Հա

Ազգային

15/11/2021 - 13:00

Նահանջը կը շարունակուի. Մինչեւ ո՞ւր

2020 թուականի աշնանային 44-օրուան պատերազմի աւարտի միամեակին կը սպասուէր նոր յայտարարութեան մը կամ համաձայնագիրի մը ստորագրումը: Այդ մտավախութեամ համար կային հիմնաւոր պատճառներ, բան մը, որ մղեց ընդդիմութիւնը հանրահաւաք կազմակերպելու եւ դիմադրութեան նոր փուլի մը սկզբնաւորումը յայտարարելու: Ընդդիմութեան նախատեսութիւնը սխալ չէր: Թէեւ եռակողմ հանդիպում, նոյնիսկ հեռակապի միջոցով, տեղի չունեցաւ, սակայն հրապարակայնօրէն բացայայտուեցաւ արդէն յայտնապէս գոյացած համաձայնութեան մը բաժիններէն մէկը: 

ՏԻԳՐԱՆ ՃԻՆՊԱՇԵԱՆ

 

2020 թուականի աշնանային 44-օրուան պատերազմի աւարտի միամեակին կը սպասուէր նոր յայտարարութեան մը կամ համաձայնագիրի մը ստորագրումը: Այդ մտավախութեամ համար կային հիմնաւոր պատճառներ, բան մը, որ մղեց ընդդիմութիւնը հանրահաւաք կազմակերպելու եւ դիմադրութեան նոր փուլի մը սկզբնաւորումը յայտարարելու: Ընդդիմութեան նախատեսութիւնը սխալ չէր: Թէեւ եռակողմ հանդիպում, նոյնիսկ հեռակապի միջոցով, տեղի չունեցաւ, սակայն հրապարակայնօրէն բացայայտուեցաւ արդէն յայտնապէս գոյացած համաձայնութեան մը բաժիններէն մէկը: Հարցը կը վերաբերի Գորիս-Կապան մայրուղիի 21 քիլոմեթրնոց հատուածին Ազրպէյճանի կողմէ գրաւման օրինականացման: Ազրպէյճան բարեացակամօրէն թոյլատրած էր, որ հայերը շարունակեն օգտագործել ճանապարհի այդ հատուածը, մինչեւ այլընտրանքային ճանապարհի վերանորոգումն ու ասֆալտապատումը: Իսկ թէ ինչ էր Ազրպէյճանի կողմէ Հայաստանի ինքնիշխան տարածքին վրայ մաքսատուն հաստատելու համար Հայաստանի Հանրապետութեան «թոյլատրութեան» պատրուակը, կ՛իմանանք Նիկոլ Փաշինեանի բացատրութենէն. «Հայաստանի Հանրապետութեան քաղաքացիների ու բեռների նկատմամբ որեւէ սահմանային հսկողութիւն չիրականացնելու գինը եղել է միջանցքային տրամաբանութիւնը, ինչը անընդունելի է մեզ համար»: Կը հասկցուի, որ միջանցք տրամադրելու խնդիրը գործնապէս բանակցութիւններու նիւթ է եւ ճանապարհային գրաւուած հատուածին ազրպէյճանական պատկանելիութեան հարցը` լուծուած: Ո՛չ սահմանազատման կարիք կայ, ո՛չ ալ սահմանագծման:

Ճնշումներու ենթարկուելով, պարտուողական հոգեբանութեամբ կամազրկուած իշխանութիւններու հրաժարումը պաշտպանելէ Հայաստանի իրաւունքը, կամաւոր զիջումը հողային ամբողջականութեան պահպանման պարտաւորութենէն, բնականաբար պիտի հանդիպէր հանրային բուռն հակազդեցութեան: Անգամ մը եւս հանդիսատես դարձանք սուտի եւ խաբկանքի միջոցով հանրային կարծիք ձեւաւորելու մեթոտաբանութեան: Ձեւացնել, որ պայծառ երկնքի տակ ամէն բան ճիշդ ու արդար կ՛ընթանայ, իսկ փոթորիկի պայթումին` սուտ խենթ ձեւանալ:

Սահմանադրութեան յօդուած 132-ի համաձայն, Հանրապետութեան նախագահը կառավարութեան առաջարկով կը կնքէ միջազգային պայմանագիրներ: Ցարդ, Նիկոլ Փաշինեան նախագահին փոխարէն ինք կը կնքէ պատերազմին վերաբերող միջազգային պայմանագիրները, առանց նոյնիսկ կառավարութեան բովէն անցընելու: Չխօսինք դեռ խորհրդարանին ու… ժողովուրդին մասին: Վերջին զարգացումներուն ի տես, պետութեան գլուխը հանդիսացող հանրապետութեան նախագահը, խզելով իր լռութիւնը հանդէս եկաւ ուշագրաւ յայտարարութեամբ մը:

Ահա թէ ինչ կը գրէ նախագահ Արմէն Սարգսեան:

«Որեւէ ոտնձգութեան պարագային համապատասխան պետական մարմինները եւ պաշտօնատար անձեր, սահմանադրութեամբ եւ օրէնքներով նախատեսուած իրենց լիազօրութիւններու շրջագիծին մէջ, պարտաւոր են ձեռնարկելու բոլոր միջոցներուն եւ օգտագործելու բոլոր հնարաւորութիւնները` ապահովելու Հայաստանի Հանրապետութեան պաշտպանութիւնը, անվտանգութիւնը, տարածքային ամբողջականութիւնը եւ անոր սահմաններու անձեռնմխելիութիւնը»:

