Ռազմական գործողութիւնների ժամանակ Դաւիթ Տօնոյեանի՝ ռազմական գործողութիւնների պլանաւորման եւ վարման գործընթացից դուրս մնալու որեւէ իրաւական հիմք չկար։ Այս մասին ֆէյսբուքեան իր էջում գրել է Razm.info մասնագիտացւած կայքի համակարգող Կարէն Վրթանէսեանը՝ անդրադառնալով պաշտպանութեան նախկին նախարար Դաւիթ Տօնոյեանի հարցազրոյցին:
«alikonline.ir» - Ռազմական գործողութիւնների ժամանակ Դաւիթ Տօնոյեանի՝ ռազմական գործողութիւնների պլանաւորման եւ վարման գործընթացից դուրս մնալու որեւէ իրաւական հիմք չկար։ Այս մասին ֆէյսբուքեան իր էջում գրել է Razm.info մասնագիտացւած կայքի համակարգող Կարէն Վրթանէսեանը՝ անդրադառնալով պաշտպանութեան նախկին նախարար Դաւիթ Տօնոյեանի հարցազրոյցին:
Գրառումը՝ ստորեւ.
«Այսօր (յունւարի 25-ին, Խմբ.) պաշտպանութեան նախկին նախարար Դաւիթ Տօնոյեանը յայտարարել է հարցազրոյցում.
«2015 թւականին ընդունւած նոր Սահմանադրութեամբ պատերազմի ժամանակ պաշտպանութեան նախարարը փաստացի դուրս է մնում ռազմական գործողութիւնների պլանաւորման եւ վարման գործընթացից, քանի որ այդ լիազօրութիւնները վերապահւում են Գերագոյն հրամանատարին եւ Զինւած ուժերի Գլխաւոր շտաբի պետին»։
Կարդում ենք ՀՀ Սահմանադրութեան 155-րդ յօդւածի 3րդ կէտում.
«Ոչ պատերազմական ժամանակ գլխաւոր շտաբի պետը ենթակայ է պաշտպանութեան նախարարին»:
Ոմանք կասեն. «Հա, բա ճիշտ է ասում, պատերազմ էր, չէ՞», ինչին կը պատասխանեմ, որ ռազմական դրութիւն մտցնելը ֆորմալ առումով ԴԵՌ չի նշանակում պատերազմ։ Պատերազմ պէտք է առանձին յայտարարւի, ինչը չի արւել։
Այն, որ պատերազմ յայտարարելը եւ ռազմական դրութիւն մտցնելը նոյն բանը չեն, կարող էք համոզւել կարդալով Սահմանադրութեան 119-րդ յօդւածի 1-ին կէտը.
«Հայաստանի Հանրապետութեան վրայ զինւած յարձակման, դրա անմիջական վտանգի առկայութեան կամ պատերազմ յայտարարւելու դէպքերում Կառավարութիւնը յայտարարում է ռազմական դրութիւն...»։
Այսինքն պատերազմ յայտարարելը եւ ռազմական դրութիւն մտցնելը յստակ 2 տարբեր երեւոյթ են։
Այսպիսով՝ սեպտեմբերի 27-ից առ այսօր, քանի որ ՀՀ-ն որեւէ այլ երկրի պատերազմ չի յայտարարել, ապա ԳՇ պետը, ինչպէս եւ մինչեւ սեպտեմբերի 27-ը, շարունակում էր ենթակայ մնալ ՀՀ պաշտպանութեան նախարարին։
Այնպէս որ ռազմական գործողութիւնների ժամանակ Դաւիթ Տօնոյեանի՝ ռազմական գործողութիւնների պլանաւորման եւ վարման գործընթացից դուրս մնալու որեւէ իրաւական հիմք չկար։
Չգիտեմ, հասկանալի՞ եմ գրել...»:
