Հա

Քաղաքական

02/11/2019 - 09:50

ԱՀ Ազգային ժողովը մերժել է Արցախի ինքնիշխանութիւնը խախտող օրէնքի նախագիծը

Օգտւելով 2017 թւականի փետրւարի 20-ին համաժողովրդական հանրաքւէի արդիւնքներով ընդունւած Սահմանադրութեան՝ Ազգային ժողովին քաղաքացիական նախաձեռնութեան կարգով օրէնքի նախագիծ առաջարկելու իրաւունքից, նախաձեռնող խմբի կողմից Ազգային ժողով է ներկայացւել «Արցախի Հանրապետութեան Սահմանադրութիւնում փոփոխութիւններ կատարելու մասին» նախագիծ:

Օգտւելով 2017 թւականի փետրւարի 20-ին համաժողովրդական հանրաքւէի արդիւնքներով ընդունւած Սահմանադրութեան՝ Ազգային ժողովին քաղաքացիական նախաձեռնութեան կարգով օրէնքի նախագիծ առաջարկելու իրաւունքից, նախաձեռնող խմբի կողմից Ազգային ժողով է ներկայացւել «Արցախի Հանրապետութեան Սահմանադրութիւնում փոփոխութիւններ կատարելու մասին» նախագիծ:

Սահմանադրական փոփոխութիւնների նախագծով առաջարկւել է փոփոխութիւն կատարել ԱՀ Սահմանադրութեան 48-րդ յօդւածի 2-րդ եւ 3-րդ մասերում՝ Արցախի Հանրապետութեան նախագահի թեկնածու եւ Ազգային ժողովի պատգամաւորի թեկնածու առաջադրւելու իրաւունք տալով նաեւ Հայաստանի Հանրապետութեան քաղաքացիներին, իսկ մշտական բնակութեան ընտրական ցենզը նւազեցնել՝ նախագահի թեկնածուի համար 10 տարին դարձնելով 3, իսկ պատգամաւորի թեկնածուի համար 5 տարւայ փոխարէն սահմանելով 3 տարի:

Չնայած ԱԺ պետական-իրաւական մշտական յանձնաժողովի բացասական եզրակացութեանը՝ նախագիծը ներառւել է հոկտեմբերի 31-ին կայացած Արցախի Հանրապետութեան Ազգային ժողովի լիագումար նիստի օրակարգում եւ երկարածաւալ քննարկումների առիթ հանդիսացել:

Նախաձեռնող խմբի լիազռր ներկայացուցիչ Վլադիմիր Պօղոսեանը խորհրդարանին ներկայացնելով օրէնքի նախագիծը՝ նշել է, որ ներկայացւած փոփոխութիւնները բխում են համայն հայութեան համար հայրենքիում հաւասար պայմաններ ապահովելու անհրաժեշտութիւնից: «Առանձնակի կարեւորելով աշխարհասփիւռ հայութեան մեծագոյն աւանդը հայկական պետականութեան կայացման գործում՝ անհրաժեշտ է պասիւ ընտրական իրաւունքով օժտել նաեւ ՀՀ քաղաքացի հանդիսացող անձանց»,- մասնաւորապէս ասել է Պօղոսեանը:

Լիազօր ներկայացուցչի հիմնաւորումներին հակադարձող շուրջ երկու տասնեակ հարցադրումներով հանդէս է եկել 9 պատգամաւոր՝ 6-ը «Դաշնակցութիւն» խմբակցութիւնից: Պատգամաւորները բարձրացրել են նախագծի՝ ակտիւ եւ պասիւ ընտրական իրաւունքների միջեւ հաւասարակշռւածութիւնը խաթարելու, Հայաստանը որպէս ագրեսոր ներկայացնելու, Արցախի ինքնիշխանութեանը եւ անկախութեանը միջամտելու, ստորագրահաւաքին մասնակցելուց ձեռնպահ մնացած քաղաքացիների գերակշիռ մասի որոշումը յարգելու, քաղաքացիութիւն-պետութիւն փոխադարձ իրաւունքների եւ պարտականութիւնների, ԱՀ Սահմանադրութեանը եւ օրէնսդրութեանը հակասելու, ՀՀ Սահմանադրութիւնը խախտելու հարցերը:

Խորհրդարանի գլխադասային յանձնաժողովի նախագահ Հովիկ Ջիւանեանը եւս նշել է, որ օրէնքի նախագիծը բացասական եզրակացութեան է արժանացել իրաւական, քաղաքական եւ բովանդակային վիճելի տարրեր պարունակելու պատճառով: Կառավարութիւնը եւս համակարծիք էր: ԱԺ Արդարադատութեան նախարար Արարատ Դանիէլեանը նշել է, որ քաղաքացիութիւնն այն կարեւոր նախապայմանն է, որը հանրային կառավարման ոլորտում անձին օժտում է լիարժէք իրաւասուբիեկտութեամբ:

«Ընտրական իրաւունքը բաղկացած է անխզելիօրէն միմեանց հետ փոխկապակցւած երկու բաղադրատարրերից՝ ակտիւ եւ պասիւ ընտրական իրաւունքներից: Նրանցից մէկի գոյութիւնն առանց միւսի անհնար է, ինչը խօսում է այն մասին, որ ԱՀ նախագահի եւ ԱԺ ընտրութիւնների ժամանակ ՀՀ քաղաքացիներին պասիւ ընտրական իրաւունք շնորհելն ինքնըստինքեան կը յանգեցնի նրանց ակտիւ ընտրական իրաւունք շնորհելուն: Արցախի Հանրապետութիւնն ինքնիշխան պետութիւն է, այդ իսկ պատճառով կառավարութիւնն նպատակայարմար չի համարել ԱՀ Սահմանադրութիւնում ներառել առաջարկւող փոփոխութիւնը»,- ասել է Արարատ Դանիէլեանը:

Տեղի ունեցած մտքերի փոխանակութիւնը եւս բազմաելոյթ էր. 8 պատգամաւոր հանդէս է եկել պատգամաւորական յայտարարութեամբ, 4-ը՝ ներկայացրել խմբակցութիւնների դիրքորոշումները: Ընդհանուր առմամբ՝ շուրջ երեք ժամ տեւած օրէնքի նախագծի քննարկումը մերժւել է 24 դէմ, 4 կողմ, 1 ձեռնպահ քւէարկութեան արդիւնքներով եւ հանւել շրջանառութիւնից:

 

Լուսինէ Թեւոսեան

«Ապառաժ»

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։