Հա

Քաղաքական

16/07/2020 - 12:10

«Զգուշացնում ենք, որ Հայաստանի ու Արցախի պետական սահմանների հանդէպ ցանկացած ոտնձգութիւն կը ստանայ համարժէք պատասխան». ԱՀ ԱԺ

Արցախի Հանրապետութեան Ազգային ժողովի խմբակցութիւնները յայտարարութիւն են տարածել, որում դատապարտում են վերջին օրերին հայ-ադրբեջանական սահմանին Ադրբեջանի հրահրած մարտական գործողութիւնները։

«alikonline.ir» - Արցախի Հանրապետութեան Ազգային ժողովի խմբակցութիւնները յայտարարութիւն են տարածել, որում դատապարտում են վերջին օրերին հայ-ադրբեջանական սահմանին Ադրբեջանի հրահրած մարտական գործողութիւնները։

Յայտարարութեան տեքստը՝ ստորեւ:

«Արցախի Հանրապետութեան Ազգային ժողովի խմբակցութիւնները խստօրէն դատապարտում են վերջին օրերին հայ-ադրբեջանական սահմանին Հայաստանի Հանրապետութեան Տաւուշի մարզի ուղղութեամբ Ադրբեջանի հրահրած մարտական գործողութիւնները, որոնք յանգեցրել են մարդկային զոհերի:

Թիրախաւորելով այկական բնակավայրերը՝ Ադրբեջանի ռազմաքաղաքական ղեկավարութիւնը սեփական ժողովրդին ներքաշում է հերթական արկածախնդրութեան մէջ, որը յղի է իր իսկ համար աղետալի հետեւանքներով:

Հաւատարիմ մնալով հրադադարի պահպանման եւ ադրբեջանա-ղարաբաղեան հակամարտութիւնը բանակցային եղանակով լուծելու սկզբունքին՝ միաժամանակ, զգուշացնում ենք, որ Հայաստանի ու Արցախի պետական սահմանների հանդէպ ցանկացած ոտնձգութիւն կը ստանայ համարժէք պատասխան:

Փաստում ենք, որ համավարակի արագ տարածման պայմաններում, երբ ողջ աշխարհը ուժերը միաւորել է համաշխարհային ծանր առողջապահական ու տնտեսական ճգնաժամը յաղթահարելու համար, Ադրբեջանի եւ նրա ռազմական հովանաւոր Թուրքիայի նման ագրեսիւ վարքագիծը վտանգաւոր է ինչպէս Հայաստանի ու Արցախի, այնպէս էլ` ողջ տարածաշրջանի համար:

ԵԱՀԿ Մինսկի խմբին կոչ ենք անում վճռականօրէն դատապարտել Ադրբեջանի նման պահւածքը եւ անհրաժեշտ մեխանիզմներ կիրառել իրավիճակի հետագայ սրացումը կասեցնելու, տարածաշրջանում կայունութիւնն ու խաղաղութիւնը անխաթար պահելու համար:

«Ազատ հայրենիք-ՔՄԴ» խմբակցութիւն

«Միասնական հայրենիք» խմբակցութիւն

Արցախի «Արդարութիւն» խմբակցութիւն

«Հայ Յեղափոխական Դաշնակցութիւն» խմբակցութիւն

«Արցախի ժողովրդավարական կուսակցութիւն» խմբակցութիւն»:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։