Հա

Քաղաքական

10/12/2020 - 11:35

«Խորհուրդ կը տայի պրն. Փաշինեանին չձգձգել սեփական հրաժարականը, որն արդէն անխուսափելի է դարձել». Աւետիք Չալաբեան

Այս պայմաններում, սեփական հրաժարականը ձգձգելու եւ երկիրը անիմաստ անորոշութեան մէջ պահելու փոխարէն, շատ աւելի պատասխանատու կը լինէր նոյն ընտրողների առաջ՝ բանակցութիւններ նախաձեռնել հիմնական քաղաքական ուժերի հետ, պայմանաւորւել նոր կառավարութեան գործունէութեան սկզբունքների եւ անհրաժեշտ երաշխիքների համակարգի մասին, եւ հիմա արժանապատիւ հեռանալ զբաղեցրած պաշտօնից։

«alikonline.ir» - Աւետիք Չալաբեանը ֆէյսբուքեան իր էջում գրել է.

«Երէկ ելոյթ ունենալով Ազգային ժողովում, Կապիտուլեացիայի աղէտալի համաձայնագիրը ստորագրած, բայց մինչեւ հիմա վարչապետի պաշտօնը յամառօրէն զբաղեցնող Նիկոլ Փաշինեանը հանդէս եկաւ հերթական, արդէն անհեթեթ դարձող ինքնարդարացմամբ՝ նա պնդեց, որ շարունակում է զբաղեցնել վարչապետի պաշտօնը, որպէսզի «պաշտպանի ժողովրդի ազատ ընտրութիւնը եւ ընտրողների ձայները»։

Նախ, ընտրողները այդ ձայները տւել են երկու տարի առաջ, եւ նրանց զգալի մասը այսօր արդէն հիասթափւել է այդ ընտրութիւնից, այլապէս նոյն այդ ընտրողներն այսօր տասնեակ հազարներով դուրս կը գային փողոց՝ պաշտպանելու Նիկոլ Փաշինեանին։ Այն, որ դրա փոխարէն հազարներով փողոց են դուրս գալիս նրա հակառակորդները, ցոյց է տալիս, որ ուժերի իրական յարաբերակցութիւնը հասարակութեան մէջ փոխւել է, եւ դա արդէն անժխտելի իրողութիւն է։

Եթէ պրն. Փաշինեանը այդքան մտահոգ է ժողովրդի ձայնով, ապա պէտք է յիշի, որ խօսքը գնում անձամբ իր հրաժարականի մասին, ոչ թէ Ազգային ժողովի ցրման։ Մեր երկրի սահմանադրութեամբ, առաջնային մանդատ ունի հէնց Ազգային ժողովը, որը բոլոր դէպքերում եւս մէկ տարի կը շարունակի գործել, դրանով ներկայացնելով ընտրողներին։ Բացի այդ, եթէ ստեղծւում է Ազգային համաձայնութեան կառավարութիւն, նրա կազմի մէջ կարող եմ մտնել նաեւ նախորդ Կառավարութեան այն անդամները, որոնց գործունէութեան վերաբերեալ չկան հանրային վերապահումներ, դա եւս կարող է որոշակի շարունակականութիւն ապահովելու ձեւ լինել։

Եւ վերջապէս, հասարակութիւնը հնարաւորութիւն կունենայ մէկ տարի յետոյ գալ եւ ազատ ընտրութիւններով իր ձայնը տալ այն քաղաքական ուժերին, որոնք այդ ընթացքում կը կարողանան իրենց գործունէութեամբ շահել նրա տարբեր հատւածների համակրանքը։ Ոչ մի բան չի խանգարում այս Ազգային ժողովին բարեփոխել ընտրական օրէնսդրութիւնը, եւ ընտրութիւնները դարձնել առաւելագոյնս թափանցիկ եւ ժողովրդավարական։ Աւելին, Ազգային համաձայնութեան կառավարութեան ձեւաւորման ժամանակ էլ բոլոր նրան աջակցող ուժերը կարող են Յատուկ յուշագիր կնքել, որով ոչ միայն վերահաստատում են իրենց հաւատարմութիւնը՝ մէկ տարուց անցկացնել թափանցիկ եւ արդար ընտրութիւններ, այլեւ դրա որոշակի երաշխիքներ եւ կոնկրետ մեխանիզմներ են նախանշում՝ հետագայում դրանցից որեւէ կերպ չշեղւելու պայմանով։

Անձամբ ես խորհուրդ կը տայի պրն. Փաշինեանին՝ չձգձգել սեփական հրաժարականը, որն արդէն անխուսափելի է դարձել։ Այս հրաժարականի պահանջին միացել են ոչ միայն հիմնական ընդդիմադիր ուժերը, այլեւ երկրի նախագահը, երկու կաթողիկոսները, պրն. Փաշինեանի նախկին բազմաթիւ դաշնակիցներ, ներառեալ նաեւ Ազգային ժողովում ներկայացւած, արտերկրի ազդեցիկ հայկական բազմաթիւ կառոյցներ եւ անհատներ։

Այս պայմաններում, սեփական հրաժարականը ձգձգելու եւ երկիրը անիմաստ անորոշութեան մէջ պահելու փոխարէն, շատ աւելի պատասխանատու կը լինէր նոյն ընտրողների առաջ՝ բանակցութիւններ նախաձեռնել հիմնական քաղաքական ուժերի հետ, պայմանաւորւել նոր կառավարութեան գործունէութեան սկզբունքների եւ անհրաժեշտ երաշխիքների համակարգի մասին, եւ հիմա արժանապատիւ հեռանալ զբաղեցրած պաշտօնից։

Ես նաեւ խորհուրդ կը տայի «Իմ քայլը» խմբակցութեան պատգամաւորներին՝ գիտակցել, որ այս պայմաններում, ունենալով հեղինակազրկւած եւ որեւէ իրական ներքին եւ արտաքին աջակցութիւնից զրկւած առաջնորդ, իրենք այլեւս զրօ հնարաւորութիւն ունեն երկիրը ճգնաժամից դուրս բերելու, եւ ամէն անցնող օր աւելի է նեղացնելու իրենց իսկ հնարաւորութիւնների դաշտը։

Ամէն գնով սեփական «մունդիրի պատիւը» պաշտպանելու փոխարէն, շատ աւելի պատասխանատու է սեփական ընտրողների առաջ՝ իրական ելքեր գտնել ստեղծւած ճգնաժամից, բանակցել խելամիտ լուծումներ մնացած քաղաքական ուժերի հետ, եւ համատեղ ջանքերով փորձել յաղթահարել մեր երկրի առջեւ կանգնած աննախադէպ մարտահրաւէրները»:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։