Հա

Ազգային

25/11/2022 - 11:10

Այսօր մեզ անհրաժեշտ է ազգային առողջ գիտակցութիւն ունեցող ուժերի համախմբում

«Երկրի հիւրասրահ»-ում է ՀՅԴ Բիւրոյի ներկայացուցիչ Յակոբ Տէր-Խաչատուրեանը:

«alikonline.ir» - «Երկրի հիւրասրահ»-ում է ՀՅԴ Բիւրոյի ներկայացուցիչ Յակոբ Տէր-Խաչատուրեանը:

Զրոյցն ընթացել է ՀՅԴ գործունէութեան երեք հիմնական ուղղութիւնների շուրջ` Արցախ, Հայաստան եւ Սփիւռք: ՀՅԴ Բիւրոյի ներկայացուցիչը խօսել է Արցախ կատարած իր վերջին այցի, տեղի ունեցած հանդիպումների եւ Արցախում մեկնարկած նոր քաղաքական գործընթացների մասին: Նա վստահեցրել է, որ Արցախի խնդրի հետ կապւած Դաշնակցութեան դիրքորոշումներում որեւէ փոփոխութիւն չկայ, եւ ՀՅԴ-ն շարունակում է պայքարը յանուն Արցախի ժողովրդի ինքնորոշման իրաւունքի եւ Արցախի անկախութեան ճանաչման:

Խօսելով Արցախում տեղի ունեցող վերջին կադրային փոփոխութիւնների մասին` Յակոբ Տէր-Խաչատուրեանը նշել է, որ ՀՅԴ-ն ողջունում է դրանք եւ լիայոյս է, որ նորանշանակ պաշտօնեաներն իրենց հայրենասիրութեան ու նւիրումի շնորհիւ կը կարողանան շտկել ստեղծւած իրավիճակն ու աշխուժացնել հասարակական կեանքը:

«Մենք պէտք է կարողանանք կրկին միջազգային օրակարգ բերել Արցախի հարցը եւ վերականգնել հարցի կարգաւորման մինչ այս եղած ձեւաչափերը` գործադրելով բարեկամ երկրների հետ մեր ունեցած բոլոր կապերը»,- նշել է Յակոբ Տէր-Խաչատուրեանը եւ յաւելել, որ Ադրբեջանի նախագահ Իլհամ Ալիեւի յայտարարութիւնները Արցախի հարցը փակւած լինելու եւ ՀՀ իշխանութիւնների՝ Արցախի ինքնորոշման իրաւունքից հրաժարւելու գնով խաղաղութեան պայմանագիր ստորագրելու մասին յայտարարութիւնները կեղծ օրակարգեր են եւ անընդունելի ՀՅԴ-ի համար:

Անդրադառնալով Սփիւռքի կացութեանը` Յակոբ Տէր-Խաչատուրեանը նշել է, որ հակառակ վերջին տարիներին Սփիւռքում ՀՀ իշխանութիւնների պառակտիչ գործունէութեանը, արտերկրում ազգային եւ համահայկական կառոյցները կանգուն են եւ շարունակում են իրենց գործունէութիւնը ի նպաստատ Հայաստանի եւ Արցախի, ի նպաստ Հայ Դատի աշխատանքների: Յակոբ Տէր-Խաչատուրեանի խօսքով` Սփիւռքը գիտի ինքզինքը կազմակերպել եւ դժւարին կացութիւններում հայրենիքին նեցուկ կանգնելու յենարաններ ստեղծել: Դրա համար անհրաժեշտ է միասնութիւն: Այս ճգնաժամային օրերին մեզ անհրաժեշտ է ազգային առողջ գիտակցութիւն ունեցող ուժերի համախմբում:

Յակոբ Տէր-Խաչատուրեանն անդրադարձել է նաեւ Հայաստանի ներքաղաքական դաշտում տեղի ունեցող գործընթացներին: Նա ճիշտ քայլ է որակել ընդդիմութեան վերադարձը խորհրդարանական աշխատանքներին` նշելով, որ դա պայքարը շարունակելու եւ «Դիմադրութիւն» շարժումն իր տրամաբանական աւարտին հասցնելու համար լրացուցիչ գործիք կը դառնայ ընդդիմութեան ձեռքին:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։