Հա

Քաղաքական

02/12/2019 - 13:50

«Իմքայլականները պէտք է վերջ տան ծնողների վախերի էժանագին շահարկմանը». Աւետիք Չալաբեան

«Ազգային օրակարգ» կուսակցութեան խորհրդի անդամ Աւետիք Չալաբեանն, ըստ Yerkir.am-ի, Facebook-ի իր էջում գրառում է արել 10 մլն. ՀՀ դրամ վճարելու եւ բանակում ընդամենը 1 ամիս ծառայելու օրինագծի վերաբերեալ:

«alikonline.ir» - «Ազգային օրակարգ» կուսակցութեան խորհրդի անդամ Աւետիք Չալաբեանն, ըստ Yerkir.am-ի, Facebook-ի իր էջում գրառում է արել 10 մլն. ՀՀ դրամ վճարելու եւ բանակում ընդամենը 1 ամիս ծառայելու օրինագծի վերաբերեալ:

Նա, մասնաւորապէս, գրել է. «Անցած շաբաթը յագեցած էր իրադարձութիւններով, սակայն նրանցից մէկը յատուկ անդրադարձ է պահանջում։ «Իմ Քայլը» խմբակցութեան պատգամաւոր Հայկ Սարգսեանը հանդէս եկաւ օրէնսդրական նախաձեռնութեամբ, որով նա առաջարկում է մինչեւ 27 տարեկան զինապարտ ՀՀ քաղաքացիներին հնարաւորութիւն տալ բիւջէ վճարել 10 000 000 ՀՀ դրամ, եւ ծառայել բանակում ընդամենը 1 ամիս (այսինքն փաստացի չծառայել):

Ես չէի անդրադառնայ Հայկ Սարգսեանին կամ նրա նախաձեռնութեանը, սակայն այս խնդիրը ցաւօք ոչ իրենով է սկսւել, ոչ էլ իրենով է վերջանալու՝ այն մեր հանրային դիսկուրսում շրջանառւում է բաւական վաղուց։ Այս գաղափարի ջատագովները բաւական ուժեղ մի քանի փաստարկ ունեն՝

ա) հարուստները միեւնոյն է տարբեր միջոցներով հնարաւորութիւն են գտնում իրենց երեխաներին ազատել ծառայութիւնից՝ աւելի լաւ չի պաշտօնականացնել դա, եւ այդ միջոցները գնան պետական բիւջէ

բ) արտագաղթի մի մասն էլ պայմանաւորւած է տղայ երեխաներին երկրից հեռացնելու ձգտմամբ, ընդ որում արդիւնքում երեխաների հետ հեռանում են նաեւ ծնողները՝ սա կը կասեցնի արտագաղթը

գ) ստացւած միջոցները հնարաւորութիւն կը տան իւրաքանչիւր ժամկէտային զինծառայողի փոխարէն մէկ պայմանագրային ծառայող պահել, ուստի բանակը չի տուժի

Այս փաստարկները անհիմն չեն, ուստի նրանց եւս խիստ հիմնաւոր հակափաստարկներ են պէտք։ Փորձեմ շարադրել մի քանիսը՝

ա) ժամկէտային ծառայութիւնից ազատւելը փողով պաշտօնականացնելով, մենք սրում ենք երկրում հակասութիւնը հարուստների եւ աղքատների միջեւ, եւ էլ աւելի բեւեռացնում առանց այդ էլ պառակտւած հասարակութիւնը, սրա երկարաժամկէտ բացասական հետեւանքները ոչ ոք չի հաշւարկել,

բ) նախնական հաշւարկներով, երկրի բնակչութեան 20-25% ֆինանսապէս հնարաւորութիւն կունենայ «օգտւել» այս օրէնքի ընձեռած հնարաւորութիւնից (թէեւ չի նշանակում, որ կօգտւի), դա մեր զօրակոչային ռեսուրսի խիստ շօշափելի կորուստ է, որը հատուցելը այդքան էլ հեշտ չի։ Արդէն հիմա էլ բանակի մօտ 2/3-ը պայմանագրային հիմունքներով է ծառայում, եւ այնպէս չէ, որ կարելի է հեշտօրէն հազարաւոր նոր ցանկացողներ գտնել,

գ) ժամկէտային ծառայութիւնը անհրաժեշտ է ոչ միայն գործող բանակը համալրելու համար, այլեւ մոբիլիզացիոն ռեսուրս ստեղծելու՝ պատերազմի դէպքում։ Առաջարկւող օրէնքի փոփոխութիւնը շօշափելի հարւած կը հասցնի նաեւ մեր մոբիլիզացիոն ռեսուրսին, առանց որեւէ փոխհատուցման

դ) առաջնագծի այն հատւածներում, որոնք հեռու են բնակավայրերից, պայմանագրային զինծառայողներով համալրումը ընդհանրապէս խնդրահարոյց է, ուստի ժամկէտային ծառայողները սահմանի այդ հատւածը պաշտպանող հիմնական ռեսուրսն են, նրանց փոխարինելը յաճախ նոյնիսկ իրատեսական էլ չի,

ե) պատերազմող երկրում, այսպիսի նախաձեռնութիւնները ընդհանրապէս բարոյալքող են, եւ հասարակութեան քաղքենի եւ նիւթապաշտ շերտերի մօտ պատրանք են ստեղծում, որ ինչ որ մէկը իրենց փոխարէն պէտք է պաշտպանի երկիրը, իսկ իրենք վայելեն միայն խաղաղութեան բարիքները,

զ) բանակում ժամկէտային ծառայութիւնը քաղաքացու կարեւորագոյն պարտականութիւնն է երկրի առջեւ։ Եթէ նա պաշտօնապէս հրաժարւում է այդ պարտականութիւնը կատարելուց, աւտոմատ պէտք է զրկւի նաեւ բազմաթիւ իրաւունքներից (ընտրական, սոցիալական ապահովութեան, հարկային արտօնութիւններից, պետական պաշտօններ զբաղեցնելու իրաւունքից, եւ այլն), ոչ թէ պարզապէս տուգանք մուծի, եւ անարդար առաւելութիւն ստանայ իր տարեկիցների նկատմամբ։

Մեր Պաշտպանութեան նախարարութիւնը արդէն կոշտ դէմ է արտայայտւել այս նախաձեռնութեանը, եւ դա լրիւ արդարացւած է։ Ժամկէտային ծառայութիւնից փողով ազատւելը պաշտօնակացնելու փոխարէն, այդ ծառայութիւնը պէտք է դարձնել առաւելագոյնս գրաւիչ եւ անվտանգ, մեր բանակը պէտք է դառնայ տարածաշրջանում տեխնոլոգիապէս ամենայագեցած եւ արդիականը, իսկ իւրաքանչիւր զինծառայող էլ պէտք է ծառայութիւնից յետ վերադառնայ հոգով եւ մարմնով կոփւած, նոր գիտելիքներվ եւ կարողութիւններով հարստացած։

Այդ դէպքում իւրաքանչիւր երիտասարդ հպարտութեամբ կը գնայ ծառայութեան, իսկ նրանց ծնողներն էլ երբեւիցէ չեն մտածի արտագաղթելու մասին։ Մեր Պաշտպանութեան նախարարութեանը պէտք է դրա վրայ կենտրոնացի իր հիմնական ջանքերը, դրա համար է նաեւ պէտք ամէն տարի ընդլայնել մեր պաշտպանական ծախսերը եւ բարձրացնել բանակում կառավարման որակը, իսկ տարբեր իմքայլականներին՝ պէտք է վերջ տալ ծնողների վախերի էժանագին շահարկումը, եւ անմտածւած նախաձեռնութիւններով այլեւս վնաս չհասցնել մեր երկրի անվտանգութեանը։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։