Հա

Ազգային

13/11/2021 - 11:45

«Հայը պէտք է յարատեւ վրէժի տրամաբանութեամբ շւարժւի, եւ մենք պատրաստ ենք առաջնորդելու երիտասարդութեանը». Արշակ Մեսրոբեան

Ներքին դաւաճաններին ու արտաքին թշնամուն պատժելու՝ «Նեմեսիս» գործողութեան կնքահայր Շահան Նաթալիի «յարատեւ վրէժի» պատգամի հետ Դաշնակցութիւնը մի քանի այլ արտայայտութիւններ էլ ունի՝ «յարատեւ պայքար», «յարատեւ կռիւ», եւ հայ ազգը՝ համազգային մակարդակով, այսօր պէտք է հէնց այդ տրամաբանութեամբ շարժւի առաջ՝ Yerkir.am-ի հետ հարցազրոյցում համոզմունք յայտնեց ՀՅԴ Բիւրոյի երիտասարդական գրասենեակի պատասխանատու Արշակ Մեսրոբեանը։

«alikonline.ir» - Ներքին դաւաճաններին ու արտաքին թշնամուն պատժելու՝ «Նեմեսիս» գործողութեան կնքահայր Շահան Նաթալիի «յարատեւ վրէժի» պատգամի հետ Դաշնակցութիւնը մի քանի այլ արտայայտութիւններ էլ ունի՝ «յարատեւ պայքար», «յարատեւ կռիւ», եւ հայ ազգը՝ համազգային մակարդակով, այսօր պէտք է հէնց այդ տրամաբանութեամբ շարժւի առաջ՝ Yerkir.am-ի հետ հարցազրոյցում համոզմունք յայտնեց ՀՅԴ Բիւրոյի երիտասարդական գրասենեակի պատասխանատու Արշակ Մեսրոբեանը։

«Յարատեւ վրէժի տրամաբանութեամբ պէտք է առաջ շարժւել, եթէ ուզում ենք իսկապէս հանգուցալուծման հասնել՝ Հայաստանի Հանրապետութեան եւ Արցախի Հանրապետութեան դէմ ծառացած բոլոր մարտահրաւէրները չէզոքացնելով։ Այդ տրամաբանութեամբ էլ այսօր առաջնորդւում է ՀՅԴ երիտասարդականի համաշխարհային ընտանիքը, որը վերջերս մեկնարկեց Համահայկական երիտասարդական Դիմադրութեան շարժումը աշխարհով մէկ, եւ մենք արդէն իսկ անցել ենք գործողութիւնների իրականացման»,- ասաց նա։

Բացի երկարաժամկէտ պլանաւորումից լինելու են նաեւ կտրուկ գործողութիւններ հայրենիքում եւ Սփիւռքի գաղթօջախներում։

«Թոյլ տւէք չմանրամասնեմ, թէ ինչ նկատի ունեմ՝ ասելով «կտրուկ գործողութիւններ», բայց մենք ունենք մշակւած դիմադրութեան համապարփակ ծրագիր, որն արդէն իսկ իրագործման փուլում է գտնւում։ Դա փուլ առ փուլ է եւ էսկալացիոն միտում ունի, եւ հասնելու է իր պիկին»,- նշեց Արշակ Մեսրոբեանը։

Կտրուկ գործողութիւնների պլանին եւ դիմադրութեան այլ գործողութիւններին կարող են միանալ նաեւ բոլոր այն երիտասարդները, որոնք թէկուզ դաշնակցական չեն, բայց սրտացաւ են երկրի վիճակով։ Սա արւում է թէ՛ անհատ երիտասարդների ներգրաւելով, թէ՛ այլ կազմակերպութիւնների երիտթեւի անդամների հետ համագործակցութեամբ։ Անհատ երիտասարդը ընդամէնը պէտք է դիմի իր տարածքի ՀՅԴ երիտասարդական կառոյցին՝ թէ՛ Հայաստանում, թէ՛ Սփիւռքում։

«Արդէն մենք իր հետ կապի մէջ կը լինենք, եւ հէնց յաջորդ քայլերը ձեռնարկենք՝ իրեն էլ նախապէս տեղեակ կը պահենք։ Ինքն էլ կարող է այս ամբողջ ընթացքում հետեւել սոցիալական հարթակներում մեր պաշտօնական էջերին եւ ունենալ համապատասխան տեղեկատւութիւն»,- ասաց ՀՅԴ Բիւրոյի երիտասարդական գրասենեակի պատասխանատուն։

