Հա

Ազգային

06/09/2021 - 11:45

Արամ Ա. կաթողիկոսի պատգամին ընդառաջ

Արամ Ա. կաթողիկոսին պատգամը կիրակի, 5 սեպտեմբեր 2021-ին Պուրճ Համուտի Սրբոց Վարդանանց եկեղեցւոյ մէջ առիթ դարձաւ, որ մեր ուշադրութիւնը անգամ մը եւս սեւեռենք հայ համայնքի իրավիճակին: Լիբանանի մէջ պետութիւնը փլուզման ընթացք որդեգրած է: Տարի մը առաջ, 4 օգոստոս 2020-ի պայթումին իբրեւ հետեւանք կառավարութեան հրաժարումէն ետք, յաջորդական երեք նշանակեալ վարչապետներ չեն յաջողած կառավարական դահլիճ մը կազմել:

ՏԻԳՐԱՆ ՃԻՆՊԱՇԵԱՆ

 

Արամ Ա. կաթողիկոսին պատգամը կիրակի, 5 սեպտեմբեր 2021-ին Պուրճ Համուտի Սրբոց Վարդանանց եկեղեցւոյ մէջ առիթ դարձաւ, որ մեր ուշադրութիւնը անգամ մը եւս սեւեռենք հայ համայնքի իրավիճակին: Լիբանանի մէջ պետութիւնը փլուզման ընթացք որդեգրած է: Տարի մը առաջ, 4 օգոստոս 2020-ի պայթումին իբրեւ հետեւանք կառավարութեան հրաժարումէն ետք, յաջորդական երեք նշանակեալ վարչապետներ չեն յաջողած կառավարական դահլիճ մը կազմել: Պարբերաբար յուսատու լուրեր կը հրապարակուին, կը թուի, որ մօտեցած է հանգուցալուծումը, սակայն ի դերեւ կ՛ելլեն յոյսերը, եւ կը վերադառնանք սկզբնական կէտին: Ի՞նչ է տարակարծութեան էութիւնը. դժուար է յստակօրէն բանաձեւել զայն, մեզի` հասարակ քաղաքացիներուս համար անկարելի: Կարելի է կռահել միայն, որ շրջանային ռազմաքաղաքական տուեալներ, քաղաքական կողմնորոշման հակասութիւններ, համայնքային հակադրութիւններ եւ անձերու հակամարտութիւններ ստեղծած են այնպիսի թնճուկ մը, որ հանրապետութեան նախագահն ու նշանակեալ վարչապետը չեն յաջողիր քակել:

Այս պայմաններուն տակ անիշխանութիւնը կ՛արմատանայ, ազգային արժոյթի արժեզրկումը կը շարունակուի, հիմնական կարիքները կը չքանան շուկայէն կամ աստղաբաշխական գումարներ կ՛արժեն, ելեկտրականութիւնն ու այլ վառելանիւթերը պերճանքի կը վերածուին, դեղերը անգտանելի կը դառնան: Շարքը կրնանք անվերջ երկարել, որովհետեւ ամէն օր ծագող արեւին հետ նոր պակասորդ մը կ՛աւելնայ:

Լիբանանցիին կենցաղը վերածուած է անվերջ արգելարշաւի մը: Աղքատութիւնը եւ ծայրայեղ աղքատութիւնը այլեւս համատարած բնոյթ կը կրեն: Լիբանանցիին պէտք չունինք նկարագրելու ստեղծուած կացութիւնը, քանի որ ամէնօրեայ կեանքը հարազատ թարգմանն է տնտեսական ու ընկերային այն փլուզումին, որուն միաժամանակ ականատես ու ակամայ գործողն է քաղաքացին:

Լիբանանի հայ համայնքը եւս, բոլոր լիբանանցիներուն նման զոհն է ստեղծուած կացութեան: Հայ համայնքին համար, ընտանիքներուն ու անհատներուն մտալլկիչ վիճակին դարման գտնելու անյետաձգելի անհրաժեշտութեան կողքին, կա՛յ նաեւ ազգային կառոյցները պահպանելու հրամայականը: Լիբանանահայ գաղութը ամբողջ սփիւռքին մտաւորական ու կազմակերպական ուժ հայթայթած է: Օժանդակած է Արցախին ու Հայաստանին: Նման դեր կրցած է խաղալ Լիբանանի հայ գաղութը շնորհիւ ազգային, կուսակցական, քաղաքական, ընկերային, մշակութային, մարզական իր կեդրոններուն, միութիւններուն, կազմակերպութիւններուն ու կառոյցներուն: Շնորհիւ մասնաւորաբար որակեալ դպրոցական ցանցին, որ տարիներով հայեցի դաստիարակութիւն ստացած ու ազգային ապրումներով տոգորուած սերունդներ շնորհած է հայութեան:

Ո՛չ, կարելի չէ թոյլ տալ, որ հարիւրամեակի մը ընթացքին կատարուած ներդրումներով կառուցուած այս շէնքը փուլ գայ: Եթէ կարելիութիւն ունենայինք արտերկրային այս փոքրիկ Հայաստանը փոխադրել իրական Հայաստան, զայն յօրինողներու երազանքը կ՛իրականանար. սակայն ափսո՜ս, այդ կարելիութիւնը առայժմ իրականանալի չէ: Կը մնայ ուրեմն, որ ազգովին լծուինք Լիբանանն ու լիբանանահայութիւնը պահպանելու աշխատանքին` յուսալով, որ այս տագնապն ալ, ինչպէս ամէն տագնապ, ի վերջոյ լուծում մը կ՛ունենայ:

