Հա

Քաղաքական

16/01/2021 - 11:45

Պէտք է լինի իշխանութիւն, որն ի վիճակի է խօսել միւս կողմի հետ, լուծումներ ապահովել

lragir.am-ի զրուցակիցն է Արցախի Հանրապետութեան ԱԺ Արտաքին յարաբերութիւնների մշտական եանձնաժողովի նախագահ, ՀՅԴ Արցախի Կենտրոնական կոմիտէի անդամ Վահրամ Բալայեանը:

«alikonline.ir» - lragir.am-ի զրուցակիցն է Արցախի Հանրապետութեան ԱԺ Արտաքին յարաբերութիւնների մշտական եանձնաժողովի նախագահ, ՀՅԴ Արցախի Կենտրոնական կոմիտէի անդամ Վահրամ Բալայեանը:

 

- Պարոն Բալայեան, երկու օր առաջ խախտւեց հրադադարը եւ մենք վիրաւոր ունենք: Ի՞նչ քայլեր պէտք է ձեռնարկի հայկական կողմը:

- Իհարկէ, այսօր բնակչութեանը ամենաշատը մտահոգող հարցը անվտանգութիւնն է, բայց միւս կողմից պէտք է հասկանալ, որ յետպատերազմայն ընթացքում ամէն բան հարթ լինել չի կարող: Այսինքն թշնամանքը գոյութիւն ունի եւ ժամանակ է պէտք, որպէսզի մթնոլորտի լիցքաթափում լինի: Դա, իհարկէ, չի նշանակում, որ այս ուղղութեամբ ձեռնարկումներ չպէտք է լինեն: Ամբողջ սահմանի երկայնքով մեր զինւած ուժերը պէտք է որոշակի վերահսկողութիւն սահմանեն: Բնականաբար ռուսական զորամիաւորման հետ պէտք է համագործակցութիւն լինի եւ կանխւեն նման դէպքերը:

 

- Արցախի ուղղութեամբ այս կրակոցներն ինչի՞ մասին են խօսում: Ռուս խաղաղապահներն ինչպէ՞ս են իրենց առջեւ դրւած խնդիրը լուծում: Գո՞հ էք, թէ դժգոհ:

- Ընդհանուր առմամբ պէտք է ասեմ, որ կրակի դադարեցման ռեժիմը վերահսկւում է: Ըստ էութեան, 1-2 դէպք է արձնագրւել, որոնցից մէկը դա էր, որ մեր ԶՈՒ ուղղութեամբ էին կրակել, եւս մի քանի դէպք է եղել, երբ խաղաղ բնակչութեան ուղղութեամբ են կրակել: Կարծում եմ՝ պայմանաւորւածութիւնները պէտք է այնքան յստակեցւեն, որ համապատասխան ռեժիմ սահմանւի, որ կրակի պարագայում միջոցառում իրականացւի: Տւեալ պարագայում դա պէտք է ռուսական կողմն անի, որովհետեւ անմիջական կապը թէ հայկական, թէ ադրբեջանական կողմերի հետ ռուսական զօրամիաւորման ղեկավարութեան կողմից է կատարւում:

Կարծում եմ ճիշտ չի հարցադրում անել գոհ կամ դժգոհ լինելու առումով: Ստեղծւել է նոր իրավիճակ։ Եթէ նախկինում կար սահման, մեր զօրքերը հսկում էին այդ սահմանը, եւ անվտանգութեան գործակիցը աւելի մեծ էր: Բայց հիմա այդ սահման հակացողութիւնը կարծես թէ խախտւած է: Առաջ ամբողջ սահմանը բաժանւած էր հակառակորդից, հիմա դա չկայ: Միւս կողմից, սահմանն էլ չի յստակեցւած: Կարծում եմ՝ այդ հարցերը ժամանակի ընթացքում պէտք է յստակեցւեն: Կարծում եմ, որ սահմանազատման գործընթացը բարձր մակարդակով պէտք է լինի երկու երկրների միջեւ՝ Ռուսաստանի անմիջական մասնակցութեամբ իրականացւի, որպէսզի յստակեցւի, թէ որ տարածքը որ երկրին է պատկանում, որ համապատասխանաբար տւեալ երկրի զինւած ուժերը կանգնեն սահմանների երկայնքով: Այդ հարցերը ժամանակի ընթացքում կը կարգաւորւեն:

 

- Ինչպէ՞ս էք գնահատում յունւարի 11-ին Մոսկւայում կայացած եռակողմ հանդիպումը, որտեղ հնարաւոր չեղաւ ռազմագերիների հարցում որեւէ լուծման յանգել:

- Անկեղծ ասած, դեռ այդ հանդիպման նախօրէին, երբ լրագրողը հարցրեց սպասելիքներից, ասացի, որ էական սպասելիք չունեմ, եւ այդպէս էլ եղաւ: Այդպէս էի կարծում, որովհետեւ պարտւած կողմի հետ այդպէս էին վերաբերւելու: Դրա համար պէտք է լինի իշխանութիւն, որն ի վիճակի է խօսել միւս կողմի հետ, լուծումներ ապահովել: Պէտք է հէնց այդ ճանապարհով գնալ: Ոչ մի երկիր, առաւել եւս քո հակառակորդը պարտւած կողմի հետ չի նստի ու լրջօրէն հարցեր քննարկի: Ինչ վերաբերում է տրանսպորտային կոմունիկացիաների բացմանը, ապա կարծում եմ՝ դրանից աւելի շատ հակառակորդ կողմը կը շահի, քան մենք: Տւեալ պարագայում նրանք Նախիջեւանի հետ կապի խնդիրն են փորձում լուծել: Դա իրենց մտահոգող հարցն է 20-րդ դարի սկզբից սկսած: Այդ բանակցութիւնների ընթացքում եւս մէկ անգամ ապացուցւեց, որ հայկական կողմը ի վիճակի չէ նստել ու հարցի մինչեւ վերջ լուծումն ապահովել:

 

Սիրանուշ Պապեան

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։