Հա

Քաղաքական

12/08/2012 - 13:49

www.1in.am-ի հարցերին պատասխանում է ՀՀ ԱԺ-ի ՀՅԴ խմբակցութեան քարտուղար Աղւան Վարդանեանը

altՀ.- Պրն. Վարդանեան, հնարաւո՞ր է նախագահական ընտրութիւնների նախաշեմին էլ կրկնւի խորհրդարանական ընտրութիւնների սցենարը՝ ընդդիմադիր ուժերը միասնական շտաբում համախմբւեն:
Պ.- Նախագահական ընտրութիւնների շեմը դեռ չէ. մինչ այդ՝ շատ ջրեր կը հոսեն: Դուք գիտէք մեր մօտեցումները՝ նախագահական ընտրութիւնների հետ կապւած: Մենք հիմա փորձում ենք ձեւաւորել մի պլատֆորմ, որտեղ այն խնդիրներն են, որոնք կարծում ենք՝ անհրաժեշտ են ՀՀ-ում արմատական որակական փոփոխութիւններ անելու համար: Առաջիկայ մեր պլատֆորմը ՀՅԴ-ն կը պատրաստի եւ կը ներկայացնի քննարկման: Դրանից բխող որոշակի անելիքները, քայլերն արդէն հետագայի խօսակցութիւն են:

Հ.- Դիտարկելով այսօրւայ զարգացումները՝ ի՞նչ էք կարծում, ընդդիմութիւնը միասնական թեկնածու կունենա՞յ:
Պ.- Բոլոր նախագահական ընտրութիւններից առաջ էլ այդ հարցը օրակարգում է դրւում: Ես կարծում եմ՝ հիմա շատ կարեւոր խնդիր է ձեւակերպել հարցերի այն շրջանակը, որոնք անհրաժեշտ են այս երկրին: Ակնյայտ է, որ մենք լրջագոյն խնդիրներ ունենք՝ կապւած երկրի զարգացման, մեր քաղաքացիների սոցիալ-տնտեսական վիճակի բարելաւման, ժողովրդավարութեան հաստատման, մարդու իրաւունքների պաշտպանութեան հետ: Այդ բոլոր հարցերը լուծումներ են պահանջում: Ցաւօք՝ խորհրդարանական ընտրութիւններն իրենց արտաքին ֆոնով հանդերձ՝ իրականում իշխանութեան վերարտադրման մեխանիզմներ էին: Այս ընտրութիւնների բնոյթը հետեւեալն էր՝ որ ամբողջ պետական, մարզային, տեղական ինքնակառավարման համակարգերը վերածւել էին ընտրական համակարգի: Սա մեր երկրի հիմնական խնդիրներից մէկն է: Քանի դեռ պետական համակարգը վերածւում է ընտրական համակարգի եւ ծառայում է իշխանութեան վերարտադրմանը, դրական փոփոխութիւնների լուրջ ակնկալիք հնարաւոր չի ունենալ: Մեր առջեւ դրւած խնդիրը սա թոյլ չտալն է, սա բացառելն է, այդ թւում՝ նաեւ օրէնսդրական մեխանիզմներով: Երբ մարդու աշխատանքը գնահատւում է ոչ թէ օրէնքով, նրան տրւած լիազօրութիւնների կատարման որակով, այլ նրանով, թէ այդ մարդն իր կուսակցութեանը քանի ձայն է բերել, պետական ամբողջ համակարգն այլասերւում է եւ դադարում լինել ժողովրդավարական: Այն, ինչ այսօր կատարւում է, այս համատարած կուսակցականացումն անընդունելի է: Այս խնդիրներն են այսօր առաջնահերթ, շատ կարեւոր է ձեւակերպել խնդիրները եւ փորձել գալ լայն համաձայնութեան, որ մեր հասարակութիւնը հասկանայ՝ իշխանութիւնն ինքնանպատակ չէ: Սա ձեւակերպելուց յետոյ՝ կերեւայ, թէ ե՛ւ քաղաքացիական հասարակութիւնը, ե՛ւ քաղաքական ուժերը ինչպիսի վերաբերմունք ունեն այս հարցերի վերաբերեալ: Եթէ այստեղ հնարաւոր լինի համաձայնութեան հասնել, նոր հնարաւոր կը լինի քննարկել միւս խնդիրները:

Հ.- Առանձնայատկութիւն ունենալո՞ւ են այս ընտրութիւնները, եթէ այո, ո՞րն է լինելու դա:
Պ.- Նախագահական ընտրութիւնները միշտ առանձնայատուկ են, որակապէս տարբերւում են խորհրդարանական ընտրութիւններից: Ցաւօք՝ քաղաքական դաշտի այսօրւայ պատկերը տեսնելով՝ դժւար է ակնկալել, որ հնարաւոր կը լինի նման մեծ համաձայնութիւն ձեւաւորել: Միշտ կը լինեն անհատներ, այս կամ այն քաղաքական ուժի ներկայացուցիչներ, որոնք կը փորձեն իրենց առաջին պլան մղել, իրենց թեկնածութիւնն առաջ բերել: Առանձնայատկութիւնն այն է, որ ինչ-որ առումով իշխող կուսակցութիւնը յենւելու է իր խորհրդարանական ընտրութիւնների շատ բարձր արդիւնքների վրայ եւ փորձելու է, կարծում եմ, նոյն մեխանիզմները կիրառել, ինչ որ խորհրդարանականի ժամանակ էր: Հասարակութիւնն առաջին նշանները կարծես ցոյց է տալիս, կան հասարակութեան որոշ հատւածներ, որոնք գիտակցում են, որ խնդիրը ոչ թէ իշխանութեան վերարտադրութիւնն է, այլ ՀՀ-ն շատ աւելի լուրջ խնդիրներ ունի՝ ե՛ւ ներքին, ե՛ւ արտաքին առումով: Տեսնենք, որքան մօտենան, այնքան աւելի ամէն ինչ կը յստականայ:

