Հա

Ազգային

26/01/2022 - 13:00

«Տպաւորութիւն է՝ Թուրքիայի հետ պայմանաւորւածութիւնները կան, իսկ բանակցութիւնները թատերական ներկայացում են». Կիրօ Մանոյեան

Փաշինեանը որոշել է` պէտք է Թուրքիայի հետ կարգաւորի յարաբերութիւնները, իսկ Թուրքիան անընդհատ յիշեցնում է նախապայմանների գոյութեան մասին. Yerkir.am-ի հետ զրոյցում ասաց ՀՅԴ Բիւրոյի անդամ, Հայ Դատի եւ քաղաքական հարցերի գրասենեակի ղեկավար Կիրօ Մանոյեանը՝ անդրադառնալով Թուրքիայի հետ յարաբերութիւնների կարգաւորման փաշինեանական մօտեցումներին։

«alikonline.ir» - Փաշինեանը որոշել է` պէտք է Թուրքիայի հետ կարգաւորի յարաբերութիւնները, իսկ Թուրքիան անընդհատ յիշեցնում է նախապայմանների գոյութեան մասին. Yerkir.am-ի հետ զրոյցում ասաց ՀՅԴ Բիւրոյի անդամ, Հայ Դատի եւ քաղաքական հարցերի գրասենեակի ղեկավար Կիրօ Մանոյեանը՝ անդրադառնալով Թուրքիայի հետ յարաբերութիւնների կարգաւորման փաշինեանական մօտեցումներին։

«Այս իշխանութիւնները Թուրքիայից լսում են նոյն յայտարարութիւնները, բայց հասկանում մէկ այլ բան։ Փաշինեանը Թուրքիայի հետ սկսել է մի գործընթաց, բայց նպատակը ի՞նչն է, պարզ չէ. չհասկանալու դէպքում՝ անմեղութեան կարելի է վերագրել, բայց կան հիմքեր կարծելու, որ սա դաւաճանական քայլ է, դաւադրութիւն։ Փաշինեանը փորձում է ամբողջական կապիտուլիացիայի ենթարկել մեր երկիրը։ Այս իշխանութիւնը, որ նոյն Թուրքիայի դէմ պատերազմը տանուլ է տւել, ցանկութեան դէպքում էլ ի վիճակի չի լինի պաշտպանել Հայաստանի եւ հայութեան շահերը»,- ասաց բանախօսը։

Յիշեցնենք` Արցախեան վերջին պատերազմի ժամանակ Ն. Փաշինեանը յայտարարում էր, թէ Թուրքիան չի փոխել իր քաղաքականութիւնը, Թուրքիան շարունակում է հայերին ցեղասպանել։ Բայց իրադարձութիւնները այնպէս զարգացան, որ այդ անձնաւորութիւնը ամէն ջանք ու եռանդ չի խնայում Թուրքիայի հետ յարաբերութիւնները կարգաւորելու համար։ Մի բան էլ` առիթը բաց չի թողնում եւս մէկ անգամ ժողովրդին համոզելու, որ Թուրքիայի հետ յարաբերութիւններ հաստատելը պահի հրամայականն է։

Ըստ Կիրօ Մանոյեանի` հիմքեր կան կարծելու, որ որոշակի հարցերի շուրջ այս իշխանութիւնները Թուրքիայի հետ պայմանաւորւածութիւններ են ձեռք բերել, իսկ հիմա թատերական ներկայացում է` ցոյց տալու համար, որ ինչ որ գործընթացներ, այնուամենայնիւ, ընթացքում են։

Յիշեցնենք` Աժ-ում հարց ու պատասխանի ժամանակ Ն. Փաշինեանը յայտարարեց` ինքն է կրում ամբողջ պատասխանատւութիւնը հայ-թուրքական յարաբերութիւնների կարգաւորման ուղղութեամբ։ Հարց է առաջանում` Փաշինեանն այս յայտարարութիւնները անում է, որովհետեւ գիտակցում է, որ այս եւ նման այլ յայտարարութիւններ անելով ինքը պատասխանատւութիւն չկրեց, օրինակ, կապիտուլիացիոն փաստաթղթի ստորագրման, Արցախի 75% ի յանձման դէպքում։

Կիրօ Մանոյեանը այսպէս է մեկնաբանում տւեալ յայտարարութիւնը. եթէ թիւ մէկ պատասխանատուն Փաշինեանն է, ապա թիւ մէկ մեղաւորն ո՞վ է։ Փաշինեանը, ըստ էութեան, փորձում է ամէն ինչ խեղաթիւրելով առաջ գնալ։

Անդրադառնալով` այն լուրերին, որ Թուրքիան Հայաստանի հետ հանդիպումները չի ցանկանում անցկացնել որեւէ երրորդ երկրում, բանախօսը ասաց.

«Ռուսաստանի մասնակցութեամբ Հայաստանի եւ Թուրքիայի բանակցութիւններն ինչ որ մի կէտի կարող են հասնել, որը արդէն կը վնասի Ռուսաստանի շահերը։ Պարզ է` Ռուսաստանը կը նախընտրէր իր հովանաւորութեամբ եւ մասնակցութեամբ այդ բանակցութիւնները ընթանան, որպէսզի կարողանայ վերահսկել։ Ռուսաստանը չի ցանկանում իրադարձութիւնները զարգանան այնպէս, ինչպէս զարգացան 2008-2009 թթ.։ Իհարկէ, եթէ երկու կողմերը առանձին խօսեն, արդիւնաւէտ կը լինի, բայց ներկայ իրավիճակում խօսել արդիւնաւէտութեան մասին, սխալ է։ Երբ Թուրքիան իր ուզածն է ստանալու, երբ կատարւելու է Թուրքիայի նախապայմանները, պարզ է` մեր շահերից չի բխում»,- ասաց բանախօսը։

Հարցին` եթէ իրադարձութիւնները այնպէս զարգացան, որ ներկայիս իշխանութիւնները յանուն Թուրքիայի հետ յարաբերութիւնների կարգաւորման, պատրաստ լինեն ընդունել Թուրքիայի առաջ քաշած նախապայմանները, ապա այդ նախապայմանների ընդունումը ինչպէ՞ս կընկալւի Հայաստանում եւ Սփիւռքում, Կարօ Մանոյեանն ասաց, որ Թուրքիայի նախապայմաններից մէկը` Հայոց Ցեղասպանութեան ճանաչման ու դատապարտման գործընթացը միջազգային օրակարգից հանելն է, եւ Էրդողանի խօսնակը յայտարարեց, որ այս բանակցութիւններն ամերիկահայ համայնքի քաղաքական օրակարգն ի չիք կը դարձնեն։

«Պարզ է, որ հարւած կը հասցւի հայութեան շահերի պաշտպանութեանը, Հայ Դատի յանձնախմբի աշխատանքներին, բայց դա չի նշանակում, որ ամէն ինչ կը տապալւի։ Դժւար կը լինի, քանի որ հայրենի պետութեան իշխանութիւններն ամբողջութեամբ այլ ուղղութեամբ են գնում, բայց դրան էլ հնարաւոր է դիմագրաւել»,- եզրափակեց բանախօսը։

 

Լենա Կարապետեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։