին, տնտեսութեան վերականգնումին, ընկերային-բարոյահոգեբանական նոր մթնոլորտի ստեղծման եւ, տակաւին, պետականութեան եւ բանակի վերակառուցման բարդ խնդիրներուն։

2 Սեպտեմբերը նաեւ կը յիշեցնէ Արցախի հարցը միջազգային բոլոր ատեաններուն մօտ մշտարծարծ պահելու կարեւորութիւնը, քաղաքական նպաստաւոր պայմաններու բերումով եւ ազգային ինքնորոշման իրաւունքի հիմքով վերականգնելու համար Արցախի տարածքային ամբողջականութիւնը եւ ստեղծելու համար ցամաքային գործօն ու ապահով կապ՝ մայր Հայաստանի հետ։

Այս բոլորը սովորական յիշեցումներ չեն սակայն, այլ՝ ամէնօրեայ մարտահրաւէրներ են Արցախի ու Հայաստանի պետական վարիչներուն, Հայ Դատի աշխարհասփիւռ մարմիններուն եւ հայ քաղաքական բոլոր ուժերուն համար, եթէ երբեք անոնք կ’ուզեն տէր ու հաւատարիմ մնալ անցնող 30 տարիներուն Արցախի Հանրապետութիւնը իրենց կամքով ու կեանքով կերտած հերոսներու՝ Պետոներու, Շահէններու եւ Արթիւրներու կտակին։

Եթէ երբեք անոնք կ’ուզեն տէր ու հաւատարիմ մնալ Արցախի քառօրեայ պատերազմին հայրենի հողը իրենց արեամբ ջրդեղած նահատակներու պատգամին։

Ու եթէ երբեք անոնք կ’ուզեն արժանի ժառանգորդները ըլլալ 2020-ի 44-օրեայ պատերազմի նուիրեալներուն՝ Վարանգաթաղի հերոսներուն, Շուշիի անձնուէրներուն, Ջրականի քաջարիներուն եւ Հատրութի անձնազոհներու խիզախ պայքարին։

Այսպէս, 2 Սեպտեմբեր 1991-ին սկսած երթը անկասելի է։ Կը շարունակուի, պիտի՛ շարունակուի նոր առաջադրանքներով, պայքարի, դիմադրականութեան եւ տոկունութեան անցեալի դասերով, մերժելով պարտութեան հոգեբանութիւնը եւ գործելով աշխարհաքաղաքական նոր մարտահրաւէրներու համահունչ, մինչեւ որ կարելի է ըլլայ վերականգնել կորսուածը եւ կերտել նորը, աւելի՛ ամուրը՝ իսկապէս ազատ, անկախ ու հպարտ Արցախը, իբրեւ հիմք ու մեկնակէտ վաղուան մեր ամբողջական հզօր հայութեամբ, ամբողջական հզօր Հայաստանին։

 

Յարակից լուրեր

  • Վայրկեան մը յոտնկայս (ՀՅԴ-ի 132-ամեակին առիթով)
    Վայրկեան մը յոտնկայս (ՀՅԴ-ի 132-ամեակին առիթով)

    Հայ Յեղափոխական Դաշնակցութեան կեանքը այսօր ալ կը շարունակէ թաւալիլ նուիրեալներու զոհաբերութեամբ, մտքի եւ բազուկի հսկայական աշխատանքով, տարիներու փորձառութեամբ եւ այն խոր համոզումով, որ վայրկեան մը յոտնկայս լռութիւնը 132 տարուան կեանքի մը բազմամիլիոն վայրկեաններէն տարբեր վայրկեան մըն է, որովհետեւ ան իր մէջ կ՛ամրապնդէ հազարաւոր խոնարհներու քրտինքին ադամանդեայ խտացումը:

  • Փնտռուած յաղթանակը (Մայիս 28-ի առիթով)
    Փնտռուած յաղթանակը (Մայիս 28-ի առիթով)

    Հայաստանի անկախութեան 104-րդ տարեդարձը` մայիս 28-ը երկու տարիէ կը նշենք տօնական մթնոլորտէ շատ հեռու:

  • Յիշենք բոլորը մէկ առ մէկ
    Յիշենք բոլորը մէկ առ մէկ

    Օրացոյցի թերթիկը կը յիշեցնէ, որ այսօր 13 Ապրիլ է. Լիբանանի քաղաքացիական պատերազմի բռնկումին յիշատակման օրն է։

    47 տարի առաջ, այսօրուան պէս, 13 Ապրիլ 1975-ին, Այն Ռըմմէնէի օթոպիւսին տխրահռչակ դէպքով Լիբանան մտաւ քաղաքացիական երկա՜ր պատերազմի մը մէջ, որուն զինուորական ճակատումներուն հանգրուանը աւարտեցաւ Թաէֆէի 1989-ի համաձայնութեամբ, բայց քաղաքական, տնտեսական, քարոզչական-տեղեկատուական ճակատումները կը շարունակուին մինչեւ այսօր, բոլոր ճակատներու վրայ եւ պարբերական սաստկութեամբ։

  • Դասեր քաղելու օրը (Հայկական բանակի հիմնադրութեան 30-ամեակին առիթով)
    Դասեր քաղելու օրը (Հայկական բանակի հիմնադրութեան 30-ամեակին առիթով)

    28 յունուար է այսօր, նորանկախ Հայաստանի Հանրապետութեան բանակի հիմնադրութեան օրը: 30 տարի առաջ, այսօր, ստեղծուեցաւ մեր պետականութեան ամրապնդման, հայ հողին եւ ժողովուրդին ապահովութեան գլխաւոր երաշխիքը հանդիսացող հայկական բանակը:

  • «Մեր ժողովուրդը փաստեց իր տոկալու կամքը եւ զօրութեամբ կրցաւ ապրիլ. 2022-ը այս կամքով է, որ պէտք է դիմաւորենք». Շեշտեց Յ. Բագրատունի «Վանայ ձայն»-ի հետ յատուկ հանդիպումի մը ընթացքին
    «Մեր ժողովուրդը փաստեց իր տոկալու կամքը եւ զօրութեամբ կրցաւ ապրիլ. 2022-ը այս կամքով է, որ պէտք է դիմաւորենք». Շեշտեց Յ. Բագրատունի «Վանայ ձայն»-ի հետ յատուկ հանդիպումի մը ընթացքին

    Հայկական երեսփոխանական պլոքի եւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի անցեալ տարուան աւարտին «Վանայ ձայն»-ի հետ ունեցաւ յատուկ հանդիպում մը, որուն ընթացքին «Վանայ ձայն»-ի տնօրէն Վիգէն Աւագեանի հետ անդրադարձաւ 2021-ի իրադարձութիւններուն: 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։