Հ.- ՀՅԴ-ն ու ՀԱԿ-ը մշտապէս հակասութեան մէջ են եղել, սակայն այսօր կարծես համագործակցութեան քայլեր կան. ո՞ր խնդիրները «հաշտեցրին» այս երկու ուժերին:
Պ.- Նման նշոյլներ ինքս չեմ տեսնում, չեմ դիտարկում: Քաղաքական ուժեր են, այսօր խորհրդարանական ուժեր են, եւ, բնականաբար, կը լինեն որոշակի հարցեր, որոնց շուրջ հնարաւոր կը լինի համագործակցել: Աւելի լայն համագործակցութեան նշաններ գոնէ ես չեմ տեսնում:

Հ.- ՀՅԴ-ն այսօր յեղափոխութեան նպատակ ունի՞՝ հաշւի առնելով այն, որ վերջին ժամանակահատւածում շատ է Ձեր գործիչների կողմից շեշտւում համակարգային փոփոխութիւնների անհրաժեշտութիւնը:
Պ.- Ես ասացի այն բոլոր հարցերի շրջանակը, որոնք պէտք է այս երկրում լուծւեն: Յեղափոխութիւն սեփական երկրում, սեփական ժողովրդի մէջ այն ընկալումներով, այն պատկերացումներով, որ մեր հասարակութեան մէջ վերջին 100 տարում ձեւաւորւել է, մենք նման խնդիր չենք դնում: Մենք խնդիր ենք դնում մարդկանց գիտակցութեան փոփոխութեան, մարդկանց համախմբման փոփոխութեան եւ, այո՛, արմատական փոփոխութիւնների, ինչը բնական քաղաքական գործընթաց է եւ որեւէ  արտառոց բան չի ենթադրում: Բայց որ արմատական փոփոխութիւններ մեր երկրին անհրաժեշտ են՝ դա միանշանակ է:

Հ.- Եթէ այնպէս ստացւի, որ ընդդիմութեան միասնական թեկնածու լինի Ռոբերտ Քոչարեանը, իսկ ՀԱԿ-ն ու ԲՀԿ-ն սատարեն նրա թեկնածութեանը, ՀՅԴ-ն կը սատարի՞ նրա թեկնածութեանը: Կամ՝ եթէ միասնական թեկնածուն լինի Լեւոն Տէր-Պետրոսեանը, կը սատարէ՞ք՝ հաշւի առնելով, որ ՀԱԿ-ի կազմում գտնւող ուժերը Լեւոն Տէր-Պետրոսեանին են դիտարկում որպէս միասնական թեկնածու:
Պ.- Մենք այս փուլում անձի խնդիր չենք քննարկում, մենք քննարկում ենք մօտեցումների խնդիր, հարցերի շրջանակ ենք քննարկում: Երբ որ կը լինի այդ հարցերի շրջագծում համաձայնութիւն, երկրորդ փուլը, բնականաբար, կարող է լինել թեկնածուների քննարկման հարցը: Մենք ասում ենք՝ մենք այս 3, 4, 5 հարցերն ենք տեսնում, որ պէտք է այս երկրում լուծւեն: Բնականաբար, մենք նաեւ վստահ ենք, որ այս հարցերի լաւագոյն լուծողը լինելու է հէնց մեր թեկնածուն: Այսօր խօսել թեկնածուների մասին ոչ տեղին է, ոչ ժամանակին:

Հ.- Բայց, ՀՅԴ գործիչներն ասում են, որ եթէ որոշեն ընդդիմութեան միասնական թեկնածուին պաշտպանել, ապա նա պէտք է լինի անկուսակցական թեկնածու: Ո՞ւմ  նկատի ունէք, Ռոբերտ Քոչարեանի՞ն:
Պ.- Հայաստանում 100 հազարաւոր մարդիկ անկուսակցական են: Դաշնակցութիւնն ասում է հետեւեալը՝ մենք այս հարցերի շրջանակը ձեւակերպելով՝ պատրաստ ենք նոյնիսկ քննարկել ոչ-կուսակցական թեկնածուի խնդիր: Ասում ենք սա ընդամէնը: Հայաստանում, բացի Ռոբերտ Քոչարեանից, կան 100 հազարաւոր ոչ-կուսակցական այլ մարդիկ եւս: Եւ Արմէն Ռուստամեանը երբ ասել է այդ մասին, նկատի չի ունեցել որեւէ որոշակի մարդու:

Հ.- ՀԱԿ-ի համակարգող Լեւոն Զուրաբեանն էլ ասում է, որ ընդդիմութեան միասնական թեկնածուն կը լինի հզօր թեկնածու: Ըստ Ձեզ՝ ո՞վ է հզօր թեկնածուն:
Պ.- Նախագահի ինստիտուտը ՀՀ-ում այնպիսին է, որ եթէ պիտի «հզօր» բառով բնորոշենք, դա կը լինի ամենասխալ ձեւակերպումը: Նախագահը պիտի լինի կազմակերպւած, իր երկրի դժւարութիւններն ու խնդիրները գիտակցող, նւիրւած, աշխատող, խմբական աշխատանքին պատրաստ, գործընկերներին իր շուրջ համախմբելուն ընդունակ մարդ:

Հարցազրոյցը վարեց ՌՈԶԱ ՅՈՎՀԱՆՆԻՍԵԱՆԸ

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։