Հա

Քաղաքական

27/09/2020 - 16:31

«Սա պատերազմ է մեր անկախութեան, արժանապատւութեան դէմ, հայ ժողովուրդը պատրաստ է արժանի հակահարւած տալու թշնամուն, որն այս պահին կրում է մարդկային եւ զինտեխնիկայի զգալի կորուստներ»․ ՀՀ վարչապետի ուղերձը

ՀՀ վարչապետ Նիկոլ Փաշինեանն ուղերձ է յղել, որում, մասնաւորապէս, ասւած է․

«alikonline.ir» - ՀՀ վարչապետ Նիկոլ Փաշինեանն ուղերձ է յղել, որում, մասնաւորապէս, ասւած է․

«Սիրելի հայրենակիցներ,

Հայաստանի Հանրապետութեան հպարտ քաղաքացիներ,

Արցախի հանրապետութեան հպարտ քաղաքացիներ,

Սփիւռքի հպարտ հայութիւն,

Քոյրեր եւ եղբայրներ,

Այսօր վաղ առաւօտից Արցախի Հանրապետութիւնը ենթարկւել է ադրբեջանական զինւած ուժերի ագրեսիային:

Ռմբակոծութեան են ենթարկւում Արցախի խաղաղ բնակչութիւնը, մայրաքաղաք Ստեփանակերտը, Արցախի Հանրապետութեան քաղաքացիական ենթակառուցւածքները: Այս պահի դրութեամբ կան արդէն զոհեր եւ վիրաւորներ, այդ թւում՝ խաղաղ բնակչութեան շրջանում:

Օգտագործելով ծանր սպառազինութիւն, հրետանի, հետեւակ՝ հակառակորդը գրոհի է ենթարկում պաշտպանութեան բանակի դիրքերը՝ բոլոր ուղղութիւններով: Պաշտպանութեան բանակը այս պահի դրութեամբ յամառ մարտեր է մղում եւ պատւով է կատարում Արցախը պաշտպանելու իր խնդիրը՝ ձեռնարկելով իրավիճակից բխող գործողութիւններ: 

Սիրելի ժողովուրդ,

Իլհամ Ալիեւի բռնատիրական վարչակազմը վերստին անցել է պատերազմական գործողութիւնների: Դա հայ ժողովրդին յայտարարւած պատերազմ է: Դա պատերազմ է մեր անկախութեան, ազատութեան եւ արժանապատւութեան դէմ:

Հայ ժողովուրդը պատրաստ է այդ պատերազմին: Քանզի միշտ սթափ գիտակցել է, որ հայատացութիւնը, թշնամանքը եւ ատելութիւնը, որով տասնամեակներ ի վեր ադրբեջանական բռնապետութիւնը սնում է իր ժողովրդին, չէր կարող որեւէ այլ արդիւնքի յանգեցնել, քան պատերազմը: Ադրբեջանի բռնապետութիւնն իր իսկ վարած հակահայկական քաղաքականութեան պատանդն է դարձել եւ այսօր փորձում է արդարացնել իր իսկ որդեգրած քարոզչական խոստումները՝  Ղարաբաղեան հակամարտութիւնը ռազմական միջոցներով լուծելու մասին:

Հայ ժողովուրդը պատրաստ է արժանի հակահարւած հասցնել թշնամուն: Հայաստանի Հանրապետութիւնը Արցախի Հանրապետութեան անվտանգութեան եւ անկախութեան երաշխաւորն է: Եւ Հայաստանի Հանրապետութիւնը իր բնակչութեան ու պետական համակարգի ողջ ներուժով այսօր կանգնած է Արցախի թիկունքին: Մենք գործադրելու ենք հնարաւոր եւ անհնարին ամէն ջանք մեր հայրենիքի սահմանները անառիկ պահելու, մեր ազատութիւնն ու անկախութիւնը պաշտպանելու համար: Որպէս 1994 թ. հրադադարի համաձայնագիրը ստորագրած կողմ՝ Հայաստանի Հանրապետութիւնը քաղաքական, դիւանագիտական եւ ռազմական հարթակներում ձեռնարկելու է անհրաժեշտ գործողութիւններ՝ ԼՂ ժողովրդի ֆիզիկական անվտանգութիւնը ապահովելու եւ հակառակորդին խաղաղութիւն պարտադրելու նպատակով։

