Հա

Ազգային

19/01/2022 - 09:35

«Երբ ՀՅԴ-ն իմացել է 2007թ-ին Թուրքիայի հետ գաղտնի բանակցութիւնների մասին, արտայայտել է իր դիրքորոշումը, այսօրւայ իրողութեան հետ համեմատելն աբսուրդ է, Քոչարեանի օրօք զիջումներ չեն եղել». Սաղաթելեան

Հայաստանի արտաքին քաղաքական օրակարգում դրւած է շատ կարեւոր եւ սկզբունքային հարց եւ ճիշտ է, որ խորհրդարանում բովանդակային քննարկում լինի։ Այս մասին լրագրողների հետ ճեպազրոյցի ընթացքում ասաց ԱԺ փոխխօսնակ, «Հայաստան» խմբակցութեան պատգամաւոր Իշխան Սաղաթելեանը:

«alikonline.ir» - Հայաստանի արտաքին քաղաքական օրակարգում դրւած է շատ կարեւոր եւ սկզբունքային հարց եւ ճիշտ է, որ խորհրդարանում բովանդակային քննարկում լինի։ Այս մասին լրագրողների հետ ճեպազրոյցի ընթացքում ասաց ԱԺ փոխխօսնակ, «Հայաստան» խմբակցութեան պատգամաւոր Իշխան Սաղաթելեանը։ Գրում է Tert.am-ը:

«Այն բոլոր սադրանքները, որ փորձում են գցել ընդդիմութեան գրպանը, թէ ընդդիմութիւնը պատրաստ չէ բովանդակային քննարկման եւ այլն, այդ իրենք պատրաստ չեն։ Այս խորհրդարանին բնորոշ սադրանքները եւ գործընթացները տեղի են ունենում հէնց այդ նպատակով։ Խորհրդարանը պէտք է բովանդակային եւ մանրամասն քննարկի եւ հանրութեանը տեղեկացնի, թէ ինչպիսի ծանր օրակարգի առջեւ է կանգնած մեր երկիրը եւ ժողովուրդը»,- ասաց նա։

Անդրադառնալով  առանց նախապայմանների հայ-թուրքական յարաբերութիւնների կարգաւորման եւ սահմանի բացման վերաբերեալ իրենց դիրքորոշմանը, Սաղաթելեանը նշեց, որ այդ բոլոր գործընթացները պէտք է դիտարկել ընդհանուր փաթեթի մէջ։ «Մենք դէմ չենք այդ յարաբերութիւնների հաստատմանը, բայց խնդիրն այն է, թէ ինչի գնով եւ ինչի հաշւին։ Մենք գտնում ենք, որ այս իշխանութիւնները պատրաստ չեն պաշտպանել ՀՀ շահերը նոյնիսկ ամենամեծ ցանկութեան դէպքում։ Ասում են` նախկինում եւս եղել են բանակցութիւններ Թուրքիայի հետ, փաստն այն է, որ նախկինում Ադրբեջանի հետ էլ են եղել բանակցութիւններ, բայց զիջումներ եւ կորուստ չենք ունեցել։ Թուրքիան նոյն Թուրքիան է, բայց Հայաստանը այլեւս նոյն Հայաստանը չէ պատերազմից յետոյ, հետեւաբար իրենք երկիրը տանում են մի շատ նոր վտանգաւոր ցիկլի մէջ։ Եթէ իրենց բանակցութիւնների արդիւնքում ունեցանք պատերազմ եւ Արցախի կորուստ, այս պարագայում Հայաստանի գոյութիւնն է դրւում հարցականի տակ»,- ասաց նա։

Այն հարցին` ինչու ՀՅԴ-ն արձագանգ չի տւել դեռեւս 2007թ-ին Ռոբերտ Քոչարեանի օրօք տեղի ունեցած Թուրքիայի հետ գաղտնի շփումներին եւ բանակցութիւններին, Սաղաթելեանը շեշտեց. «Անկախ նրանից, Դաշնակցութիւնը եղել է ընդդիմութիւն, թէ մաս է կազմել իշխանութեանը, իր հարցերի եւ տեսակէտների մէջ երբեք փոփոխութիւն չի ունեցել։ Դաշնակցութիւնը ծրագիր, գաղափարախօսութիւն եւ կարմիր գծեր ունեցող կուսակցութիւն է, ի տարբերութիւն իրենց։ Իրենք մինչեւ իշխանութեան գալը, յիշում էք ինչպէս էին արտայայտւում ՀԱՊԿ-ի, ԵԱՏՄ-ի նկատմամբ։ Դաշնակցութիւնը, երբ իմացել է այդ բանակցութիւնների մասին, արտայայտել է իր դիրքորոշումը, մշտապէս եղել ենք նոյն սկզբունքի տէրը։ Ինչ վերաբերւում է այդ գաղտնի բանակցութիւններին, արդէն ասւել է դրա մասին, այդ նամակը մամուլով հրապարակւել է, Նիկոլ Փաշինեանը կարո՞ղ է նման բովանդակութեամբ նամակ ուղարկել Էրոդանին։ Անցած 30 տարիներին մենք ըմբռնումով ենք մօտեցել ՀՀ-ի վարած Թուրքիայի հետ առանց նախապայմանների բանակցութիւնների քաղաքականութեանը։ Այսօրւայ իրողութիւնը համեմատել այն ժամանակւայ հետ աբսուրդ է, փաստն այն է, որ Ռոբերտ Քոչարեանի օրօք այդ զիջումները չեն եղել, յայտնի նամակի մէջ շատ յստակ գրւած է` մեր ժողովուրդների ներկան եւ ապագան չեն կարող որոշել պատմաբանները, սա նաեւ պատմական քայլ է։ Այսօր այս ամէն ինչը շուռ տալ Դաշնակցութեան դէմ,  ճիշտ չէ»։

Սաղաթելեանը նշեց, որ հայ-թուրքական յարաբերութիւնների կարգաւորման հարցը իրենց համար կարմիր գիծ է, եւ շեշտեց, որ այս մասով արմատական գործողութիւններ կը լինեն։ «Մենք ձախողելու ենք այս օրակարգը, այս ամէն ինչը վիժեցնելու ճանապարհը դիմադրողականութիւնն է, ինչպէս 2009 թ-ին եւ դրանից առաջ Սփիւռքը, Հայ Դատի գրասենեակները, ՀՅԴ-ն իր համահայկական կառոյցով եւ ազգային բազմաթիւ ուժեր այս օրակարգը չեն հանդուրժելու, որովհետեւ սա Հայաստանը ծնկի բերելու եւ թուրքացնելու ծրագիր է։ Լաւ ապրելու լոզունգների տակ Հայաստանը տանելու են թուրքացման։ Մեր դիերի արիւնը դեռ չի չորացել, այս մարդիկ խօսում են բժշկական ծառայութիւններ մատուցելու, աւիաընկերութիւններ բացելու մասին։ Լոզունգներով խաբելու են ժողովրդին, որպէսզի այս օրակարգը քայլեցնեն»,-ասաց նա։

Այն հարցին` իրենց դէմ են, թէ՞ կողմ սահմանների դեմարկացիայի եւ դելիմիտացիայի գործընթացին, Սաղաթելեանը նշեց, որ դա կախւած է նրանից, թէ ինչ պայմաններով եւ ինչ իրավիճակում են դրանք տեղի ունենում։ Խօսելով ԱԺ նոր նստաշրջանում իրենց գործողութիւնների մասին՝ Սաղաթելեանը ընդգծեց. «Մենք մշտապէս հանդէս ենք եկել օրէնսդրական նախաձեռնութիւններով, ես իմ ընկերների հետ միասին շուտով օրէնքի նախագիծ ենք դնելու շրջանառութեան մէջ, այն մասին, որ այն պաշտօնեաները, ովքեր կասկածի տակ կը դնեն ՀՀ տարածքային ամբողջականութիւնը, ենթարկւեն պատասխանատւութեան։ Այս աղմուկի մէջ յաճախ կորչում են մեր օրէնսդրական նախաձեռնութիւնները եւ հանրութեան մօտ տպաւորութիւն է, որ մենք եկել ենք այստեղ կռիւ անելու, բայց այս ընթացքում բազմաթիւ նախաձեռնութիւններ ենք բերել եւ դրանք մերժւել են։ Ինչ վերաբերում է դիմադրութեանը, դա մեր թիւ մէկ կարեւոր խնդիրն է, այդ գործընթացը պէտք է կարողանանք կազմակերպել, այո աշխատանքները դանդաղում են, պայքարին նոր թափ տալու խնդիր կայ»։

Հարցին` ինչպէս կը մեկնաբանի առաջին նախագահ Լեւոն Տէր-Պետրոսեանի յայտարարութեանը այն մասին, որ իշխանութիւնը եւ ընդդիմութիւնը պետականամէտ մօտեցումներ չեն ցուցաբերում եւ ձգտում են իշխանութեան, Իշխան Սաղաթելեանը պատասխանեց. «Լեւոն Տէր-Պետրոսեանը շարունակեց մնալ նոյնը՝ նոյնիսկ երկիր աղէտի գնալուց յետոյ։ Երբ ինքը ասում է` Նիկոլ Փաշինեանը պատուհաս է, բայց իր քայլերով նպաստում է, որ նա շարունակի պաշտօնավարել, սա անհասկանալի է։ Ինքը, որ մասնակցում էր ընտրութիւններին, ուրեմն դա եւս իշխանազաւթեան փո՞րձ էր։ Արտախորհրդարանական ուժերը փորձում են համոզել հասարակութեանը, որ ամէն ինչ նոյնն է եւ մենք պայքարում ենք իշխանութեան համար»։ Իշխան Սաղաթելեանը նշեց, կտրուկ քայլերի եւ գործողութիւնների իրենք այս պահի չեն գնում, որովհետեւ համաժողովրդական շարժում չկայ եւ այն պէտք է կազմակերպել։ «Իշխանութիւններից դժգոհողների թիւը բաւականին մեծ է, պէտք է կարողանանք կազմակերպւած դուրս գալ փողոց»։

 

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։