Հա

Քաղաքական

11/09/2019 - 10:30

«Որեւէ արբիտրաժ Հայաստանին չի պատժի, եթէ փորձաքննութիւնը վտանգներ պարզի». Արծւիկ Մինասեան

Առաջին հարւածը ստանալու է Որոտանը, այնուհետեւ ջրաղբիւրները՝ թէ՛ ստորգետնեայ, թէ՛ մակերեւութային, ինչու չէ՝ նաեւ Սեւանը. ELARD-ի այս մտավախութիւնները Yerkir.am-ի հետ հարցազրոյցում մէջբերեց ՀՅԴ ԳՄ անդամ Արծւիկ Մինասեանը:

«alikonline.ir» - Առաջին հարւածը ստանալու է Որոտանը, այնուհետեւ ջրաղբիւրները՝ թէ՛ ստորգետնեայ, թէ՛ մակերեւութային, ինչու չէ՝ նաեւ Սեւանը. ELARD-ի այս մտավախութիւնները Yerkir.am-ի հետ հարցազրոյցում մէջբերեց ՀՅԴ ԳՄ անդամ Արծւիկ Մինասեանը:

Նա ընդգծեց, որ եթէ միջազգային անկախ փորձաքննութիւնը հաստատի, որ երկրաբանութեան եւ ջրաբանութեան ուղղութիւններով կան վտանգներ եւ դրանք յաղթահարւած չեն, որեւէ միջազգային արբիտրաժ չի կարող Հայաստանին պատժել:

Դաշնակցութեան դիրքորոշումն այն է, որ հանքի փորման աշխատանքները որեւէ ձեւով չպէտք է շարունակւեն, մինչեւ միջազգային հեղինակաւոր որեւէ կազմակերպութիւն ամբողջական հետազօտութիւն չիրականացնի:

Իսկ այդ ընթացքում «Լիդիան»-ը պէտք է հետեւի, որ այսօրւայ վնասակար ազդեցութիւնները աւելի շատ չտարածւեն, որովհետեւ, Մինասեանի խօսքով, այսօր էական խաթարումներ են տեղի ունեցել՝ լանդշաֆտը էականօրէն ձեւախեղւել է եւ կան քիմիական գործընթացներ:

Արծւիկ Մինասեանը վկայակոչեց ELARD-ի հետազօտութեան մտահոգիչ տւեալները, ասենք, գոլորշիացման գերագնահատումը. տեղումները «Լիդիան»-ի նշածից աւելի շատ են լինելու, գոլորշիացումը՝ քիչ:

«Եւ հետեւաբար, հաշւարկները, որ դուք կատարում էք, թէ այսքան կը գոլորշիանայ, այսքանը մենք պոմպերով դուրս կը մղենք, իրականութեանը չեն համապատասխանում, տեղումները լինելու են շատ, գոլորշիացումը քիչ, ձեր պոմպերն էլ փորձարկւած չեն»,- ընդգծեց Մինասեանը:

Երկրաբանական ուսումնասիրութեամբ՝ հրաբխային այդ զանգւածի ծակոտիներն այնքան շատ են, որ յաւելեալ պայթիւնները էլ աւելի են մեծացնելու դրանք եւ ծակոտիների միջոցով հեղուկը շատ աւելի արագ է հասնելու ջրային աւազաններին:

«Այդ դէպքում ձեր կանխատեսումը, յարգարժան «Լիդիան», որ ասում էք՝ տեղումների արդիւնքում աղտոտւած ջուրը 130 տարի յետոյ նոր կը հասնի ջրային հատւածին, իրականում այդպէս չէ, շատ աւելի շուտ է հասնելու»,- ասաց Արծւիկ Մինասեանը:

ՀՅԴ ԳՄ անդամն, իհարկէ, կարեւորում է ծրագրի տնտեսական եւ սոցիալական լուրջ ցուցանիշները, բայց ասում է՝ այդ ձեռբերումները բաւարար չեն այս կամ այն որոշումը կայացնելիս. «Միանշանակ պատասխանը «ոչ» է, որովհետեւ եթէ շրջակայ միջավայրի վրայ ազդեցութիւնը այնքան բացասական է, որ ազդելու է մարդու կեանքի, առողջութեան, շրջակայ միջավայրի, համայնքների, կենսաբազմազանութեան վրայ, հանքի շահագործումն արդարացւած չէ»:

Արծւիկ Մինասեանը նաեւ անդրադարձաւ «Լիդիան» ընկերութեանը հանքի շահագործման թոյլտւութիւն տալու շրջանի իրադարձութիւններին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։