Հա

Քաղաքական

01/07/2020 - 13:25

Հայաստա՞ն, թէ՞ «խաղաղութիւն»

Ս․ թ․ յունիսի 27-ին կարդացի, որ ՀՀ ԱԺ «Լուսաւոր Հայաստան» խմբակցութեան, ներեցէք, «անկախ» պատգամաւոր Արման Բաբաջանեանը հանդիպում է ունեցել Արցախի նորընտիր նախագահ Արայիկ Յարութիւնեանի հետ։ Հանդիպման բուն թեման եղել է՝ Արցախը յանձնել Ադրբեջանին։ Այլ կերպ չես կարող մեկնաբանել Արման Բաբաջանեանի առաջարկութիւնը, թէ Արցախի հարցը պէտք է լուծւի Լեւոն Տէր-Պետրոսեանի «Պատերա՞զմ, թէ՞ խաղաղութիւն», իսկ իրականում՝ «Հայաստա՞ն, թէ՞ «խաղաղութիւն»» յօդւածի հայեցակարգին համապատասխան։

ԱՒԵՏԻՔ ԻՇԽԱՆԵԱՆ

 

Ս․ թ․ յունիսի 27-ին կարդացի, որ ՀՀ ԱԺ «Լուսաւոր Հայաստան» խմբակցութեան, ներեցէք, «անկախ» պատգամաւոր Արման Բաբաջանեանը հանդիպում է ունեցել Արցախի նորընտիր նախագահ Արայիկ Յարութիւնեանի հետ։ Հանդիպման բուն թեման եղել է՝ Արցախը յանձնել Ադրբեջանին։ Այլ կերպ չես կարող մեկնաբանել Արման Բաբաջանեանի առաջարկութիւնը, թէ Արցախի հարցը պէտք է լուծւի Լեւոն Տէր-Պետրոսեանի «Պատերա՞զմ, թէ՞ խաղաղութիւն», իսկ իրականում՝ «Հայաստա՞ն, թէ՞ «խաղաղութիւն»» յօդւածի հայեցակարգին համապատասխան։ Հրապարակմանը հետեւեց՝ ինչպէս Արցախի նախագահ Արայիկ Հարությունեանի մամլոյ քարտուղարի հերքումը, այնպէս էլ իր՝ Արման Բաբաջանեանի հերքումն առ այն, որ ինչ-ինչ մարդիկ իրենց էջում կեղծ լուր են տեղադրել։ Հակւած եմ հաւատալ Արցախի նախագահին, սակայն արդեօք Արման Բաբաջանեանն անկե՞ղծ է եւ արդեօք այդ «կեղծ» հրապարակումով չի՞ փորձել հանրութեան տրամադրութիւնները ստուգել, եւ ինքնուրո՞յն է գործել, արդեօք։

Յամենայն դէպս, հետեւելով այդ գործչի գործունէութեանն ու նրա լրատւամիջոցի գաղափարախօսութեանը՝ անձամբ ես աւելի քան հիմնաւոր կասկածներ ունեմ։ Արդէն սկսում ես իսկապէս հաւատալ դաւադրութիւնների տեսութեանը։ Յիշեցի 2007 թ․ Նիկոլ Փաշինեանի նախաձեռնած «Այլընտրանք» դաշինքի սկզբունքները․ Դաշինքն առաջնորդւում էր ՀՀ Սահմանադրութեան եւ Լեւոն Տէր-Պետրոսեանի «Պատերա՞զմ, թէ՞ խաղաղութիւն» յօդւածի դրոյթներով։ 2008 թ․ ինչպէս Նիկոլ Փաշինեանի «Հայկական Ժամանակ», այնպէս էլ Արման Բաբաջանեանի հիմնադրած «ժամանակ» օրաթերթը Լեւոն Տէր-Պետրոսեանի քարոզչամեքենաներն էին։ Հետագայում, քաղաքականապէս հեռանալով Լեւոն Տէր-Պետրոսեանից, կարծում էի, որ Նիկոլ Փաշինեանը նրանից հեռացաւ նաեւ գաղափարապէս։ Արդեօ՞ք․․․ Արդեօ՞ք Արցախի հարցի այնպիսի լուծում, որ կը բաւարարի եւ Հայաստանի եւ Արցախի եւ Ադրբեջանի ժողովուրդներին, չի տանում դէպի «Հայաստա՞ն, թէ՞ «խաղաղութիւն»» հայեցակարգին։

Չակնկալելով հիմնաւոր պատասխաններ, ամէն դէպքում հրապարակային ձեւով դիմում եմ հայաստանեան տարբեր քաղաքական ուժերին եւ գործիչներին․

1. «Լուսաւոր Հայաստան» կուսակցութեանն ու նրա ղեկավար Էդմոն Մարուքեանին․

Յարգելի Էդմոն Մարուքեան եւ լուսաւորականներ, ձեր կուսակցութիւնը, բացի լիբերալ-ազատական գաղափարախօսութեանը դաւանելուց, ի՞նչ մօտեցում ունի Արցախի հարցում։ Համաձա՞յն էք՝ Արցախի թէկուզ ամենալայն ինքնավարութեան կարգավիճակ Ադրբեջանի կազմում։ Եթէ ոչ, ապա Արման Բաբաջանեանին ձեր ցուցակ ընդգրկելուց առաջ այդ մասին նրա կարծիքին տեղեկացւե՞լ էք արդեօք։

2. «Սասնայ Ծռերի» հենքի վրայ ստեղծւած «Ազգային-ժողովրդավարական» դաշինքի անդամներին։

Յարգելի ազգային-ժողովրդավարներ, դուք արձագանքում էք ցանկացած յայտարարութեան, գործողութեան, որոնք ըստ ձեզ՝ վտանգում են Արցախը։ Աւելին, դուք կողմ էք Քուռ-Արաքսեան միացեալ Հայաստանին։ Սակայն անհասկանալի լռութիւն էք պահպանում ԱԺ պատգամաւորի նախաձեռնութեանը։ Եթէ համոզւած էք, որ այն կեղծ է, ապա ինչո՞ւ էք հաւատում եւ տարածում տարբեր «յեղաշրջումների» մասին չստուգւած լուրերը։

3. ՀՀ վարչապետ Նիկոլ Փաշինեանին եւ «Իմ Քայլը» խմբակցութեան անդամներին․

Յարգելի Նիկոլ Փաշինեան եւ իմքայլականներ։ Խնդրում եմ յստակ յայտարարել, արդեօք ձեզ համար ընդունելի՞ է Արցախի հարցի լուծման այնպիսի տարբերակ, որ Արցախը յայտնւի Ադրբեջանի կազմում։ Թէ՞, եթէ այդպիսի լուծմանը «հաւանութիւն» տան Հայաստանի, Արցախի եւ Ադրբեջանի ժողովուրդները, ապա․․․ Կուզենայի յիշեցնել, որ այդպիսի «լուծում» արդէն ունեցել ենք 1923թ․, երբ Արցախում անցկացւեց «հանրաքւէ» Արցախն Ադրբեջանի կազմում լինելու վերաբերեալ։ Թէ՞, յարգելի իմքայլականներ, դուք այնքան էք վստահում ձեր առաջնորդին, որ, եթէ նա մէկ նախադասութիւն էլ ներկայացնի ԱԺ, դուք կողմ կը քւէարկէք։

4. Արցախի Նախագահ Արայիկ Յարութիւնեանին, նորընտիր իշխանութիւններին, այլ քաղաքական գործիչներին (իհարկէ, ոչ մի դէպքում Լեռնային Ղարաբաղի հայկական համայնքի ընտրեալ ներկայացուցիչներ)․

Յարգելի նախագահ Արայիկ Յարութիւնեան եւ արցախցի գործիչներ, վստահելով ձեր սկզբունքայնութեանը, բայց խնդրում եմ բացատրել, ի՞նչ իմաստ ունէր ամենաբարձր մակարդակով ընդունել «Յանուն Հանրապետութեան» նախաձեռնութեան անդամներին եւ նրա դասալիք ղեկավարին։ Ի դէպ, միայն նախաձեռնութեան անւանումն ինքնին կասկածներ է հարուցում՝ ոչ թէ յանուն Հայաստանի (նկատի ունեմ Հայաստանի Հանրապետութիւն եւ Արցախ), այլ հանրապետութեան։ Ի դէպ, նախաձեռնութեան էջում ոչ մի բառ չկայ Արցախի մասին։ Իսկ, այսպէս կոչւած, «յանուն հանրապետութեան», կարգախօսը, հաւանաբար համահունչ է Լեւոն Տէր-Պետրոսեանի յայտնի թեզերին։

Համոզւած եմ, որ հնչեցրած հարցերը մնալու են հռետորական եւ ոչ մի տրամաբանական պատասխանի չեն արժանանալու, լաւագոյն դէպքում՝ «մենք որ․․․ դուք ո՞ւր էիք, մենք գիտենք ինչ անել, էդ ձեր ․․․», եւ վիրաւորանքներ, հայհոյանքներ եւ այլն։

Իսկ ես խիստ անհանգստացած եմ, եթէ Արցախի հարցում միասնական չլինենք եւ, ներեցէք, եթէ «ատամներով» չպահպանենք Արցախի անկախութիւնը եւ եթէ առաջնորդւենք «Պատերա՞զմ, թէ՞ խաղաղութիւն» յօդւածի թեզերով, ապա հաւատացած եղէք, Հայաստանը մօտ ապագայում կը վերածւի թուրքական վիլայեթի։

Յ․Գ․ Յայտնի հաղորդագրութեան մէջ հանդիպման մասին կար նաեւ «ոչ կեղծ» տեղեկութիւն․ «Բաբաջանեանը կարեւորել է նաեւ երիտասարդների ռազմահայրենասիրական դաստիարակութիւնը եւ պարտադիր զինւորական ծառայութեան պատշաճ կատարումը»: Հայկական բանակում ծառայած եւ բարձր արդիւնքներ գրանցած, ռազմական մեծ փորձառութիւն ունեցող, ռազմական բարձր մակարդակի փորձագէտի հետ նման քննարկումներն իսկապէս շատ կարեւոր են։

 

168.am

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։