Աշխատանքային այցով Մոսկւայում գտնւող ՀՀ Աժ պատգամաւորներ, ՀՅԴ Բիւրոյի քաղաքական ներկայացուցիչ Արմէն Ռուստամեանը եւ ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը հանդիպել են «Արդար Ռուսաստանը՝ յանուն ճշմարտութեան» կուսակցութեան նախագահ, Պետդումայում կուսակցութեան խմբակցութեան ղեկավար Սերգէյ Միրոնովի հետ:
Աշխատանքային այցով Մոսկւայում գտնւող ՀՀ Աժ պատգամաւորներ, ՀՅԴ Բիւրոյի քաղաքական ներկայացուցիչ Արմէն Ռուստամեանը եւ ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը հանդիպել են «Արդար Ռուսաստանը՝ յանուն ճշմարտութեան» կուսակցութեան նախագահ, Պետդումայում կուսակցութեան խմբակցութեան ղեկավար Սերգէյ Միրոնովի հետ: Հանդիպման ընթացքում անդրադարձ է կատարւել տարածաշրջանային զարգացումներին, Լաչինի միջանցքի շրջափակմանը, Ուկրայինայում ընթացող ռազմական գործողութիւններին, ընդգծւել է Հայաստան-Ռուսաստան ռազմավարական դաշնակցային յարաբերութիւնների պահպանման եւ զարգացման անհրաժեշտութիւնը։ Ողջունելով հիւրերին՝ Սերգէյ Միրոնովը նախ յիշատակել է 2022 թւականի նոյեմբերի 29-ին կայացած հանդիպումը՝ բարձր գնահատելով «Արդար Ռուսաստանը՝ յանուն ճշմարտութեան» եւ «ՀՅ Դաշնակցութիւն» կուսակցութիւնների համագործակցութիւնը` 2007թ. ստորագրւած համագործակցութեան պայմանագրի շրջանակներում: Շնորհակալութիւն յայտնելով հանդիպման համար՝ Արմէն Ռուստամեանն անդրադարձել է Հայաստանում եւ Արցախում ստեղծւած իրավիճակին՝ նշելով, որ Լաչինի միջանցքի փակումից երեք ամիս անց Լեռնային Ղարաբաղում հումանիտար աղէտ է, եւ այժմ շատ կարեւոր է Ռուսաստանի եւ ռուս խաղաղապահների դիրքորոշումը։
Արմէն Ռուստամեանը յաւելել է, որ Արցախի Հանրապետութեան ժողովուրդը Ռուսաստանի Դաշնութիւնից ակնկալում է աւելի ակտիւ գործողութիւններ։ Հանդիպման աւարտին Սերգէյ Միրոնովը յոյս է յայտնել, որ ի վերջոյ կը յաղթի ողջախոհութիւնը, ձեռք կը բերւեն որոշակի պայմանաւորւածութիւններ, կը լուծւեն հայ բնակչութեան անվտանգութեան խնդիրները, որի երաշխաւորը շարունակում է մնալ Ռուսաստանի Դաշնութիւնը։
ՀՅԴ Հայաստանի Գերագոյն մարմնի
Հանրային կապերի գրասենեակ
