Ամերիկայի Հայ Դատի գրասենեակն ամերիկեան իշխանութիւններին կոչ է անում ընդլայնել Արցախին յատկացւող աջակցութիւնը 2024 թւականին՝ այն հասցնելով 75 միլիոն դոլարի՝ հաշւի առնելով արդէն գրեթէ երեք ամիս ձգւող շրջափակումը, 2020-ի պատերազմի հետեւանքները։
«alikonline.ir» - Ամերիկայի Հայ Դատի գրասենեակն ամերիկեան իշխանութիւններին կոչ է անում ընդլայնել Արցախին յատկացւող աջակցութիւնը 2024 թւականին՝ այն հասցնելով 75 միլիոն դոլարի՝ հաշւի առնելով արդէն գրեթէ երեք ամիս ձգւող շրջափակումը, 2020-ի պատերազմի հետեւանքները։
ԱՄՆ Հայ Դատի յանձնախմբի մամուլի քարտուղար Էլիզաբէթ Չուլջեանի փոխանցմամբ, արդէն յաջորդ շաբաթ ԱՄՆ Կոնգրեսը կը սկսի 2024-ի բիւջէի քննարկումները:
«Դժբախտաբար, Ամերիկայի արտգործնախարարութիւնը կտրել է մարդասիրական օժանդակութիւնը դէպի Արցախ, միայն մի փոքր բաժին է տրամադրում ականազերծման աշխատանքների համար։ Նկատի ունենալով շրջափակումը, հաշւի առնելով 2020-ի պատերազմը, նկատի ունենալով Ադրբեջանի կառավարութեան շարունակական ճնշումը եւ յարձակւողական կեցւածքն Արցախի հանդէպ, այդ գումարը պէտք է բարձրանայ»,- «Ազատութեան»-ը փոխանցեց Չուլջեանը։
Միացեալ Նահանգներն այս տարւայ բիւջէով Հայաստանին 60 միլիոն դոլարի աջակցութիւն է նախատեսել՝ տնտեսական զարգացման, մասնաւոր հատւածի արդիւնաւէտութեան, էներգետիկ անվտանգութեան, ժողովրդավարութեան եւ օրէնքի գերակայութեան ծրագրերի համար։
Բայդէնի վարչակազմը 24 միլիոն դոլար էր նախատեսել նաեւ 2022-ի համար, սակայն Կոնգրեսն, ի վերջոյ, այդ գումարը կրկնապատկել էր՝ հասցնելով 45 միլիոն դոլարի, միաժամանակ, օրէնսդիրները նաեւ 2 միլիոն դոլար էին յատկացրել Արցախին՝ ականազերծման համար։
Հայ Դատի յանձնախումբը կարծում է, որ ակնկալւող 75 միլիոն դոլարով հնարաւոր կը լինի նպաստել տեղահանւածների, Արցախի էներգետիկ անվտանգութեան, կրթութեան, առողջապահութեան, սննդի, ինչպէս նաեւ ականազերծման խնդիրների լուծմանը։
«Ամերիկայի Հայ Դատի յանձնախումբը արդէն սկսել է աշխատել թէ՛ կոնգրեսական ղեկավարների հետ, թէ՛ անշուշտ շարունակում ենք երկխօսութիւնը Ամերիկայի գործադիր մարմնի հետ, որպէսզի ընդլայնենք օժանդակութիւնը դէպի Արցախ եւ շարունակենք օժանդակութիւնը դէպի Հայաստան, որ կարողանան Թուրքիայի եւ Ադրբեջանի շարունակական ճնշումները վերացնել»,- ասաց Չուլջեանը։
Ի՞նչ ակնկալիքով է Հայ Դատի գրասենեակը այսչափ մեծ գումար խնդրում ԱՄՆ իշխանութիւններից՝ հաշւի առնելով անցած տարիների կրճատումները, էլիզաբէթ Չուլջեանը պատասխանեց՝ այս դէպքում մատնանշում են Ադրբեջանի յարձակողական կեցւածքը, պարբերական ճնշումները Արցախի նկատմամբ։
