Հա

Ազգային

05/09/2022 - 12:00

Արժանավայել խաղաղութեան պայմանը

Ամառնային արձակուրդը, որուն բարձրակէտը օգոստոս ամիսն է, խաղաղ ու արձակուրդային չանցաւ: Արցախի մէջ նոր տարածքներ յանձնուեցան Ազրպէյճանին, ու քաղաքական պայքարի ասպարէզին մէջ նոր երեւոյթ մը յայտնուեցաւ:

ՏԻԳՐԱՆ ՃԻՆՊԱՇԵԱՆ

 

Ամառնային արձակուրդը, որուն բարձրակէտը օգոստոս ամիսն է, խաղաղ ու արձակուրդային չանցաւ: Արցախի մէջ նոր տարածքներ յանձնուեցան Ազրպէյճանին, ու քաղաքական պայքարի ասպարէզին մէջ նոր երեւոյթ մը յայտնուեցաւ:

2018-ի իշխանափոխութեան իսկական պատճառը, որ այժմ արդէն արեւու լոյսին պէս յստակ կը շողայ, Արցախէն հրաժարելու ձգտումն էր: Սակայն ապազգային, աւելին` ազգային դաւաճանութեան համազօր առաջադրանքով կարելի չէր իշխանափոխութեան պայքար մղել, նպատակը քողարկուեցաւ աւելի անմեղ, ժողովուրդին սրտին խօսող, աւելի արդար, ընկերային ու տնտեսական հաւասարութիւն խոստացող լոզունգով: Հնարուեցաւ վարչարար-իշխանաւորներու դասակարգ մը, որ իբր թէ անցնող 20 տարիներուն ընթացքին կողոպտած էր երկիրը ու իշխանութիւնը օգտագործած իր սեփական շահին համար: Անշուշտ նախորդ իշխանութիւնները, երկրորդ եւ երրորդ նախագահներու յաջորդական տասնամեակներուն ընթացքին, կարելի չէ կատարեալ ու անսխալական համարել: Երբե՛ք: Սակայն ինչպէս ֆրանսական առածը կ՛ըսէ` «Չափազանցութիւնն է, որ կը սպաննէ». չափազանցելով եւ ամէն երեւոյթ բացարձակացնելով 2018-ի կազմակերպիչները հասան իրենց նպատակին, ծախեցին Արցախը եւ սպաննեցին պետութիւնը:

Պետութեան հիմքը հանդիսացող փաստաթուղթը Հայաստանի, Խորհրդային Հանրապետութեան Գերագոյն խորհուրդին կողմէ մշակուած «Հայաստանի անկախութեան մասին հռչակագիրն է»: Տարեդարձը` 23 օգոստոս: Եւ ահա, այս տարեդարձին առիթով, ատուած ու ըստ ոմանց յաւիտեան մերժուած «նախկիններէն» անկախ անձնաւորութիւն մը, Հայաստանի Հանրապետութեան պարզ քաղաքացի Էտկար Ղազարեանը հրապարակ ելաւ յիշեցնելու համար անկախութեան հռչակագրի մոռցուած սկզբունքները: Էտկար Ղազարեանը տնտեսագէտ է, կառավարման միջոցներու մասնագէտ: Համալսարանի դասախօս. նախապէս վարած է, ընդմիջումներով, զանազան պաշտօններ. եղած է մարզպետ, դեսպան ու Սահմանադրական դատարանի աշխատակազմի ղեկավար: Կրթուած ու փորձառութեամբ օժտուած անձնաւորութիւն է: Դատելու, օրէնք կիրարկելու, բանակցելու ու ղեկավարելու ատակ անձնաւորութիւն է:

Յիշելով, որ իր հայրը եղած էր անկախութեան հռչակագիրը մշակող Գերագոյն խորհուրդի անդամ, Էտկար Ղազարեան յղացաւ այդ Գերագոյն խորհուրդի անդամներով խորհրդանշական նիստ մը կայացնել, Գերագոյն խորհուրդի ժողովասրահին մէջ: Ժողովասրահը չտրամադրուեցաւ փուճ պատճառաբանութեամբ: Նիստը փոխադրուեցաւ մօտակայ պանդոկի մը սրահը, որուն, սակայն զովացման սարքերը խափանուեցան յանկարծ: Վերջապէս նիստը տեղի ունեցաւ ուրիշ պանդոկի մը սրահին մէջ:

Նոյն օրը, երեկոյեան, Էտկար Ղազարեան հրաւիրած էր հանրահաւաքի, Հանրապետութեան հրապարակին վրայ: Սա եւս մերժուեցաւ Երեւանի քաղաքապետարանին կողմէ: Էտկար Ղազարեան դիմեց վարչական դատարան ու շահեցաւ դատը: Հանրահաւաքը տեղի ունեցաւ կառավարութեան շէնքին հանդիպակաց կողմը գտնուող եւ հրապարակը եզերող նեղ տարածքին մէջ: Հրապարակը բոլոր կողմերէն պաշարուած էր հարիւրաւոր ոստիկաններու կողմէ, որոնք արգելք հանդիսացան մասնակիցներուն հրապարակին վրայ մէկտեղումին:

Էտկար Ղազարեանը ո՛չ հիներէն մէկն է, ո՛չ ալ նորերէն: Ո՛չ սեւ է, ո՛չ ալ ճերմակ: Մեծահարուստ չէ, «օլիկարք» չէ, ազգին ու հայրենիքին ճակատագրով մտահոգ յանձնառու քաղաքացի է, որ, ի տես պետութեան քայքայման առաջնորդող ընթացքին, նախաձեռնութեան մը դիմած է, զգաստացնելու համար վերահաս վտանգը անգիտանալ ձեւացնող հանրութիւն մը, որ, թէեւ դժգոհ է տիրող վիճակէն, բայց օրինակութիւն խաղալով, չ՛ուզեր մասնակցիլ Նիկոլ Փաշինեանի հրաժարականը պահանջող միջոցառումներուն: Էտկար Ղազարեանի հրաւիրած հանրահաւաքը բազմամարդ չէր, սակայն բարացուցական էր` ազնիւ, հայրենասէր, մտահոգ քաղաքացիներու ապրումները բացայայտելու առումով:

Էտկար Ղազարեան դիմեց վարչապետին, որ գայ ու խօսի ժողովուրդին, ինչպէս մօտաւոր անցեալին կը սիրէր կրկնել: Ապա ուզեց ներկայանալ անոր ու հաւաքուած ժողովուրդին անունով հրաժարականը պահանջել: Բնականաբար, ինչպէս դժուար չէր գուշակել, ոչ մէկը տեղի ունեցաւ, ոչ ալ` միւսը: Վարչապետը լուռ մնաց:

Օգոստոսեան վերջին, թերեւս ալ` ոչ վերջնագոյն, իրողութիւնը բանակային ծառայութենէն խուսափելու համար 24.000.000 դրամ (շուրջ 60.000 ամերիկեան տոլար) փրկագին վճարելու առաջարկի նախագիծն է: Բանակը տկարացնող, ընկերային տեսակէտէն անարդար, բանակային ծառայութիւնը միայն նման միջոցներէ զուրկ խաւին վերապահող նախագիծը պէտք է քննուի Ազգային ժողովի սեպտեմբերեան նստաշրջանին:

«Դիմադրութիւն» շարժումը հրաւիրած էր մեծ հանրահաւաքի 2 սեպտեմբերին, Արցախի Հանրապետութեան հռչակման տարեդարձին առիթով: Հանրահաւաքը տեղի ունեցաւ նաեւ Ստեփանակերտի մէջ, ինչպէս նաեւ սփիւռքի զանազան համայնքներուն: Փաշինեանի հրաժարականի պահանջով հանրահաւաքները կը միտին կոտրել շղթայական զիջումներու ընթացքը ու պարտուողականութեան դէմ դիմադրութիւն կազմակերպել: Իշխանութիւնը միջոց է, ոչ` նպատակ: Ով կրնայ` թող գայ, միակ պայմանը արժանավայել խաղաղութեան համար պայքարելու պատրաստակամութիւնն է:

 

«Ազդակ»

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։