Հա

Ազգային

12/09/2022 - 11:40

Նոր նստաշրջան ու նորոգուած մարտավարութիւն

Երկուշաբթի, 12 սեպտեմբեր 2022-ին, Հայաստանի Հանրապետութեան Ազգային ժողովը կը վերադառնայ արձակուրդէն եւ կը գումարէ աշնանային նստաշրջանի առաջին եռօրեան: Ընդդիմութեան մաս կազմող երկու խմբաւորումները` «Հայաստան» եւ «Պատիւ ունեմ» դաշինքները յայտարարեցին, որ պիտի շարունակեն չմասնակցիլ նստաշրջանի ժողովներուն: Պատճառաբանութիւնը միեւնոյնն է. Ազգային ժողովը կը շարունակէ անտեսել Հայաստանի եւ Արցախի համար կենսական նշանակութիւն ունեցող օրակարգերը եւ կը զբաղի նուազ կարեւոր, ընթացիկ հարցերով: 

ՏԻԳՐԱՆ ՃԻՆՊԱՇԵԱՆ

 

Երկուշաբթի, 12 սեպտեմբեր 2022-ին, Հայաստանի Հանրապետութեան Ազգային ժողովը կը վերադառնայ արձակուրդէն եւ կը գումարէ աշնանային նստաշրջանի առաջին եռօրեան: Ընդդիմութեան մաս կազմող երկու խմբաւորումները` «Հայաստան» եւ «Պատիւ ունեմ» դաշինքները յայտարարեցին, որ պիտի շարունակեն չմասնակցիլ նստաշրջանի ժողովներուն: Պատճառաբանութիւնը միեւնոյնն է. Ազգային ժողովը կը շարունակէ անտեսել Հայաստանի եւ Արցախի համար կենսական նշանակութիւն ունեցող օրակարգերը եւ կը զբաղի նուազ կարեւոր, ընթացիկ հարցերով: Ստեղծուած դրութեան բերումով, նախապատուութիւնը պէտք է տրուէր Արցախի անվտանգութեան ու ապագայ կարգավիճակին, Հայաստանի սահմաններու պահպանումին, Ազրպէյճանի եւ Թուրքիոյ հետ բանակցութիւններուն առնչուած խնդիրներուն եւ նմանատիպ այլ հարցերու: Ընդդիմութիւնը պատրաստ է մասնակցելու խորհրդարանի աշխատանքներուն, եթէ վերջինը իր օրակարգին վրայ ունենայ վերոյիշեալ հարցերը: Խորհրդարանական կառավարում ունեցող պետութեան մը մէջ կարելի չէ գոյութենական կարեւորութեամբ այս հարցերը ձգել գործադիր իշխանութեան տնօրինման: Ներկայ դրութեամբ, խորհրդարանը վերածուած է կառավարութեան լծորդի, բան մը, որ կը հակասէ Սահմանադրութեան տառին եւ ոգիին:

Ապահովելու համար կենսական օրակարգերու քննարկումն ու Հայաստանի եւ Արցախի ապագային վերաբերող հարցերու բարձրաձայնումը, ընդդիմութիւնը կը կազմակերպէ, զուգահեռաբար Ազգային ժողովի գումարումներուն, հանրային լսումներ: Լսումներուն պէտք է մասնակցին քաղաքացիական հասարակութեան եւ մտաւորականութեան ներկայացուցիչներ: Այժմէական օրակարգը վարուող բանակցութիւններն են, Արցախի ապահովութեան եւ կարգավիճակի հարցերը, ինչպէս նաեւ ընկերային (սոցիալական) բեւեռացման  ահագնացող վիճակը:

Զուգահեռ այս անպաշտօն խորհրդարանէն պիտի յառաջանա՞յ արդեօք այնքան սպասուած իշխանափոխութիւնը: Քննարկուած հարցերու սրութիւնը, փորձառու ու պատասխանատու անձնաւորութիւններու կողմէ կատարուած վերլուծումներն ու մատնանշումները տրամաբանօրէն պէտք է մղեն հանրութեան լայն զանգուածներու համախմբումը ընդդիմութեան կողքին: Եթէ համախմբումը կարելի դարձաւ, շնորհիւ նաեւ մարզերուն մէջ կատարուած արթնութեան աշխատանքներուն, հանրային քննարկումներու այս նոր հարթակը կը վերածուի ստուերային խորհրդարանի, որ կրնայ ծնունդ տալ ստուերային կառավարութեան մը, պատրաստ` փոխարինելու գործող իշխանութիւնը: Այս ձեւով, հանրային ընտրութեամբ յայտնի կը դառնայ ընդդիմութեան կողմէ առաջադրելի վարչապետի թեկնածուին ինքնութիւնը: Վարչապետի թեկնածուի մը առաջադրանքը անհրաժեշտ է, ըստ Սահմանադրութեան, կառավարութեան անվստահութիւն յայտնելու համար:

Կառավարութեան անվստահութիւն յայտնելու միջոցով նոր գործադիր իշխանութեան կազմութիւնը նպատակ չէ խորհրդարանական ընդդիմութեան համար: Ազգային անվտանգութեան եւ պետութեան պահպանման նախապատուութիւններով առաջնորդուող կառավարութեան մը կազմութիւնը անհրաժեշտ է կասեցնելու համար պատերազմի պարտութեան հետեւանքով զիջումներու շարունակական գործընթացը: Իշխանութեան պէտք է գան, անկախաբար իրենց կուսակցական պատկանելիութենէն, քաղաքական ու վարչական աշխատանքներու փորձառութեամբ օժտուած, ազգին ու հայրենիքին ազատ ու անկախ պահպանման, անոր հողային ամբողջականութեան տեսլական ունեցող անձնաւորութիւններ: Կառավարութիւնը պիտի գործէ համախումբ, հաւաքական պատասխանատուութեան սկզբունքով: Նման իշխանութիւն մըն է միայն, որ կրնայ յաջողիլ միաւորել Հայաստանի պառակտուած ժողովուրդը ազգային տեսլականի շուրջ, վերականգնել պետութեան ապագային նկատմամբ վստահութիւնը, սփիւռքը զօրաշարժի ենթարկել, բոլորին ներշնչել պայքարելու ու երկիրը փրկելու անժամանցելիութիւնը:

Պրիւքսելի բանակցութիւններէն ետք Նիկոլ Փաշինեան յայտարարեց, որ «խաղաղութեան պայմանագիրը» Ազրպէյճանի հետ կրնայ կնքուիլ մինչեւ տարեվերջ: Եւրոպական Միութեան խորհուրդի նախագահ Շարլ Միշելի միջնորդութեամբ կայացած բանակցութիւնները կոշտ քննադատութեան ենթարկուեցան Մոսկուայի կողմէ: Մեղմելու համար Մոսկուայի դժգոհութիւնը, Վլատիվոսթոքի մէջ գումարուած «Բազմաբեւեռ աշխարհի ճանապարհին» թեմայով Արեւելեան 7-րդ համաժողովին մասնակցելու առիթով նախագահ Փութինի հետ հանդիպման արտասանած տասը վայրկեան տեւողութեամբ ելոյթին ընթացքին, Նիկոլ Փաշինեան ինը անգամ շնորհակալութիւն յայտնեց Ռուսիոյ նախագահին: Նոյն օրերուն եռօրեայ այցելութեամբ Հայաստան կը գտնուէր Ամերիկայի Միացեալ Նահանգներու կովկասեան հարցերու պատուիրակ եւ ԵԱՀԿ-ի Մինսքի խմբակի նորանշանակ համանախագահ Ֆիլիփ Ռիքըրը: Այս վերջինը եւս վստահեցուց, որ Միացեալ Նահանգները պատրաստ են օժանդակելու Հայաստանի եւ Ազրպէյճանի միջեւ խաղաղութեան հաստատման գործընթացին:

Ռուսական, ամերիկեան ու եւրոպական շահագրգռութիւններու այս հանգոյցին մէջ խուսանաւելու ու հայկական շահերը պաշտպանելու համար, անհրաժեշտ է ունենալ հմուտ դիւանագիտութիւն, որմէ դժբախտաբար զերծ է Հայաստանը ներկայիս: Ժամանակը սուղ է ու իշխանափոխութիւնը` հրամայական անհրաժեշտութիւն:

Մաղթենք, որ «Դիմադրութիւն» շարժման որդեգրած նոր մարտավարութիւնը յաջողութեամբ պսակուի ու Հայաստանը շուտով օժտուի իր կենսական շահերը պաշտպանելու տեսլական ու կարողութիւն ունեցող ազգային միութեան իշխանութեամբ:

 

«Ազդակ»

 

Յարակից լուրեր

  • Ֆրանսիայի ԱԺ-ն միաձայն ընդունել է Հայաստանին աջակցող բանաձեւ
    Ֆրանսիայի ԱԺ-ն միաձայն ընդունել է Հայաստանին աջակցող բանաձեւ

    Ֆրանսիայի Ազգային ժողովը միաձայն ընդունել է Հայաստանին աջակցող եւ Ադրբեջանի նկատմամբ պատժամիջոցներ առաջարկող բանաձեւ:

  • Կենսունակ համայնքի մը սպասումով
    Կենսունակ համայնքի մը սպասումով

    7, 8 եւ 9 դեկտեմբեր 2022-ին Անթիլիասի մայրավանքին մէջ պիտի գումարուի Մեծի Տանն Կիլիկիոյ կաթողիկոսութեան Ազգային ընդհանուր ժողովը: Ժողովին կը մասնակցին կաթողիկոսութեան 13 թեմերէն եւ մէկ հոգեւոր հովուութենէ 105 պատգամաւորներ, որոնց մէկ եօթներորդը (15 պատգամաւոր) եկեղեցականներ են, իսկ վեց եօթներորդը (90 պատգամաւոր)` աշխարհականներ: Կեդրոնական վարչութեան կրօնական եւ քաղաքական ժողովներու անդամներու եւ հրաւիրեալներու յաւելումով, Ընդհանուր ժողովի մասնակիցներուն թիւը կը հասնի շուրջ 130-ի: 

  • Այսօր ներկայացնելու եմ պատգամաւորի մանդատից հրաժարւելու իմ դիմումը․ «Հայաստան» դաշինքի պատգամաւոր Արամ Վարդեւանեան
    Այսօր ներկայացնելու եմ պատգամաւորի մանդատից հրաժարւելու իմ դիմումը․ «Հայաստան» դաշինքի պատգամաւոր Արամ Վարդեւանեան

     

    «Հայաստան» դաշինքի պատգամաւոր Արամ Վարդեւանեանը հրաժարւում է մանդատից։ Նա այս մասին գրառում է արել ֆէյսբուքեան իր էջում․

  • Լիբանանի անկախութեան տօնին առիթով
    Լիբանանի անկախութեան տօնին առիթով

    Վաղը, 22 նոյեմբեր 2022-ին կը լրանայ Լիբանանի անկախութեան հռչակման 79-ամեակը: Արդարեւ, 22 նոյեմբեր 1943-ին Լիբանանը թօթափեց Համաշխարհային Ա. պատերազմէն ետք հաստատուած ֆրանսական հոգատարութիւնը եւ դարձաւ ինքնիշխան երկիր: Արդէն գոյութիւն ունէին խորհրդարանի կառավարութիւն, ինչպէս նաեւ հանրապետութեան նախագահ, որոնք ֆրանսական պետութեան կողմէ նշանակուած բարձր յանձնակատարի մը հսկողութեան տակ` կ՛իրականացնէին երկրին կառավարումը: Ներքին ինքնավարութեան այս տարազին նպատակը երկրի ժողովուրդը վարժեցնել էր պետական իշխանութեան կիրարկման:

  • «Դուք առաջարկում էք 75 հազար դրամ նւազագոյն աշխատավարձ, այնպէս որ՝ սա լուծում չէ». Թադէոս Աւետիսեանը՝ իշխանութիւններին
    «Դուք առաջարկում էք 75 հազար դրամ նւազագոյն աշխատավարձ, այնպէս որ՝ սա լուծում չէ». Թադէոս Աւետիսեանը՝ իշխանութիւններին

    «Նւազագոյն աշխատավարձի բարձրացման այս նախաձեռնութիւնը ոչ միայն համարժէք չէ գնաճին, այլեւ՝ ուշացած»,- «Նւազագոյն ամսական աշխատավարձի մասին» օրէնքում փոփոխութիւններ կատարելու մասին եւ Հայաստանի Հանրապետութեան աշխատանքային օրէնսգրքում փոփոխութիւններ եւ լրացում կատարելու մասին նախագծերն առաջին ընթերցմամբ ընդունելուց յետոյ յայտարարեց «Հայաստան» խմբակցութեան պատգամաւոր Թադէոս Աւետիսեանը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։