«Փառք ու պատիւ զոհւած տղաներին։ Այս Եռատօնը մեզ համար խորհրդանշում է այն վճռականութիւնը, որ ունի հայ ժողովուրդը աշխարհով մէկ՝ պաշտպանել իր իրաւունքը։ Եւ այսօր այդ իրաւունքի առաջին գծի վրայ է Արցախը։ Դժւար է ասել երբ եւ ինչպէս, բայց մէկ բանում վստահեցնեմ ձեզ, որ այս օրը մեր վճռականութեան վերկանգնման օրն է, եւ մենք որպէս Հայ Յեղափոխական Դաշնակցութիւն պատրաստ ենք աշխարհով մէկ աշխատել, որպէսզի Արցախը գտնի իր նախկին աշխուժութիւնը, Արցախը մնայ հայկական եւ երբեք չլինի Ադրբեջանի կազմում»,- լրագրողների հետ զրոյցում ասել է ՀՅԴ Բիւրոյի ներկայացուցիչ Յակոբ Տէր-Խաչատուրեանը։
«alikonline.ir» - Այսօր՝ մայիսի 9-ին ՀՅԴ Բիւրոյի անդամները այցելել են Եռաբլուր եւ յարգանքի տուրք մատուցել Շուշիի ազատագրման պայքարում զոհւած հերոսների յիշատակին:
«Փառք ու պատիւ զոհւած տղաներին։ Այս Եռատօնը մեզ համար խորհրդանշում է այն վճռականութիւնը, որ ունի հայ ժողովուրդը աշխարհով մէկ՝ պաշտպանել իր իրաւունքը։ Եւ այսօր այդ իրաւունքի առաջին գծի վրայ է Արցախը։ Դժւար է ասել երբ եւ ինչպէս, բայց մէկ բանում վստահեցնեմ ձեզ, որ այս օրը մեր վճռականութեան վերկանգնման օրն է, եւ մենք որպէս Հայ Յեղափոխական Դաշնակցութիւն պատրաստ ենք աշխարհով մէկ աշխատել, որպէսզի Արցախը գտնի իր նախկին աշխուժութիւնը, Արցախը մնայ հայկական եւ երբեք չլինի Ադրբեջանի կազմում»,- լրագրողների հետ զրոյցում ասել է ՀՅԴ Բիւրոյի ներկայացուցիչ Յակոբ Տէր-Խաչատուրեանը։
Այդ ուղղութեամբ մենք պատրաստ ենք Հայ Դատի աշխատանք տանելու աշխարհով մէկ, նշեց նա, պատրաստ ենք մասնակցելու ազատագրական պայքարին եւ պատրաստ ենք ամէն գնով օժանդակելու, որ Արցախի ժողովուրդը մենակ չզգայ իրեն եւ զգայ ամբողջ հայութեան նեցուկը։
«Այդ ամբողջը պահի հարց է․ հիմնականն այն է, որ դու պէտք է լինես միշտ պատրաստ ամէն զոհողութեան Արցախի սահմանները վերականգնելու համար եւ հայաթափման դէմն առնելու համար, որովհետեւ մենք հաւատում ենք, որ իսկապէս Արցախը մեզ համար աննահանջելի կէտ է եւ որեւէ մէկ ձեւով չենք կարող հաշտւել այս իրողութեան հետ․ սա պարզապէս ճակատամարտի կորուստ է, պատերազմը կը շարունակենք»,-յայտարարեց Յակոբ Տէր-Խաչատուրեանը։
Իր հայկական էութիւնից պարտւած իշխանութիւնը չի կարող բանակցել հայկական շահերի համար, ստահեցրեց նա, սա ակներեւ է, սա յստակ երեւում է այսօր եւ դրա համար է, որ այս իշխանութիւնը պէտք է հեռանայ։
«Հետեւաբար, մեր փափագն է, որ այսպիսի ծանր պարտութիւն կրած իշխանութիւնն ինքն ադրադառնայ իր մեղքի բաժնին եւ անցնցում հեռանայ բեմից, որպէսզի մէկ անգամ եւս խնայւի Հայաստանի եւ Արցախի նորանոր ներքին խլրտումները, բայց, դժբախտաբար, այդպէս չէ ներքին կացութիւնը։ Շատ սխալ եւ անարդար կը ներկայացւի, թէ այս իշխանութիւնը ստացել է մանդատ բանակցութիւնները այս ձեւով վարելու, մինչդեռ իրականութիւնը ճիշտ հակառակն է՝ այս իշխանութիւնը ոչ մի մանդատ չի ստացել յաւելեալ եւ միակողմանի զիջումների տանելու մեր հայրենիքը թէ՛ Հայաստան աշխարհում, եւ թէ՛ Արցախ աշխարհում»,-ասաց Յակոբ Տէր-Խաչատուրեանը։
Իսկ վտանգաւոր երեւոյթները, որ ի յայտ են եկել մանաւանդ այս վերջին շրջանում, նշեց նա, վարչապետի բերանից հնչած այն յայտարարութիւններն են, որ Հայաստանը խուսափում է իր ունեցած պատասխանատւութիւնից Արցախի նկատմամբ, մանաւանդ անվտանգութեան ոլորտում, նոյնիսկ յանդգնելով, հայ-թուրքական յարաբերութիւնների ծիրում, Ցեղապանութեան հետապնդման պատասխանատւութիւնը դնել միայն Սփիւռքի վրայ։
Անդրադառնալով հայ-թուրքական յարաբերութիւններին՝ Տէր-Խաչատուրեանը ասաց, որ իրենք եւս կողմնակից են հայ-թուրքական յարաբերութիւնները նորմալ լինեն, բայց դա չի նշանակում, որ իրենք կողմնակից են հայ-թուրքական հաշտեցման:
«Հաշտեցման գործընթացը կենթադրի թուրքական նախապայմանների ընդունում: Թուրքիան միշտ խանգարել է հայ-թուրքական յարաբերութիւնների կարգաւորման գործընթացին, քանի որ հայկական կողմը նախկինում գնացել է բանակցութիւնների առանց նախապայմանների»,- նշեց Յակոբ Տէր-Խաչատուրեանը:
Ըստ Խաչատուրեանի՝ իշխանութիւնը ունի միտում պառակտելու Սփիւռքը: Ըստ նրա՝ իշխանութիւնները ամէն ինչ անում են՝ Սփիւռքը պառակտելու համար, բայց այս իշխանութիւնների առաջացրած խոչընդոտները որեւէ յաջողութիւն չեն ունենայ: Յաջորդ քայլը, ըստ Տէր-Խաչատուրեանի, պայքարն է յանուն Արցախի, Արցախի ժողովրդի ինքնորոշման իրաւունքի եւ Արցախում՝ Ադրբեջանի վերահսկողութեան տակ անցած տարածքներում հայկական հետքի ոչնչացման յստակ ձեռնարկների կանխարգելումն է:
