Հա

Քաղաքական

24/11/2020 - 19:40

«Կառավարութիւնից որեւէ մէկն ինձ չի մօտեցել, ոչ էլ ակնկալում եմ, զրոյցն իմաստ չունի, որովհետեւ պահանջը մէկն է՝ Փաշինեանը պէտք է հեռանայ». Գեղամ Մանուկեան

Բոլոր մեթոդները կիրառելի են, որովհետեւ րոպէ առաջ Նիկոլ Փաշինեանի հեռանալը կենսական անհրաժեշտութիւն է Հայաստանի եւ Արցախի համար եւ առաջին հերթին, որ վերականգնւի պետական համակարգի գործունէութիւնը:

«alikonline.ir» - Բոլոր մեթոդները կիրառելի են, որովհետեւ րոպէ առաջ Նիկոլ Փաշինեանի հեռանալը կենսական անհրաժեշտութիւն է Հայաստանի եւ Արցախի համար եւ առաջին հերթին, որ վերականգնւի պետական համակարգի գործունէութիւնը: Այս մասին Tert.am-ի հետ զրոյցում ասաց «Երկիր մեդիա» ՀԸ լրատւական բաժնի տնօրէն Գեղամ Մանուկեանը՝ անդրադառնալով հարցին, թէ ինչու է ընտրել հացադուլի մեթոդը, մի՞թէ Փաշինեանի հրաժարականը պահանջելու պայքարի այլ ձեւ չի մնացել:

«15 օր է անցել այդ չարաբաստիկ յայտարարութեան ստորագրումից, 15 օր շարունակ որեւէ քայլ չի իրականացւել, մինչեւ դժբախտութեան մէջ գտնւող մեր հարիւրաւոր հայրենակիցներ չգնացին Կառավարութիւն, Պաշտպանութեան նախարարութիւն, դրանից յետո՞յ միայն պէտք է պետութիւնը գործի անցնէր: Պետական համակարգը չէր գիտակցում հարցը, քանի որ պետական համակարգի գլխին, անճար, պոպուլիստ մի մարդ է, որը կառավարչական որեւէ հմտութիւն, ունակութիւն չունի՝ վկան վերջին 2.5 տարին»,- ասաց նա:

Հարցին՝ Կառավարութիւնից որեւէ մէկը մօտեցե՞լ է իրեն, նա պատասխանեց. «Ոչ մէկ չի մօտեցել ինձ, ոչ էլ ակնկալում եմ, որ մօտենան, զրոյցը որեւէ իմաստը չունի, որովհետեւ պահանջը մէկն է»:

Գեղամ Մանուկեանը նշեց, որ մարդիկ բոլորն էլ հասկանում են, որ այս մարդը պէտք է գնայ եւ նախարարներին փոխելը որեւէ էական փոփոխութիւն չի մտցնում: «Իր հռչակած այդ 15 կէտանոց ճանապարհային քարտէզում էլ, որտեղ իր հրաժարականի մասին խօսք չկայ, առաջին կէտով խօսում է Ղարաբաղեան հարցի բանակցութիւնների մասին, այս մարդը պարտւած, խայտառակւած է, խայտառակւած մարդը չի կարող Արցախեան բանակցութիւններ առաջ տանել»,- ընդգծեց նա:

Գեղամ Մանուկեանը նշեց, որ իր ինքնազգացողութիւնը լաւ է:

Նշենք, որ արդէն երկու օր հացադուլ իրականացնող Գեղամ Մանուկեանին միացել է նաեւ ՍԴ նախկին դատաւոր Կիմ Բալայեանը: Նրանց այցելեցին մի շարք քաղաքական գործիչներ, ինչպէս նաեւ մտահոգ քաղաքացիներ, որոնք իրենց աջակցութիւնն էին յայտնում եւ յորդորում էին դադարեցնել հացադուլը, պայքարել այլ գործիքակազմով:

Յիշեցնենք, որ Գեղամ Մանուկեանի հացադուլի պահանջը մէկն է՝ Նիկոլ Փաշինեանի հրաժարականը, իսկ Կիմ Բալայեանը պահանջում է քրէական պատասխանատւութեան ենթարկել իշխանութիւններին՝ սահմանադրական կարգը տապալելու համար։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։