Հա

Քաղաքական

18/02/2020 - 12:10

«Փաշինեանը պէտք է համաշխարհային հանրութեանը ներկայացնէր, որ գոյութիւն ունի Արցախի Հանրապետութիւն». Արցախի ԱԺ փոխնախագահը` Փաշինեան-Ալիեւ հանդիպման մասին

Արցախի խորհրդարանի փոխնախագահ Վահրամ Բալայեանի խօսքով` միւնխէնեան Փաշինեան-Ալիեւ հանդիպումից տպաւորութիւնն այն է, որ Ադրբեջանը շարունակում է պաշտպանել իր առաւելապաշտական ցանկութիւնները, եւ նրա հետ բանակցութիւններ վարելը, հարցին լուծում գտնելն այս պահին անհնարին է:

«alikonline.ir» - Արցախի խորհրդարանի փոխնախագահ Վահրամ Բալայեանի խօսքով` միւնխէնեան Փաշինեան-Ալիեւ հանդիպումից տպաւորութիւնն այն է, որ Ադրբեջանը շարունակում է պաշտպանել իր առաւելապաշտական ցանկութիւնները, եւ նրա հետ բանակցութիւններ վարելը, հարցին լուծում գտնելն այս պահին անհնարին է: Գրում է Tert.am-ը:

Նա նաեւ դիտարկում արեց՝ անդրադառնալով փետրւարի 15-ին Միւնխէնի անվտանգութեան համաժողովի կազմակերպիչների կողմից կազմակերպած ԼՂ հիմնախնդրի կարգաւորմանը նւիրւած քննարկմանը, որին մասնակցում էին Հայաստանի վարչապետ Նիկոլ Փաշինեանն ու Ադրբեջանի նախագահ Իլհամ Ալիեւը:

«Ալիեւը նորից խօսեց Երեւանի մասին, Ադրբեջանի տարածքային ամբողջականութեան մասին եւ այլն: Տպաւորութիւն էր,  որ այս տարածքներն իրենց պապական հողերն էին, մենք էլ վարձով ապրողներ ենք»,- նշեց նա:

Վահրամ Բալայեանի խօսքով` այս քննարկումից յետոյ էլ ինքը վերստին  համոզւեց, որ մեզ մնում է միայն հզօրանալ եւ ուժեղի դիրքերից հանդէս գալ: «Մենք Արցախի հարցը մեկընդմիշտ ճիշտ ճանապարհով լուծել ենք, պարզապէս պէտք է մեր պետականութիւնը պահպանենք»,- ասաց նա:

Անդրադառնալով քննարկմանը Նիկոլ Փաշինեանի խօսքին, արձագանքներին եւ հակափաստարկներին, Արցախի փոխնախագահը նշեց, որ լաւ կը լինէր, որ վարչապետն իր խօսքում օգտագործեր «Արցախի Հանրապետութիւն» եզրոյթը: «Նա պէտք է շեշտէր դա եւ ներկայացնէր համաշխարհային հանրութիւնը, որ գոյութիւն ունի Արցախի Հանրապետութիւն»,- ասաց նա:

Ալիեւի ներկայացրած պատմական իրադարձութիւններին Փաշինեանը համարժէք չի արձագանքել: Ըստ Վահրամ Բալայեանի՝ երբ Ալիեւը խօսում էր Խոջալուից, Նիկոլ Փաշինեանն էլ պէտք է խօսէր Սումգայիթից եւ Բաքւից: «Պէտք է միջազգային հանրութիւնն իմանար, որ եթէ Խոջալուի դէպքերը տեղի են ունեցել պատերազմի ժամանակ, ապա Բաքւինը, Սումգայիթինը տեղի են ունեցել իշխանութիւնների կազմակերպման եւ թոյլտւութեան պայմաններում: Ցեղասպանութիւն էր: Բայց տպաւորութիւն էր ստեղծւել, որ հայերն են ցեղասպանութիւն իրագործել: Այսպիսի բան չկայ»,- ասաց նա` միեւնոյն ժամանակ նկատելով,  որ տեղին էր Նիկոլ Փաշինեանի կողմից Ադրբեջանի նախկին նախագահ Մութալիբովի խոստովանութիւնները:

Վահրամ Բալայեանը նշեց, որ քննարկումից յետոյ նա նորից համոզւեց, որ Հայաստանի կառավարութեան այն մօտեցումը, որ Հայոց պատմութեան դասաւանդումը պարտադիր չպէտք է լինի, սխալ է: «Ես կարծում եմ, որ իսկապէս այն պարտադիր պէտք է լինի, որովհետեւ բազում հարցեր կան, որտեղ պատմագիտութիւնը նաեւ քաղաքագիտութիւն է դառնում»,- ասաց նա:

Բալայեանը նկատեց, որ չնայած Ալիեւը անընդհատ պատմութիւնն էր յիշատակում, բայց այնուամենայնիւ, լաւ պատմութիւն իմանալու դէպքում հնարաւոր էր հակադարձել, քանի որ չկայ մի պատմական փաստ, որ խօսի յօգուտ իրենց:

«Պէտք էր նրան հարցնել, թէ կարելի է գտնել մի 20-րդ դարի քարտէզ, որտեղ  Ադրբեջան հասկացութիւն լինի: Կամ վերջիվերջոյ, մենք 1917 թւականի սեպտեմբերի 24-ին հայկական պետականութիւն ձևաւորեցինք, որը Ադրբեջանի հետ ընդհանրապէս կապ չունէր, եւ այն մնաց մինչեւ 1920-ը` մինչեւ խորհրդայնացումը: Նման փաստեր պէտք է ներկայացւէին,- ասաց նա` նշելով, որ չի կարող ասել, թէ ինչու էր Հայաստանի ղեկավարը թերացել պատմական հակափաստեր ներկայացնելիս,- գուցէ վարչապետը անակնկալի եկաւ: Անընդհատ խօսւում է, որ պէտք է առաջ նայել: Իհարկէ, պէտք է առաջ նայել, բայց միւս կողմից էլ չենք կարող մեր պատմական փաստերը ճիշտ չներկայացնել»:

Անդրադառնալով քննարկմանը երկու երկրների ղեկավարների խօսքից բանակցային գործընթացի մասին տեղեկատւութեան բացայայտմանը՝ ԱԺ փոխնախագահը նկատեց` Ալիեւը խօսում էր կարգաւորման փուլային տարբերակից, իսկ Փաշինեանը՝ կարծես փաթեթայինից: «Ես ընդհանրապէս կողմ եմ, որ Արցախի կարգավիճակը յստակեցւի Սահմանադրութեամբ հռչակւած իր տարածքներով,- ասաց նա` նշելով, որ սխալ էին նաեւ Ալիեւի այն պնդումները, որ ազատագրւած տարածքներում հայեր չեն ապրել,-եթէ չեն ապրել, ապա Դադիվանքը ո՞վ է կառուցել: Թող գայ, մէկ անգամ տեսնի, թէ այնտեղ ովքեր են ապրել. ամբողջ տարածքը խաչքարեր են»:

Անդրադառնալով Նիկոլ Փաշինեանի յայտարարութիւններին, որ ինքը ցանկանում է «մինիյեղափոխութիւնների» միջոցով հասնել հիմնահարցի կարգաւորմանը` Վահրամ Բալայեանը նշեց, որ ինքը չհասկացաւ՝ խօսքը ինչի մասին է: «Մենք պէտք է խօսենք կարգաւորման մասին»:

Դիտարկմանը, թէ պարզ է` ինչ է ցանկանում Ադրբեջանը, իսկ հայկական կողմի պահանջը պարզ դարձա՞ւ, Վահրամ Բալայեանը պատասխանեց. «Յստակ է այն տեսանկիւնից, որ խօսւեց, որ Արցախում ապրող հայ մարդու ապրելու իրաւունքը պէտք է պաշտպանւի, եւ այդ խօսքն ուղղւած էր ոչ միայն Ադրբեջանին, այլ նաեւ համաշխարհային հանրութեանը»:

Մէկ այլ դիտարկմանը, թէ ինչ կարծիք ունի վարչապետի այն յայտարարութեան վերաբերեալ, որ Արցախի դէպքում չկան տարածքներ, կայ անվտանգութիւն, Արցախի ԱԺ փոխնախագահը պատասխանեց. «Ես համաձայն չեմ դրա հետ: Հնարաւոր է, որ պատերազմի սկզբից այդպէս է եղել, բայց իրականում մենք ազատագրել ենք մեր պատմական տարածքները, որտեղ հայերը դարեր շարունակ ապրել են, եկեղեցի են կառուցել: Ի՞նչ անենք, որ ինչ-որ մի պահի իրենք ուժեղ են եղել, նւաճել են այդ տարածքները: Հիմա եկել է ժամանակը, որ այդ տարածքներին մենք տիրութիւն անենք»:

Այնուամենայնիւ, այս իրավիճակում էլ, երբ Ադրբեջանը առաւելապաշտական քաղաքականութիւն է վարում, ըստ Վահրամ Բալայեանի, պէտք է խօսել, պէտք է շփումներ ունենալ, բայց պէտք է դա անել Արցախի Հանրապետութեան ներկայացուցիչների մասնակցութեամբ: «Պէտք է բանակցել, դրա այլընտրանքը պատերազմն է լինելու: Պէտք է նաեւ համաշխարհային հանրութեանը ներկայացնել, թէ որն է պատմական ճշմարտութիւնը»:

 

Հռիփսիմէ Յովհաննիսեան

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։