Հա

Քաղաքական

25/01/2020 - 11:20

Երկու պարագայում էլ իշխանութիւնները պարտւելու են. Արթուր Վանեցեանի ներկայացուցիչ

Armtimes.am կայքում հրապարակւած «Պատիւ ունե՞մ, թէ՞ պատիւ չունեմ...» վերտառութեամբ յօդւած նպատակ ունի ստայօդ լուրեր տարածելով՝ հասարակութեան մէջ ինչ-որ դաւադրութիւնների մասին տպաւորութիւն ստեղծել։ Այս մասին երէկ՝ յունւարի 24-ին, News.am-ի հետ զրոյցում ասաց ԱԱԾ նախկին տնօրէն Արթուր Վանեցեանի ներկայացուցիչ Լուսինէ Սահակեանը։

«alikonline.ir» - Armtimes.am կայքում հրապարակւած «Պատիւ ունե՞մ, թէ՞ պատիւ չունեմ...» վերտառութեամբ յօդւած նպատակ ունի ստայօդ լուրեր տարածելով՝ հասարակութեան մէջ ինչ-որ դաւադրութիւնների մասին տպաւորութիւն ստեղծել։ Այս մասին երէկ՝ յունւարի 24-ին, News.am-ի հետ զրոյցում ասաց ԱԱԾ նախկին տնօրէն Արթուր Վանեցեանի ներկայացուցիչ Լուսինէ Սահակեանը։

«Նախ պէտք է գիտակցենք, թէ որ լրատւամիջոցում է այդ նիւթը հրապարակւել, որովհետեւ սա շատ էական է՝ նկատի ունենալով այն հանգամանքը, որ վարչապետի ընտանիքին է պատկանում այն։ Եւ, բնականաբար, հասարակութեան մօտ ակնկալիքներ կան, որ այն նիւթերը, որոնք հրապարակւում են այդ կայքում կամ թերթում, առաւել ստուգւած են, իրական են։ Բնականաբար, հասարակութեան մօտ դրանք շատ աւելի խորը ազդեցութիւն են թողնում։ Եւ այս իրավիճակում այդ լրատւամիջոցը պէտք է գիտակցի, որ այդ նիւթերը, որոնք հրապարակւում են, պէտք է ծառայեն իրաւական, ժողովրդավարական պետութեան ստեղծմանը։ Մինչդեռ, եթէ անդրադառնալու լինենք կոնկրետ այս նիւթին, պէտք է հասկանանք, որ այս նիւթը նախ ճիշտ հակառակ շահի է ծառայում եւ նպատակ ունի ընդամենը նեղ անձնական շահերի ծառայել եւ ստայօդ լուրեր տարածելով՝ հասարակութեան մէջ ինչ-որ դաւադրութիւնների մասին տպաւորութիւն ստեղծել։ Ես էժանակգին մանիպուլեացիա եմ սա որակում»։

Դիտարկմանը, որ ԱԺ պատգամաւոր Հրաչեայ Յակոբեանը նշել էր, որ յեղաշրջման փորձ է եղել, իսկ ԱԱԾ-ից յայտնել էին, որ այդպիսի տեղեկութիւն չունեն, Սահակեանը պատասխանեց. «Այստեղ պէտք է գիտակցենք, թէ ով էր այն անձը, որ նման հարցազրոյց տւեց։ Սա այն անձն է, որը միեւնոյն քաղաքական ուժի անդամ է, ինչ վարչապետը եւ ամենակարեւորը՝ պատգամաւոր։ Եթէ այս երեք գործօնները չլինէին, միգուցէ սա այնքան մեր ուշադրութեանը արժանի չլինէր, սակայն անձը, որը նման յայտարարութիւն է անում, նման առանձնայատկութիւններով անձը պէտք է գիտակցի իր կողմից արւած յայտարարութիւնների լրջութիւնը։ Փաստօրէն նա, զարգացնելով հրապարակման մէջ տեղ գտած, այսպէս ասած, տեղեկութիւնները՝ հասցրեց նրան, որ արդէն պետական յեղաշրջման փորձ է կատարւել։ Այստեղ պէտք է կարեւորենք մի հանգամանք։ Նախեւառաջ, պատգամաւոր լինելով նա պէտք է գիտակցէր, որ պետական յեղաշրջման փորձը յանցագործութիւն է, եւ եթէ նա նման յայտարարութիւն է անում, ապա պէտք է գիտակցի դրա հետեւանքները։ Արդեօ՞ք նա գիտակցում էր դրա հետեւանքները, թէ՞ ոչ եւ գիտակցելով հանդերձ էր արդեօք նա դա անո՞ւմ, թէ՞ ոչ։

Սրանք հարցեր են, որոնց պատասխանները հետագայում արդէն հնչեցին, որովհետեւ ԱԱԾ-ն կոնկրետ պարագայում ցոյց տւեց, որ իր համար պետութեան շահերը շատ աւելին են, քան իշխանութեան որոշ ներկայացուցիչների կամ կոնկրետ ներկայացուցչի նեղ անձնական շահերը եւ հանդէս եկաւ որպէս կառոյց, որը, պետութեան շահերից ելնելով, բնականաբար, ստել չէր կարող եւ ճիշտ ինֆորմացիա հաղորդեց հասարակութեանը, որ, բնականաբար, նման տեղեկութիւններ չկան եւ որեւէ յեղաշրջման փորձ չի եղել։ Սա առնւազն ծիծաղելի է, իհարկէ։ Սրանից յետոյ, իհարկէ Հրաչեայ Յակոբեանը հանդէս եկաւ մէկ այլ հարցազրոյցով, որտեղ ասեց, որ ինքը տպաւորւած է եղել այդ նիւթից եւ այդ տպաւորութեան տակ է, որ նման յայտարարութեամբ է հանդէս եկել, եւ միաժամանակ նաեւ ասաց, որ շատ կարեւոր է, որ ԱԱԾ-ն փարատում է իրեն կասկածները։ Ի՞նչ է նշանակում պատգամաւոր լինելով նիւթից տպաւորւել, եւ առաւել եւս՝ ընտանիքի մի անդամը հրապարակում է, միւս անդամը տպաւորւում է ու հասարակութեան մօտ ստեղծում են տպաւորութիւն, թէ ինչ-որ դաւադրութիւններ են նախապատրաստւել, յեղաշրջման փորձեր են եղել։ Այսինքն պէտք է խօսելուց առաջ մտածեն։ Բայց նշւած իրավիճակում պէտք է նաեւ փաստենք, որ այս հարցազրոյցը շատ կարեւոր էր նաեւ մեզ համար, քանի որ եթէ, իհարկէ, հերքումը չտպագրւի, դատարանում ուղղակի ապացուցելու անհրաժեշտութիւն չունենք, թէ լրատւամիջոցը ինչ նկատի ունէր, որովհետեւ ինքը՝ Հրաչեայ Յակոբեանն է դրա մասին յայտարարել։ Եւ առաւել եւս մի շատ կարեւոր հանգամանք՝ սրանով բացայայտւեց, որի իրականում նիւթը լուրջ տպաւորութիւն է ստեղծում հասարակութեան մօտ։ Եթէ ընտանիքի անդամ պատգամաւորը տպաւորւում է այդ նիւթից եւ նման յայտարարութիւն է անում, էլ ուր մնաց հասարակութիւնը։ Բնականաբար, հասարակութիւնը մոլորեցւել էր այս նիւթի արդիւնքում»։

Լուսինէ Սահակեանը յոյս յայտնեց, որ լրատւամիջոցը կը տարածի հերքմանը տեքստը, երբ արդէն փաստացի հերքւած են այդ նիւթում հրապարակւած տեղեկութիւնները. «Նախեւառաջ ես մեծ յոյս ունեմ, որ այս լրատւամիջոցը պատասխանատու կը գտնւի գոնէ այս պահին, երբ արդէն իսկ հերքւած են այդ նիւթում հրապարակւած տեղեկութիւնները եւ ապացուցման անհրաժեշտութիւն էլ այլեւս չկայ, եւ հերքումը կը տարածեն։ Եթէ հերքումը չտարածեն, բնականաբար, դիմելու ենք դատարան եւ այս պարագայում օրէնքով սահմանւում է, որ զրպարտութիւն տարածող լրատւամիջոցը ինքը պէտք է հիմնաւորի նիւթի արժանահաւատութիւնը եւ, բնականաբար, նրանք դա անել չեն կարող, որովհետեւ նրանք խօսել են մի իրադարձութեան մասին, որը ընդհանրապէս գոյութիւն ունեցել, բնականաբար ի՞նչը պիտի հիմնաւորեն եւ տւեալ պարագայում, բնականաբար, նաեւ որոշակի լրացուցիչ ֆինանսական պարտաւորութիւններ է դրւելու լրատւամիջոցի վրայ։ Չեմ կարծում, որ այս երկրում, եթէ օրինական դատական ակտ կայացնելու լինեն, կը գտնի մի դատաւոր, որ այս պարագայում յանկարծ կարող է մերժել մեր հայցը։ Դա ուղղակի անհնար է։ Կարող է հնարաւոր լինել մի պարագայում՝ եթէ ազդեցութիւն լինի դատարանի նկատմամբ։ Սա շատ աւելի վատ է նոյն իշխանութիւնների համար, քանի որ ոչ մէկի համար գաղտնիք չէ, թէ այս լրատւամիջոցը ում է պատկանում եւ հէնց այս տեսակէտից ելնելով էլ ակնյայտ է դառնալու, որ այս դատական ակտը կայացւել է գործադիր իշխանութեան ճնշման ներքոյ եւ չկայ անկախ դատական համակարգ։ Երկու պարագայում էլ իշխանութիւնները պարտւելու են. մի դէպքում պարտւելու են այն իմաստով, որ հայցը բաւարարւելու է, միւս դէպքում պարտւելու են, որովհետեւ հիմնաւորւելու է, որ իրենք այն իշխանութիւնը չէին, որ պէտք է, որ լինէին եւ որոնք չեն կարողացել ստեղծել այնպիսի դատական համակարգ, որ չենթարկւի իրենց ճնշումներին»։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։