Հա

Քաղաքական

10/01/2021 - 13:35

Տխրահռչակ նախադէպեր. Փաշինեանը ստորագրելու է ամէն տեսակի փաստաթուղթ

ՀՀ արդարադատութեան նախարար Ռուստամ Բադասեանը յունւարի 8-ին լրագրողների հետ զրոյցում, դիմելով նախարարութեան առջեւ բողոքի ակցիա իրականացնող քաղաքացիներին, յայտարարեց, որ նոյեմբերի 9-ին Նիկոլ Փաշինեանի ստորագրած եռակողմ յայտարարութիւնը մտադրութիւնների մասին յայտարարութիւն էր։

ՎԱՀԷ ՍԱՐԳՍԵԱՆ

 

ՀՀ արդարադատութեան նախարար Ռուստամ Բադասեանը յունւարի 8-ին լրագրողների հետ զրոյցում, դիմելով նախարարութեան առջեւ բողոքի ակցիա իրականացնող քաղաքացիներին, յայտարարեց, որ նոյեմբերի 9-ին Նիկոլ Փաշինեանի ստորագրած եռակողմ յայտարարութիւնը մտադրութիւնների մասին յայտարարութիւն էր։

«Մտադրութիւնների մասին յայտարարութիւնը» կարո՞ղ է համարւել «միջազգային պայմանագիր», թէ՞ ոչ։  Նախարարն այդպէս էլ չհստակեցրեց այս հարցը, ուստի լրացուցիչ պարզաբանման նպատակով գրաւոր հարցում ուղարկեցինք նախարարի անունով:

Ինչո՞վ է կարեւոր վերոնշեալ հարցադրումը:

Ստի ու կեղծիքի վրայ խարխսւած Փաշինեանի կառավարութեան՝ յատկապէս վերջին շրջանի վարքագիծը մեզ հիմք է տալիս կա՛մ չհաւատալու Ռուստամ Բադասեանին, կա՛մ ենթադրելու, որ Փաշինեանի կառավարութիւնը բառախաղերի միջոցով հերթական անգամ խաբում է հասարակութեանը:

Երկրորդ պարագայում կարող է տեղի ունենալ հետեւեալը: Եթէ, օրինակ, «մտադրութիւնների մասին յայտարարութիւնը» կարող է համարւել «միջազգային պայմանագիր», կամ դրան այդպիսի ուժ է տալիս Փաշինեանի կառավարութիւնը, ապա ամենեւին չի բացառւում, որ, յունւարի 11-ին ստորագրւելիք փաստաթուղթը եւս չանցնի Արդարադատութեան նախարարութիւնով, այդ մասին չիմանայ նախարար Բադասեանը՝ այնպէս, ինչպէս նոյեմբերի 9-ի եռակողմ յայտարարութիւնը, բայց այն Մոսկւայում ստորագրւի Փաշինեանի կողմից եւ համարւի միջազգային պայմանագիր:

Այն, որ «մտադրութիւնների մասին յայտարարութիւնը» Փաշինեանի ձեռքով կարող է ստանալ միջազգային պայմանագրի կշիռ՝ հաստատւում է «Իրաւական ուղի» ՀԿ համահիմնադիր, միջազգային իրաւունքի մասնագէտ Սիրանոյշ Սահակեանի մասնագիտական մեկնաբանութիւններում: Yerkir.am-ում հրապարակւած նրա մեկնաբանութեան համաձայն՝ հակառակ այն իրողութեանը, որ պայմանագիրն ունենում է առարկայ, իսկ յայտարարութիւնը՝ ոչ, նոյեմբերի 9-ին ստորագրւած եռակողմ յայտարարութեան դէպքում փաստն այն է, որ «մտադրութիւնների մասին յայտարարութիւնը» ունէր ե՛ւ առարկայ, ե՛ւ դրանք իրագործելու ժամկէտներ։ Աւելին, դա առաջացրեց հետեւանք՝ փաստացի տարածքներ յանձնւեցին Ադրբեջանին։

Աւելին, Փաշինեանը կարող է ամենեւին էլ չտանջւել եւ Մոսկւայում ստորագրել ոչ թէ «մտադրութիւնների մասին յայտարարութեան» տակ քողարկւած պայմանագիր, այլ՝ կամայականօրէն կնքել միջազգային պայմանագիր՝ անտեսելով եւ արհամարհելով ներպետական ընթացակարգերը: Մասնագէտները այստեղ եւս փաստում են, որ միջազգային իրաւունքը կարգաւորում է նման դէպքերը, եւ այստեղ, որպէս կանոն, նման անարխիստ, ոչ իրաւական պետութեան ներպետական ընթացակարգերի խախտումները հետագայում չեն կարող վկայակոչւել միջազգային պարտաւորութիւններ չկատարելու համար:

Եզրակացնենք. «մտադրութիւնների մասին յայտարարութիւնը» (նոյեմբերի 9-ի եռակողմ յայտարարութիւն) միջազգային պայմանագրի ուժով կիրառութեան մէջ դրած, Ալիեւի հետ «բանաւոր փոխըմբռնումով» Սիւնիքի կարեւորագոյն ռազմավարական դիրքերն ու բնակավայրերի հատւածները թշնամուն յանձնած Փաշինեանի՝ պարտւած եւ օրաւուր գահավիժող իշխանութիւնը, յանուն հայրենիքի դէմ գործած յանցանքների քողարկման, այլեւս ընդունակ է ամէն ինչի. նրա համար որեւէ տեսակի բարոյական, իրաւական կամ քաղաքական խոչընդոտ չի՛ կարող արգելք հանդիսանալ:

Հայրենիքը վաճառած, ցայտնոտի մէջ գտնւող, պատերազմում պարտւած եւ նսեմացւած Փաշինեանի համար գոյութիւն ունի մէկ գերխնդիր. եւս մի քանի շաբաթ կամ ամիս երկարացնել իր իշխանութեան կեանքը, եւ յանուն դրա նա պատրաստ է  ստորագրել իր դիմաց դրւած ցանկացած տեսակի եւ բովանդակութեան փաստաթղթի տակ:

Արդիւնքում՝ Մոսկւայում ստորագրւելիք փաստաթղթի ստեղծման գործում հայկական կողմի մասնակցութիւնը զրոյական է, եւ Փաշինեանը պարզապէս ստորագրելու է այն ամենի տակ, ինչ ցանկանան կամ պայմանաւորւեն Վլ. Պուտինն ու Ի. Ալիեւը: Աղօթենք, որ ծայրայեղ վատ կէտեր չձեւակերպեն նրանք:

 

Yerkir.am

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։