Այս պահի դրութեամբ հակառակորդն արդէն իսկ կրում է մարդկային եւ զինտեխնիկայի զգալի կորուստներ: Ադրբեջանը պէտք է քաջ գիտակցի, որ մեր բանակի մարտունակութիւնն այսօր բարձր է, քան երբեւէ: Թշնամին պէտք է հասկանայ, որ Արցախի թիկունքին այսօր կանգնած է համայն հայութիւնը:

Մենք միասնական ենք ինչպէս միշտ: Մենք միասնական ենք, ինչպէս եղել ենք մեր պատմութեան վճռորոշ բոլոր պահերին, երբ ոսոխը սպառնացել է մեր գոյութեանը, մեր ինքնութեանն ու արժէքներին: Ադրբեջանի բռնապետ իշխանութիւնները պէտք է հասկանան, որ անհնարին է ծնկի բերել հայ ժողովրդին: Մենք մեր հազարամեայ պատմութեան ընթացքում ունեցել ենք բազմաթիւ վճռորոշ պահեր եւ յաղթահարել բազում դժւարութիւններ: Մեր գործն արդար է եւ այս յանցաւոր ոտնձգութիւնը եւս արժանի հակահարւած կը ստանայ:  

Մենք լաւ գիտակցում ենք, որ ադրբեջանական բռնապետութիւնը ռազմական գործողութիւններ կարող է սկսել նաեւ Հայաստանի Հանրապետութեան սահմանների ուղղութեամբ ու դիմել տարբեր սադրանքների՝ տարածաշրջանում իրավիճակն ամբողջովին ապակայունացնելու համար: Այս է պատճառը, որ կառավարութեան որոշմամբ Հայաստանի Հանրապետութիւնում յայտարարւել է ռազմական դրութիւն եւ ընդհանուր զօրահաւաք:

ԵԱՀԿ Մինսկի խմբի համանախագահ պետութիւնների եւ միջազգային ողջ հանրութեան ուշադրութիւնը հրաւիրում եմ իրավիճակի լրջութեան վրայ: Հարաւային Կովկասում լայնածաւալ պատերազմի բռնկումը, որի շեմին մենք հիմա կանգնած ենք, կարող է ամենաանկանխատեսելի հետեւանքներն ունենալ: Այն կարող է դուրս գալ տարածաշրջանի սահմաններից եւ ձեռք բերել շատ աւելի լայն մասշտաբներ՝ սպառնալով միջազգային անվտանգութեանն ու կայունութեանը:

Միջազգային հանրութեանը կոչ եմ անում գործադրել ազդեցութեան բոլոր լծակները՝ զերծ պահելու Թուրքիային հնարաւոր բոլոր միջամտութիւններից, ինչը վերջնականապէս կապակայունացնի իրավիճակը տարածաշրջանում: Թուրքիայի ագրեսիւ վարքագիծը, որը խիստ վտանգաւոր դրսեւորում ունեցաւ յատկապէս յուլիսեան դէպքերի ժամանակ եւ շարունակւում է այսօր, լուրջ մտահոգութեան տեղիք է տալիս: Թուրքիայի նման վտանգաւոր կեցւածքի պահպանումը ամենակործանարար հետեւանքներով է յղի Հարաւային Կովկասի եւ յարակից տարածաշրջանների համար: Միջազգային հանրութիւնը պէտք է միասնական ջանքերով կանխի դէպքերի վտանգաւոր զարգացումը եւ տարածաշրջանը զերծ պահի ապակայունացնելու բոլոր փորձերից:    

Սիրելի հայրենակիցներ,

Այսօր մենք կանգնած ենք լուրջ վտանգի առաջ: Իրավիճակը աւելի է բարդանում համավարակի պայմաններում: Ուստի պահի լրջութիւնը պահանջում է մեր բոլորի զգօնութիւնը: Մեր յաղթանակը կախւած է մեզնից իւրաքանչիւրի անհատական եւ մեր միասնական,  հաւաքական ջանքից եւ պահւածքից:

Կոչ եմ անում բոլորին ցուցաբերել բարձրագոյն աստիճանի կարգապահութիւն եւ բարձր քաղաքացիական գիտակցութիւն: Եւ մենք կը յաղթենք:

Եւ ուրեմն՝

Կեցցէ Ազատութիւնը,

Կեցցէ Հայաստանի Հանրապետութիւնը,

Կեցցէ Արցախի Հանրապետութիւնը,

Կեցցենք մենք եւ մեր երեխաները, որ ապրելու ենք Ազատ եւ Երջանիկ Հայաստանում, Ազատ եւ Երջանիկ Արցախում: 

Փառք Հայոց բանակին:

Հաւէրժ փառք Հայ զինւորին»: 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։