Դաշնակցութիւնը հետեւողական է լինելու, որ Արման Բաբաջանեանը եւ բոլորը, ով կը յանդգնի վիրաւորել Հայ Յեղափոխական Դաշնակցութեանը, ենթարկւեն պատասխանաւութեան օրինականութեան սահմաններում՝ Yerkir.am-ի հետ հարցազրոյցում վստահեցրեց ՀՅԴ Հայաստանի Գերագոյն մարմնի անդամ Արծւիկ Մինասեանը։
«alikonline.ir»- Դաշնակցութիւնը հետեւողական է լինելու, որ Արման Բաբաջանեանը եւ բոլորը, ով կը յանդգնի վիրաւորել Հայ Յեղափոխական Դաշնակցութեանը, ենթարկւեն պատասխանաւութեան օրինականութեան սահմաններում՝ Yerkir.am-ի հետ հարցազրոյցում վստահեցրեց ՀՅԴ Հայաստանի Գերագոյն մարմնի անդամ Արծւիկ Մինասեանը։
«Յանուն հանրապետութեան» կուսակցութեան հիմնադիր, ԱԺ նախկին պատգամաւոր Արման Բաբաջանեանը փորձում է ձգձգել Դաշնակցութիւնից ներողութիւն խնդրելու՝ դատարանի որոշման կատարումը, բայց խուսափել հնարաւոր չի լինելու, քանի որ դատարանը ժամկէտ է սահմանել՝ վճիռն ուժի մէջ մտնելուց յետոյ 5 օր։
Արման Բաբաջանեանը պէտք է հրապարակաւ ներողութիւն խնդրի «Հայ Յեղափոխական Դաշնակցութիւն» կուսակցութիւնից եւ կուսակցութեան Գերագույն մարմնի բոլոր անդամներից՝ զրպարտելու համար․ դատարանը պարտաւորեցրել է նրան՝ իր ֆէյսբուքեան էջով կամ մամուլի ասուլիսում՝ առնւազն 4 հեռուստաընկերութեան մասնակցութեամբ, արտաբերել ներողութեան հետեւեալ տեքստը․ «Յարգելի հետեւորդներ, 06.12.2019թ. ՀՀ Ազգային Ժողովի ամբիոնից «Հայ Յեղափոխական Դաշնակցուիւն» կուսակցութեան վերաբերեալ ունեցած ելոյթումս տեղ գտած վիրաւորական արտայայտութիւնների համար ներողություն եմ խնդրում «Հայ Յեղափոխական Դաշնակցութիւն» կուսակցութիւնից, ինչպէս նաեւ կուսակցութեան Գերագույն մարմնի բոլոր անդամներից»։ Տեսանիւթը պէտք է վերնագրւի «Ներողութիւն եմ խնդրում «Հայ Յեղափոխական Դաշնակցութիւն» կուսակցութիւնից, ինչպէս նաեւ կուսակցութեան Գերագոյն մարմնի բոլոր անդամներից», եւ պահպանւի ֆէյսբուքեան էջում։
Բաբաջանեանն այս վճիռը բողոքարկել է Վերաքննիչ դատարան, որն էլ այն վարոյթ չի ընդունել, եւ Բաբաջանեանն այդ վարոյթ չընդունելու հանգամանքն է բողոքարկել Վճռաբեկ դատարան․ այս պահին դեռ յստակ չէ՝ Վճռաբեկը գործը վարոյթ կընդունի՞, թէ՞ ոչ։ Եթէ Վճռաբեկ դատարանը գործը վարոյթ չընդունի, վճիռը մտնելու է ուժի մէջ եւ այդ պահից արդէն Արման Բաբաջանեանը 5 օր կունենայ ներողութիւն խնդրելու։
«Ակնյայտ է, որ այն թիմը, որը հանդէս է գալիս նման վարքագծով, սպասարկում է ոչ հայանպաստ շահը։ Պատահական չէ, որ տարբեր պատճառներով ու հիմնաւորումներով փորձելով ձգձգել դատարանի վճռի կատարումը, նման մարդիկ նպատակ ունեն նաեւ հանրութեան այն շրջանում, որը հակադաշնակցական կեցւածք է որդեգրել, նրանց հնարաւորութիւն տալ էլ աւելի խորացնելու այս վիրաւորանքներն ու զրպարտութիւնը։ Դրա վառ օրինակներից մէկն էլ օրեր առաջ հերթական զառանցանքն էր, որի վերաբերեալ նոյնպէս մենք իրաւական գործընթաց ենք սկսելու»,-ասաց Արծւիկ Մինասեանը։
ՀՅԴ-ն Արման Բաբաջանեանից պահանջել է ներողութիւնից բացի ընդամենը 1-ական դրամ փոխյատուցում վճարել զրպարտութեան համար, քանի որ, ինչպէս գործով փաստաբան Հայկուհի Սեդրակեանն է նշում, իրենց նպատակը ոչ թէ փոխյատուցում ստանալն է, այլ վիրաւորական ու զրպարտչական արտայայտութիւններ կատարւած լինելու փաստի հաստատումը։
Մինդեռ, Քաղաքացիական օրէնսգրքում բարձրացւել է վիրաւորանքի եւ զրպարտութեան դիմաց փոխյատուցման գումարի շեմը եւ 1 միլիոն դրամից հասցւել 3 միլիոն դրամի։
«Սա մենք աւելի յանցագործութիւն ենք համարում, քան թէ քաղաքացիաիրաւական վէճի առարկայ, թէեւ գործող օրէնսդրութեան շրջանակում զրպարտութիւնը եւ որոշակի ոչ ճշգրիտ տեղեկութիւնը համարւում է քաղաքացիաիրաւական վէճի առարկայ։ Նկատի առնելով, որ խօսքը կարեւորագոյն հարցերից մէկի մասին է, այն է՝ հայրենիքի պաշտպանութեան դիրքերում գտնւող անձանց վարկաբեկելու եւ ծանր վիրաւորանք հասցնելու, ակնյայտ է, որ այստեղ քրէական յանցագործութեան տարրեր են պարունակում»,-ասաց Արծւիկ Մինասեանը։
Նա վստահ է, որ որքան էլ յատուցման շեմը բարձրացնեն՝ պէտք է դուրս գալ զուտ նիւթական մօտեցումից, քանի որ այստեղ խօսքը շատ աւելի խորքային բանի մասին է՝ հայ ժողովրդի դէմ իրականացւող յանցագործութեանն մասին։
ԱՆՆԱ ԲԱԼԵԱՆ
