Արցախի Հանրապետութիւնում խաղաղ բնակչութեան նկատմամբ ադրբեջանական շարունակական սադրանքները ստեղծել են անվտանգութեան եւ հումանիտար իրավիճակի նոր սպառնալիքներ։
Արցախի Հանրապետութիւնում խաղաղ բնակչութեան նկատմամբ ադրբեջանական շարունակական սադրանքները ստեղծել են անվտանգութեան եւ հումանիտար իրավիճակի նոր սպառնալիքներ։
Ադրբեջանի օկուպացիոն զօրքերը դիտաւորութեամբ վնասել են Հայաստանից Արցախի Հանրապետութիւն մտնող գազատարը, խոչընդոտում են գազատարի վերանորոգման աշխատանքներին, տեւական ժամանակ է, ինչ արցախցիներին զրկել են գազից։ Գազատարի չգործելու պատճառով խնդիրներ են առաջացել նաեւ էներգամատակարարման համակարգում։ Բնականոն քաղաքացիական կեանքն Արցախում կաթւածահար վիճակի մէջ է, եւ մարդիկ կանգնած են հումանիտար աղէտի շեմին։
Միաժամանակ, վերջին օրերի ընթացքում յաճախակի եւ պարբերական բնոյթ են ստացել միջին եւ խոշոր տրամաչափի զինատեսակներով Արցախի խաղաղ բնակավայրերի հրետակոծումներն ու սադրիչ գործողութիւնները։
Ակնյայտ է, որ, օգտւելով առիթից, Ադրբեջանը հետեւողականօրէն փորձում է ամէն կերպ հեղինակազրկել ռուսական խաղաղապահ առաքելութիւնը եւ հասնել Արցախի հայաթափմանը։
Կտրուկ մերժելի համարելով Հայաստանի իշխանութիւնների ցուցաբերած անգործութիւնն ադրբեջանական յանցաւոր այս վարքագծի նկատմամբ, անընդունելի համարելով միջազգային հանրութեան կրաւորական կեցւածքը՝ փաստենք, որ համապատասխան արձագանգի բացակայութիւնը քաջալերում է Ադրբեջանի կողմից Արցախի հայաթափմանն ուղղւած քաղաքականութիւնը եւ խրախուսում Արցախի Հանրապետութեան վրայ ռազմաքաղաքական ճնշման սաստկացումը։
ՀՅԴ Հայաստանի Գերագոյն Մարմինը, զօրակցութիւն յայտնելով Արցախի Հանրապետութեանն ու Արցախի ժողովրդին, ուղերձ է յղում՝
1. միջազգային մարդասիրական կազմակերպութիւններին եւ օտարերկրեայ պետութիւններին՝ դատապարտել Ադրբեջանի կողմից իրականացւող էթնիկ զտման քաղաքականութիւնը եւ ճնշում բանեցնել Ադրբեջանի կառավարութեան վրայ՝ վերջ տալու Արցախի խաղաղ բնակչութեան դէմ կիրառւող ահաբեկչական գործելակերպին,
2. Սփիւռքի հայկական կազմակերպութիւններին, մեր հայրենակիցներին, Արցախի բարեկամների «Պրօ Արցախ» միջազգային ցանցի մասնակիցներին, բարի կամքի տէր անձանց՝ դիմել իրենց կառավարութիւններին՝ պահանջելով Ադրբեջանից՝ դադարեցնել խաղաղ բնակչութեան դէմ թշնամական գործողութիւնները։
Այս ծանրագոյն պայմաններում.
1. Հայաստանի կառավարութիւնը պարտաւոր է գործուն քայլեր ձեռնարկել Արցախի բնակչութեան անվտանգութեան երաշխաւորի՝ իր ստանձնած յանձնառութիւնն իրացնելու համար,
2. Ազգային ժողովը պէտք է անյապաղ հրաւիրի Հայաստանի Հանրապետութեան եւ Արցախի Հանրապետութեան Ազգային ժողովների միջխորհրդարանական յանձնաժողովի նիստ՝ Արցախում ստեղծւած մարդասիրական ճգնաժամի եւ ռազմաքաղաքական իրավիճակի յաղթահարման ուղղութեամբ գործնական քայլեր քննարկելու եւ ձեռնարկելու համար։
ՀՅԴ Հայաստանի Գերագոյն մարմին
15.03.2022 թ․