Մեծի Տանն Կիլիկիոյ Վեհափառ Հայրապետը Հայաստանի մէջ անցանկալի մօտեցումներու արագ անդրադարձէ մը ետք, լիբանանահայ գաղութը մինակ չձգելու ուժեղ ու գործնական միջոցառումներ հրապարակեց:

Լսենք այս յուսադրիչ պատգամը եւ իւրաքանչիւրս ընենք մեր կարելին ի խնդիր լիբանանահայութեան վերականգնումին:

 

«Ազդակ»

 

Յարակից լուրեր

  • Միացեալ Ազգերու Կազմակերպութեան ներկայացուցիչը Ն.Ս.Օ.Տ.Տ. ԱրաՄ Ա. կաթողիկոսին մօտ
    Միացեալ Ազգերու Կազմակերպութեան ներկայացուցիչը Ն.Ս.Օ.Տ.Տ. ԱրաՄ Ա. կաթողիկոսին մօտ

    Շաբաթ, 23 Հոկտեմբեր 2021-ին, երկար հանդիպում մը տեղի ունեցաւ Ն.Ս.Օ.Տ.Տ. Արամ Ա. Վեհափառ Հայրապետին եւ Լիբանանի մօտ Միացեալ Ազգերու Կազմակերպութեան (Մ.Ա.Կ) ներկայացուցիչ՝ դոկտ. Ճուանայ Որոնեգայի միջեւ:

  • Տեսականէն գործնական. Գործը պէտք է յաջորդէ խօսքին
    Տեսականէն գործնական. Գործը պէտք է յաջորդէ խօսքին

    Նախորդ շաբաթավերջին տեղի ունեցաւ ՀՅԴ Մամլոյ խորհրդաժողովը, որ դաշնակցական մամուլի խմբագիրներու եւ քարոզչական մարզի պատասխանատուներու հերթական հաւաքն էր: Այս խորհրդաժողովը կը գումարուի երեք կամ չորս տարին անգամ մը եւ օրակարգի վրայ կ՛ունենայ, բացի կատարուածին արժեւորումէն, միջազգային ու ազգային մակարդակներու վրայ առկայ կացութեան Դաշնակցութեան քարոզչութիւնը պատշաճեցնելու հարցը:

  • Համազգային գիտաժողով՝ 1921-ին Մոսկուայի եւ Կարսի պայմանագրութեան 100-ամեակին նուիրուած
    Համազգային գիտաժողով՝ 1921-ին Մոսկուայի եւ Կարսի պայմանագրութեան 100-ամեակին նուիրուած

    Երէկ` երեքշաբթի, 19 հոկտեմբեր 2021-ին, Հայաստանի Հանրապետութեան Ազգային Ակադեմիայի նախագահութեան դահլիճին մէջ բացումը կատարուեցաւ համազգային գիտաժողովի մը՝ նուիրուած 1921-ին Մոսկուայի եւ Կարսի պայմանագրութեան 100-ամեակին։ Գիտաժողովը կազմակերպած են ՀՀ Գիտութիւններու Ազգ. Ակադեմիայի պատմութեան ինսթիթիւթը, ՀՀ Գ.Ա.Ա. Արեւելագիտութեան ինսթիթիւթը, Հ.Յ.Դ. Հայ Դատի կեդրոնական խորհուրդը եւ «Արեւմտահայոց հարցերու ուսումնասիրութեան կեդրոն»-ը։

    Գիտաժողովի բացման նիստին, Գերաշնորհ Տ. Շահան Արք. Սարգիսեան կարդաց Ն.Ս.Օ.Տ.Տ. Արամ Ա. Կաթողիկոսի Հայրապետական Օրհնութեան Գիրը։

  • Հայաստանին ու Լիբանանին պէտք է ազգային միասնական ռազմավարութիւն
    Հայաստանին ու Լիբանանին պէտք է ազգային միասնական ռազմավարութիւն

    Կը պատրաստուէի արձագանգել «Ազդակ»-ի 11 հոկտեմբեր 2021-ի թիւին մէջ Միհրան Քիւրտօղլեանի տեսակէտին, երբ տեղի ունեցաւ լիբանանեան տագնապի շղթայական հանգրուաններուն ամէնէն անսպասելին. զինեալ բախումը: Քանի մը ժամ տեւած բախումը պատճառած է 7 զոհ եւ 31 վիրաւոր: Պատճա՞ռը բախումին: 4 օգոստոս 2020-ին Պէյրութի նաւահանգիստի պայթումին դատական հետաքննութեան շուրջ քաղաքական սուր տարակարծութիւն մը, որուն մասնակիցները թքած ունին իշխանութիւններու տարանջատման ու դատական համակարգի անկախութեան վրայ:

  • Ոչ ոքի արտօնուած է խաղալ լիբանանցիին ճակատագիրին հետ
    Ոչ ոքի արտօնուած է խաղալ լիբանանցիին ճակատագիրին հետ

    Տառապանքի եւ տագնապի մէջ խեղդուող լիբանանցին անգամ մը եւս հինգշաբթի օր վճարեց արեան գին, եւ հազիւ յոյսի նշաններով օրօրուող քաղաքացին դարձեալ վերադարձաւ յուսախաբութեան եւ յուսալքումի:

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։