Արշակ Մեսրոբեանը յիշեցրեց, որ Դիմադրութեան շարժումը մեկնարկելու համար ՀՅԴ Բիւրոյի երիտասարդական գրասենեակը հանդէս եկաւ յայտարարութեամբ՝ զօրաշարժի ենթարկելով բոլոր երիտասարդական, ուսանողական միութիւններին աշխարհով մէկ, եւ այդ յայտարարութեան մէջ տեղ էին գտել արդէն Համահայկական երիտասարդական Դիմադրութեան շարժման պայքարի հիմնական ուղղութիւնները։

«Հիմնական ուղղութիւնները հետեւեալն են. առաջինը՝ պէտք է պայքարենք թուրք-ադրբեջանական հայատեաց քաղաքականութեան՝ ագրեսիայի դէմ, երկրորդը ներքին բնոյթ ունի՝ այսօրւայ իշխանութիւնների դէմ պայքարն է, քանի որ իշխանութիւնը դարձել է սպառնալիք հայկական զոյգ հանրապետութիւնների վերջնական կործանման իմաստով, այնպէս որ, այդ վտանգն էլ մենք պէտք է չէզոքացնենք, երրորդը ուղղութիւնը՝ մենք պէտք է գերտէրութիւններին յստակ պատգամ փոխանցենք, որ իրենք իրենց ծրագրերը չեն կարող իրականացնել Հայաստանի եւ հայութեան ազգային-պետական շահերի հաշւին, մենք ունենք միջոցներ դա փոխանցելու, չորրորդ ուղղութիւնն արդէն ներազգային համախմբմանն է վերաբերում, մենք՝ Դաշնակցութեան համազգային ընտանիքը, պէտք է կարողանայ հայ երիտասարդութեանը համախմբել դիմադրութեան շարժման շուրջ, եւ արդէն իսկ դրա աշխատանքները ընթանում են»,- ասաց Արշակ Մեսրոբեանը։

Մարտունակ բանակ ունենալու համար, նրա համոզմամբ, Նիկոլ Փաշինեանը եւ իր թիմը պէտք է գնան, որովհետեւ նրանք են երկրի վերակազմաւորման հիմնական խոչընդոտը, առհասարակ, պետականութեան հիմնասիւները վերականգնելու իմաստով։

«Ժողովուրդը պէտք է գիտակցի, որ դիմադրութեան հիմնական աղբիւրը հէնց մեր հասարակութիւնն է, քանի որ պարտւած եւ կառավարելի լիդերը ձեռնտու է բոլորին՝ թէ՛ թշնամուն, թէ՛ գերտէրութիւններին, եւ միայն հայ ժողովրդին ձեռնտու չէ։ Իշխանութիւններն իրենց զիջումներն այնպէս են բեմադրում, կարծես ուրիշ տարբերակ չկար, քան զիջելը, բայց այդպէս չէ, ո՛չ, սա մեր իշխանաւորների քաղաքականութիւնն է պարզապէս»,- համոզւած է Արշակ Մեսրոբեանը։

Դիմադրութեան շարժման շրջանակներում՝ նա իրենց մասով վստահեցրեց, որ Դաշնակցութեան երիտասարդականի համաշխարհային ընտանիքը որդեգրել է մի սկզբունք՝ այս շարժման ամբողջ ընթացքում պիտի դրսեւորի առաւելագոյն յանդգնութիւն, եւ այդպէս ի վերջոյ պէտք է հասնի իր նպատակին։

«Մենք պատրաստ ենք առաջնորդելու հայ երիտասարդութեանը, որ հասնենք մեր նպատակին, մենք մեր բեռը, այդ պատասխանատւութիւնը վերցնում ենք մեզ վրայ»,-ասաց Արշակ Մեսրոբեանը։

Իսկ հայ երիտասարդութիւնն ընդհանրապէս, նրա համոզմամբ, պէտք է զգայ, որ այսօր ինքն է, որ պէտք է հայրենիքի ճակատագիրը վերցնի իր ուսերին։


Աննա Բալեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։