Hubble տիեզերական աստղադիտակը, որը ԱՄՆ Ազգային աւիացիայի եւ տիեզերական գործակալութեան (NASA) եւ Եւրոպական տիեզերական գործակալութեան (ESA) համատեղ նախագիծն է, չնայած իր պատկառելի տարիքին, շարունակում է տպաւորիչ լուսանկարներ անել տիեզերքի տարբեր օբիեկտներից: Այս անգամ աստղադիտակի տեսադաշտում են յայտնւել Օրիոնի միգամածութիւնից երկու պայծառ երիտասարդ աստղեր, որոնք շարունակ փոխակերպւում են։
«alikonline.ir» - Hubble տիեզերական աստղադիտակը, որը ԱՄՆ Ազգային աւիացիայի եւ տիեզերական գործակալութեան (NASA) եւ Եւրոպական տիեզերական գործակալութեան (ESA) համատեղ նախագիծն է, չնայած իր պատկառելի տարիքին, շարունակում է տպաւորիչ լուսանկարներ անել տիեզերքի տարբեր օբիեկտներից: Այս անգամ աստղադիտակի տեսադաշտում են յայտնւել Օրիոնի միգամածութիւնից երկու պայծառ երիտասարդ աստղեր, որոնք շարունակ փոխակերպւում են։
Ըստ News.am-ի՝ ինչպէս տեղեկացնում է Space.com-ը, ներկայացւած լուսանկարի կենտրոնական մասում Օրիոնի միգամածութեան V372 վառ աստղն է, որը պատկանում է կապոյտ գերհսկաների դասին եւ Օրիոն փոփոխական աստղերին։ Սրանք անկանոն փոփոխւող աստղերի տեսակ են, որոնք կապւած են ցրւած միգամածութիւնների հետ։ Երկրորդ աստղը կարելի է տեսնել պատկերի վերին ձախ մասում:
Երկու աստղերն էլ գտնւում են Օրիոնի միգամածութիւնում Երկրից մօտ 1450 լուսատարի հեռաւորութեան վրայ։ Այս երիտասարդ աստղերն անցնում են շարունակական վերափոխման շրջան, որն արտայայտւում է նրանց պայծառութեան անկանոն փոփոխութեամբ։
Տիեզերքի այս հատւածը մանրամասն ուսումնասիրել հնարաւոր է եղել շնորհիւ Hubble-ի գործիքակազմում ներառւած գործիքների՝ տեսանելի եւ ինֆրակարմիր տիրոյթներում աշխատելու հնարաւորութեան։
Ներկայացւած պատկերը ստացւել է Hubble-ի երկու գործիքների կիրառման միջոցով։ Խօսքը Advanced Camera for Surveys կոչւող գործիքի մասին է, որը նախատեսւած է տիեզերքի հեռաւոր անկիւններում գալակտիկաների եւ գալակտիկաների կլաստերների որոնման համար։ Միւս գործիքը Wide Field Camera 3-ն է, որն աշխատում է ուլտրամանուշակագոյն եւ տեսանելի տիրոյթներում:
