Եթէ Մարսի եւ Իւպիտէրի միջեւ եւս մէկ մոլորակ լինէր, ապա Երկիր մոլորակը կարող էր դուրս շպրտւել Արեգակնային համակարգից։ Նման եզրայանգում է արւում Կալիֆորնիայի համալսարանի գիտնականի հետազօտութիւնում, որը հրապարակւել է Planetary Science Journal ամսագրում։
«alikonline.ir» - Եթէ Մարսի եւ Իւպիտէրի միջեւ եւս մէկ մոլորակ լինէր, ապա Երկիր մոլորակը կարող էր դուրս շպրտւել Արեգակնային համակարգից։ Նման եզրայանգում է արւում Կալիֆորնիայի համալսարանի գիտնականի հետազօտութիւնում, որը հրապարակւել է Planetary Science Journal ամսագրում։ Գրում է News.am-ը:
Ուսումնասիրութեան հեղինակ Ստեֆան Քէյնը դիտարկել է Արեգակնային համակարգի կոնֆիգուրացիան այնպիսի սցենարում, եթէ Մարսի եւ Իւպիտէրի միջեւ ընկած տարածքում եւս մէկ մոլորակ լինէր։
Տիեզերքի այս շրջանը դատարկ է, եւ գիտնականները չեն կարողանում պարզել, թէ ինչու: Այնուամենայնիւ, այս տարածքում եւս մէկ մոլորակ տեղակայելու համակարգչային սիմուլեացիան ցոյց է տւել, որ նման սցենարը աղէտալի հետեւանք կունենայ Երկրի համար:
«Մեր արեգակնային համակարգը շատ լաւ է կարգաւորւած, քան ես նախկինում կարծում էի: Ամէն ինչ աշխատում է ժամացոյցի բարդ մեխանիզմի պէս: Եթէ աւելի շատ ատամնաւոր անիւներ աւելացնէք, ամէն ինչ կը փչանայ»,- ասել է Ստեֆան Քէյնը:
Գիտնականը փորձել է գտնել Արեգակնային համակարգի կառուցւածքի երկու ակնյայտ առեղծւածների պատասխանը։ Առաջինն այն է, որ որեւէ մոլորակ չկայ Երկրի եւ Նեպտունի միջեւ, որը Երկրից մեծ է չորս անգամ, ծանր՝ 17 անգամ։ Երկրորդն այն է, որ Մարսի եւ Իւպիտէրի ուղեծրերի միջեւ ընկած տարածութիւնում եւս չկայ որեւէ մոլորակ։ Երկու առեղծւածների հնարաւոր պատասխաններն իմանալու նպատակով ուսումնասիրութեան շրջանակում համակարգչային մի շարք սիմուլեացիաներ են անցկացւել, եւ բոլոր սցենարներում Մարսի եւ Իւպիտէրի միջեւ եղած տարածքում տեղադրւել է գերմոլորակ։
Հաշւարկները ցոյց են տւել, որ կայ միայն մէկ ճշգրիտ ստուգւած ուղեծիր, որի երկայնքով գերմոլորակը կարող է պտտւել եւ չխախտել Արեգակնային համակարգի միւս բոլոր մոլորակների ուղեծրերը։ Այնուամենայնիւ, դէպքերի ճնշող մեծամասնութեան դէպքում Մարսի եւ Իւպիտէրի միջեւ գերմոլորակի առկայութիւնը կարող է ապակայունացնել համակարգի բոլոր մոլորակների ուղեծրերը: Վեներան, Մերկուրին եւ Երկիրը դուրս կը գան Արեգակնային համակարգից, նոյն ճակատագրին կարժանանան նաեւ արտաքին մոլորակները՝ Նեպտունը եւ Ուրանը:
Ուսումնասիրութիւնում ասւում է, որ հիպոթետիկ գերմոլորակի ուղեծրային շարժումը, անշուշտ, ազդեցութիւն կունենար Իւպիտէրի վրայ, եւ արդէն այս հսկայ մոլորակը իր ձգողականութեան պատճառով կը խախտէր մնացած բոլոր մոլորակների ուղեծրերը: Եւ եթէ նոյնիսկ Երկիրը մնար Արեգակնային համակարգում, դրա ուղեծիրն այնքան կերկարեր, որ Երկրի վրայ կեանքի գոյութեան մասին խօսք լինել չէր կարող։
