Հա

Ազգային

18/07/2022 - 13:30

Իրական հարցերէն շեղելու մաշած գործընթացը

Հայաստանի Հանրապետութեան քաղաքական առօրեան, վերջին տասնօրեակի կլիմայական հեղձուցիչ պայմաններուն տակ, լիքն է այլազան նիւթերով: Նախ յայտարարուեցաւ, որ Էրտողան եւ Փաշինեան ունեցած են հեռախօսազրոյց մը, որուն ընթացքին Փաշինեան շնորհաւորած է Էրտողանը իսլամական Ատհայի տօնին առիթով, իսկ Էրտողան փոխադարձած է եւ շնորհաւորած Փաշինեանը…

ՏԻԳՐԱՆ ՃԻՆՊԱՇԵԱՆ

 

Հայաստանի Հանրապետութեան քաղաքական առօրեան, վերջին տասնօրեակի կլիմայական հեղձուցիչ պայմաններուն տակ, լիքն է այլազան նիւթերով: Նախ յայտարարուեցաւ, որ Էրտողան եւ Փաշինեան ունեցած են հեռախօսազրոյց մը, որուն ընթացքին Փաշինեան շնորհաւորած է Էրտողանը իսլամական Ատհայի տօնին առիթով, իսկ Էրտողան փոխադարձած է եւ շնորհաւորած Փաշինեանը… երկու շաբաթ վերջ զուգադիպող Վարդավառի տօնին առիթով: Էրտողանի քրիստոնէական տօներուն այսքան մանրամասն ծանօթ ըլլալուն տեղեակ չէինք. Յիսուս Քրիստոսի Պայծառակերպութեան տօնին մասին թերեւս Փաշինեանն ալ տեղեակ չէր: Էրտողան յիշեցուցած է ուրեմն իրեն անոր մօտակայ թուականին մասին: Ուրիշ ինչի՞ մասին խօսած են երկու ղեկավարները` իրենք գիտեն:

Յիսուսի Պայծառակերպութեան մասին յիշեցումը հաւանաբար պատճառ դարձած է, որ Նիկոլ Փաշինեան նախարարներու խորհուրդի նիստին համամտութիւն յայտնէ Յիսուսի արձանը Հատիս լերան գագաթին կանգնեցնելու Ծառուկեանի նախաձեռնութեան: Անտեսելով հայ եկեղեցւոյ դիրքորոշումը եւ առանց նախնական ուսումնասիրութեան, Նիկոլ Փաշինեան անակնկալի մատնած է բոլորը, համաձայն իր սովորութեան միանձնեայ որոշելով կրօնական ու հասարակական հնչեղութեամբ հարցի մը ճակատագիրը:

Կը կարծէինք, որ Հայաստանի դիմագրաւած քաղաքական, տնտեսական եւ ընկերային հարցերէն շեղեցնելով, հանրային կարծիքին խօսակցութեան ու քննարկումի նիւթ հայթայթելու արդէն սովորական դարձած հնարքը այսքանով կը բաւարարուի, սակայն չարաչար սխալած էինք: Հայաստանի եւ Ազրպէյճանի արտաքին գործոց նախարարներու Թիֆլիսի մէջ առաջին առանց միջնորդի հանդիպման նախօրեակին, Հայաստան այցելեց Ամերիկայի Միացեալ Նահանգներու Կեդրոնական հետախուզական գործակալութեան (Սի. Այ. Էյ.) տնօրէն Ուիլեամ Պըրնզը. միայն քանի մը ժամ, անհրաժեշտ ցուցմունքները անձամբ փոխանցելու համար: Ինչպէ՞ս շեղել ուշադրութիւնը այս կարեւոր եղելութիւններէն. Փարիզէն ժամանած Մուրատ Փափազեանի արտաքսումը Երեւանի Զուարթնոց օդակայանէն բնականաբար դարձաւ յաջորդող օրերու քննարկումի գլխաւոր նիւթը:

Այս բոլորին վրայ եկաւ աւելնալու արտադրիչ Արմէն Գրիգորեանի եղերական մահը դատարանին մէջ: Արմէն Գրիգորեան ձերբակալուած էր իր ընդդիմադիր գործունէութեան բերումով:

Վերջապէս անդրադառնանք նաեւ ընդդիմադիր 33 պատգամաւորներու (երեսփոխաններու) իրենց պատգամաւորական հանգամանքէն (Մանտայէն) զրկելու սպառնալիքը: Ազգային ժողովի խորհուրդը պէտք է գումարուէր այս առաջարկի նախագիծը, որ հրապարակուած էր, հաստատելու եւ զայն յղելու համար Սահմանադրական դատարանին, որ իրաւասու է նման որոշում կայացնելու համար: Վախնալով ժխտական արձագանգներէ, յատկապէս արտաքին, վերջին պահուն խորհրդարանի ղեկավարութիւնը յետաձգեց հարցին քննութիւնը, որմէ ետք Ազգային ժողովը մտաւ արձակուրդի մէջ:

Վերադառնանք Մուրատ Փափազեանի անցանկալի անձնաւորութիւն (փերսոնա նոն կրաթա) հռչակելու որոշման: Ոչ յայտնի է որոշման պատճառը, ո՛չ ալ` որոշողը: Կամայական որոշումով մը, հայ մարդու մը կ՛արգիլուի մուտք գործել իր հայրենիքը: Ենթակային ներկայացուցչական հանգամանքէն առաջ, արտասահմանի մէջ ապրող ոեւէ մարդ սոսկ օտարերկրացի համարելու այս կրկնուող երեւոյթը աղէտ է ազգային տեսակէտէ: Եթէ չընդունինք, որ իր ստուար մեծամասնութեամբ տարաբախտօրէն հայրենիքէն դուրս ապրող հայութեան համար Հայաստանը հայրենիք է, կը նշանակէ, որ չենք ընդունիր աշխարհացրիւ հայ ազգի մը գոյութիւնը: Ազգը տարտղնելու, անոր մարմնին մէջ որոմ ցանելու այս խոտելի մօտեցումը մերժելի է ըստ ամենայնի: Ժամանակն է, եւ արդէն ուշ է, սրբագրելու երկպառակութիւն ստեղծող ազգակործան գործելակերպը: Անյապա՛ղ:

 

«Ազդակ»

 

Յարակից լուրեր

  • Խաղաղութեան ժամանակաշրջանը աւարտած է
    Խաղաղութեան ժամանակաշրջանը աւարտած է

    2 դեկտեմբեր 2022-ին Հայաստանի Ազգային ժողովը գումարեց արտահերթ նիստ մը: Արտահերթ նիստը հրաւիրուած էր Ազգային ժողովի ընդդիմադիր «Հայաստան» խմբակցութեան կողմէ, քննելու ու հաստատելու համար խմբակցութեան կողմէ առաջարկուող յայտարարութիւն մը, որ կը պատասխանէր Ազրպէյճանի խորհրդարանի վերջերս տարածած յայտարարութեան, որ արցախեան տագնապին ու Հայաստանի հետ դիմառնութեան վերաբերեալ կը պարունակէր խեղաթիւրումներ եւ սխալ վերագրումներ:

  • Կենսունակ համայնքի մը սպասումով
    Կենսունակ համայնքի մը սպասումով

    7, 8 եւ 9 դեկտեմբեր 2022-ին Անթիլիասի մայրավանքին մէջ պիտի գումարուի Մեծի Տանն Կիլիկիոյ կաթողիկոսութեան Ազգային ընդհանուր ժողովը: Ժողովին կը մասնակցին կաթողիկոսութեան 13 թեմերէն եւ մէկ հոգեւոր հովուութենէ 105 պատգամաւորներ, որոնց մէկ եօթներորդը (15 պատգամաւոր) եկեղեցականներ են, իսկ վեց եօթներորդը (90 պատգամաւոր)` աշխարհականներ: Կեդրոնական վարչութեան կրօնական եւ քաղաքական ժողովներու անդամներու եւ հրաւիրեալներու յաւելումով, Ընդհանուր ժողովի մասնակիցներուն թիւը կը հասնի շուրջ 130-ի: 

  • Լիբանանի անկախութեան տօնին առիթով
    Լիբանանի անկախութեան տօնին առիթով

    Վաղը, 22 նոյեմբեր 2022-ին կը լրանայ Լիբանանի անկախութեան հռչակման 79-ամեակը: Արդարեւ, 22 նոյեմբեր 1943-ին Լիբանանը թօթափեց Համաշխարհային Ա. պատերազմէն ետք հաստատուած ֆրանսական հոգատարութիւնը եւ դարձաւ ինքնիշխան երկիր: Արդէն գոյութիւն ունէին խորհրդարանի կառավարութիւն, ինչպէս նաեւ հանրապետութեան նախագահ, որոնք ֆրանսական պետութեան կողմէ նշանակուած բարձր յանձնակատարի մը հսկողութեան տակ` կ՛իրականացնէին երկրին կառավարումը: Ներքին ինքնավարութեան այս տարազին նպատակը երկրի ժողովուրդը վարժեցնել էր պետական իշխանութեան կիրարկման:

  • Մտորումներ` Հայ Յեղափոխական Դաշնակցութեան մասին
    Մտորումներ` Հայ Յեղափոխական Դաշնակցութեան մասին

    Հայ Յեղափոխական Դաշնակցութեան 132-ամեակի նշումներու սեմին, իր գործունէութեան վերաբերող հարցականներու ու երբեմն հնչող մեղադրանքներու լոյսին տակ, թուղթին կը յանձնեմ կարգ մը մտածումներ, աւելի ճիշդ` մտորումներ:

  • Թող հնչեն յաղթանակի զանգերը
    Թող հնչեն յաղթանակի զանգերը

    Երբ կը կայանար Ստեփանակերտի պահանջատիրական հանրահաւաքը, Համաշխարհային հայկական գագաթնաժողովը ընթացքի մէջ էր: Ժողովը լսե՞ց արդեօք Արցախէն հնչող ահազանգային ճիչը: Հաւանաբար` ոչ, որովհետեւ այդ մէկ ժամնոց ազատ զրոյցը, որուն նախատեսուած էր, ի միջի այլոց, որ մասնակցի նաեւ Արցախի ներկայացուցիչը, վերջնական օրակարգին վրայ փոխարինուած էր լոկ Հայաստանի արտաքին գործոց նախարարի հետ հանդիպումով մը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։