Հա

Քաղաքական

06/06/2020 - 13:30

«Դաշնակցութեան պահանջը տեղին է եւ միանշանակ ճիշտ». Ա. Վանեցեան

ՀՅԴ վերջին յայտարարութեան, ՀՀ իշխանութիւնների ձախողումների եւ ստեղծւած իրավիճակից դուրս գալու ուղիների վերաբերեալ Yerkir.am-ը կարճատեւ զրոյց ունեցաւ ԱԱԾ նախկին տնօրէն, «Հայրենիք» կուսակցութեան նախագահ Արթուր Վանեցեանի հետ։

«alikonline.ir» - ՀՅԴ վերջին յայտարարութեան, ՀՀ իշխանութիւնների ձախողումների եւ ստեղծւած իրավիճակից դուրս գալու ուղիների վերաբերեալ Yerkir.am-ը կարճատեւ զրոյց ունեցաւ ԱԱԾ նախկին տնօրէն, «Հայրենիք» կուսակցութեան նախագահ Արթուր Վանեցեանի հետ։

 

- Պարո՛ն Վանեցեան, Դուք ծանօ՞թ էք Դաշնակցութեան յայտարարութեանը, որով առաջարկւում է հրաւիրել Ազգային ժողովի յատուկ նիստ, քննարկել եւ գնահատական տալ կառավարութեանն ու վարչապետի գործունէութեանը կորոնավիրուսի համավարակի դէմ պայքարի գործում, ինչպէս նաեւ պատասխանատւութեան կանչել գործը ձախողած պաշտօնեաներին։ Ի՞նչ կարծիք ունէք այս պահանջի մասին։

- Այո, ծանօթ եմ եւ ճիշտ եմ համարում այդ պահանջը, քանի որ նախ փաստ է՝ վարչապետն ու մի շարք պատասխանատուներ ոչ միայն ձախողել են կորոնավիրուսի դէմ պայքարը, այլ նաեւ այդ ձախողումները փորձում են բարդել բոլորի վրայ, բացի իրենցից։ Սահմանադրութեան համաձայն՝ Ազգային ժողովն է առաջնային մանդատով օժտւած այն բարձրագոյն քաղաքական մարմինը, որը կառավարութեան եւ նրա իւրաքանչիւր անդամի գործունէութեան նկատմամբ ունի վերահսկողութեան եւ քաղաքական պատասխանատւութեան ենթարկելու իրաւունք։ Բնական է, որ վարչապետն ու ձախողած միւս պաշտօնատար անձինք պէտք է բացատրութիւն տան եւ պատասխանատւութեան կանչւեն երկրում ստեղծւած վիճակի համար։

Չպէտք է անտեսել նաեւ այն հանգամանքը, որ, կորոնավիրուսի համավարակի պայքարի սկզբնական փուլից սկսած, ինչպէս Դաշնակցութիւնը, այնպէս էլ մենք եւ այլ քաղաքական ուժեր ու անձինք, իշխանութիւններին բազմաթիւ առաջարկութիւններ են ներկայացրել, համաընդհանուր ներուժի մեկտեղմամբ վիրուսի տարածման դէմ պայքարի կոչեր են հնչեցրել, այդ նպատակով գործողութիւններ են ձեռնարկել։ Սակայն քաղաքական իշխանութեան արձագանքը եղել է այս ամէնն անտեսելը, մարդկանց եւ քաղաքական ուժերին պիտակաւորելը, ատելութեան եւ թշնամանքի մթնոլորտը խորացնելը։

Արդիւնքում` համավարակի դէմ պայքարի ամբողջական ձախողում։ Այնպէս որ՝ Դաշնակցութեան Գերագոյն մարմնի պահանջը տեղին է եւ միանշանակ ճիշտ։ Աւելին, սա հնարաւորութիւն է քաղաքական մեծամասնութեանը, որպէսզի նրանք, ի վերջոյ, զգան ժողովրդի ներկայացուցիչ լինելու հանգամանքը, գնահատեն կառավարութեան ու վարչապետ Փաշինեանի գործողութիւնները եւ կատարեն համապատասխան եզրակացութիւններ։

Հանրութիւնը խորհրդարանական ընդդիմութիւնից ակնկալում է հրատապ եւ համաչափ գործողութիւնների իրականացում։ Կոչ եմ անում խորհրդարանական ընդդիմութիւն ԲՀԿ-ին եւ ԼՀԿ-ին` հէնց հիմա ստեղծել Ազգային ժողովի քննիչ յանձնաժողով, շատ արագ վարչապետին ու կառավարութեան պատասխանատուներին բերել խորհրդարան, քննել նրանց կողմից թոյլ տրւած գործողութիւններն ու անգործութիւնը եւ դրանց տալ քաղաքական անհրաժեշտ գնահատական, որոշ գործողութիւնների համար էլ հրատապ նախաձեռնել քրէական պատասխանատւութեան ենթարկելու գործընթաց։

 

- Դուք՝ որպէս կուսակցութեան նախագահ, ակտիւօրէն զբաղւում էք կուսակցական-քաղաքական գործունեութեամբ։ Տեսնո՞ւմ էք, արդեօք, Դաշնակցութեան հետ համագործակցութեան հնարաւորութիւն եւ ի՞նչ օրակարգով։

- Ոչ միայն տեսնում եմ, այլեւ անհրաժեշտ եմ համարում առողջ ուժերի համագործակցութիւնը։ Նախ արձանագրենք, որ 130 տարւայ մեր աւանդական կուսակցութիւնն իր փորձով, հնարաւորութիւններով, համաշխարհային կապերով ու կադրային բանկով հսկայական ներուժ ունի։ Այն մեր ժողովրդի հարստութիւնն է։ Այն իշխանութիւնը եւ առհասարակ քաղաքական ուժը, որը չի արժեւորում Դաշնակցութեանը եւ չի ձգտում համագործակցել ազգային այս ուժի հետ, նշանակում է՝ թերի է տեսնում մեր ազգային երազանքները կամ փորձում է դրանք ծառայեցնել իր փոքր քաղաքական նպատակներին։ Դաշնակցութիւնը եղել է, կայ ու դեռ շարունակելու է լինել մեր ազգի ամենակենսունակ քաղաքական դիմադրողականութեան հիմնական կրողներից։ Հետեւաբար, իմ կարծիքով, «Հայրենիք» եւ ՀՅ Դաշնակցութիւն կուսակցութիւններն ունեն համագործակցութեան օրակարգ, եւ դա բխում է մեր պետութեան կենսական եւ անվտանգութեան շահերից։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։