Եթէ սահմանադրութիւնն ու օրէնքները արտօնէին, նման յայտարարութիւն պիտի եզրակացուէր վարչապետի ու կառավարութեան պաշտօնազրկութեան պահանջով: Իր իրաւասութիւններու սահմանին մէջ մնալով, նախագահը կը բաւարարուի զգուշացումով ու կատարուածի դիպուկ դատապարտումով:

Այս կարեւոր յայտարարութիւնը դժբախտաբար չարժանացաւ բաւարար ուշադրութեան, չմեկնաբանուեցաւ ու ժողովրդային գետնի վրայ` համապատասխան վերաբերումի չարժանացաւ:

Արդար է ակնկալել, որ վերջ կը տրուի պարտուողական զիջումներու շղթային ու ժողովուրդը, զարթնելով իր թմբիրէն, կը վերականգնէ իր ազգային արժանապատուութիւնը:

 

«Ազդակ»

 

Յարակից լուրեր

  • Ամէն փոփոխութիւն անպայման աւելի լաւին չ՛առաջնորդեր
    Ամէն փոփոխութիւն անպայման աւելի լաւին չ՛առաջնորդեր

    Երկար ժամանակէ ի վեր չենք խօսած Լիբանանի մէջ տիրող կացութեան մասին: Ի՞նչ խօսէինք. անվերջ արժեզրկուող դրամանիշի, անոր հետեւանք` գիներու յարատեւ բարձրացման, աղքատութեան շատացման, յոռետեսութեան ու անելանելիութեան զգացումին տարածման պայմաններուն մէջ դժուար էր կատարուածը հասկնալ ու վերլուծումի փորձ կատարել: Պետական ղեկավարներու կողմէ կացութիւնը հակակշռելու նախաձեռնութիւններ ալ չկային, ու բոլորս անկարող ականատեսներ դարձած էինք պետական մեքենային ամլացման:

  • Սփիւռքի ձգտումներուն հակասող որեւէ զիջում աընդունելի է
    Սփիւռքի ձգտումներուն հակասող որեւէ զիջում աընդունելի է

    2022 թուականին «Սփիւռքի տարի» հռչակումը եւ սփիւռքի մէջ բարեփոխումներու ձեռնարկումը մոռացութեան պէտք չէ մատնէ Հայաստանի հետ յարաբերութեան կարեւորութիւնը: Սփիւռքի վերակազմակերպման անհրաժեշտութեան շեշտումը զայն Հայաստանէն անջատելու նպատակ չի հետապնդեր: Ընդհակառակն, կազմակերպ ու գործօն սփիւռքը Հայաստանի համար կրնայ դառնալ կարեւոր յենարան մը` աղբիւր թէ՛ մասնագիտացած մարդուժի եւ թէ՛ տնտեսական ներդրումներու:

  • Հզօր Հայաստան եւ հզօր Սփիւռք
    Հզօր Հայաստան եւ հզօր Սփիւռք

    Մեծի Տանն Կիլիկիոյ Արամ Ա. կաթողիկոս հայրապետական ամանորեան գիրով 2022 տարին կը հռչակէ «Սփիւռքի տարի»:

    1988-ին ծայր առած ղարաբաղեան պահանջատիրական շարժումը, որ հետագային վերածուեցաւ Խորհրդային Միութենէն անջատման ու անկախութեան շարժման եւ հնարաւոր դարձուց Արցախի հայութեան ինքնորոշման ու Լեռնային Ղարաբաղի ինքնավար մարզի տարածքի ընդարձակման, յանգեցաւ հայկական երկու անկախ պետութիւններու ստեղծման:

  • Ժողովուրդի զարթնումը խաբէութենէն
    Ժողովուրդի զարթնումը խաբէութենէն

    Հայաստանի մէջ դէպքերու ընթացքը իրաւացի կը դարձնէ հետեւեալ հարցումը. ինչո՞ւ տեղի ունեցաւ 2018 թուականի իշխանափոխութիւնը, զոր կատարողները յեղափոխութիւն կոչեցին: Նախկին բոլոր իշխանութիւններն ալ անթերի չէին: Քաղաքագիտութեան մէջ ընդունուած է, որ բոլոր նորանկախ պետութիւններուն մէջ, ուր քաղաքացիական հասարակութիւնը չէ ձեւաւորուած տակաւին, ժողովրդավարութեան կիրարկումը կ՛առաջնորդէ քողարկուած սակաւապետութեան, իսկ ազատական տնտեսութիւնը` մենաշնորհներու ստեղծման: 

  • Վերջ պարսաւանքին եւ խարխափումին
    Վերջ պարսաւանքին եւ խարխափումին

    Կիրքերը չեն հանդարտիր Հայաստանի մէջ: Տեղական ինքնակառավարման մարմիններու ընտրութիւնները իրենց երկու փուլերով ցոյց տուին, որ կառավարող մեծամասնութեան դիրքերը զգալիօրէն կը նահանջեն: Կառավարական շրջանակները կեղծ գոհունակութեամբ կը յայտարարեն, որ իրենք յաջողած են ապահովել ժողովրդական ազատ կարծիքի գերակայութիւնը: Սակայն իրենց արարքները ցոյց կու տան, որ ցնցուած են ու մտահոգ:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։