Հա

Քաղաքական

17/02/2021 - 08:25

«Իսկանդերը պէտք էր կիրառել արդէն պատերազմի 4-5-րդ օրը, երբ Ադրբեջանը հսկայական քանակով կենդանի ուժի եւ զինտեխնիկայի կուտակումներ էր արել». Սերժ Սարգսեան

ՀՀ երրորդ նախագահ Սերժ Սարգսեանը հարցազրոյց է տւել «Արմնիւզ» հեռուստաընկերութեանը՝ անդրադառնալով ԼՂ հակամարտութեան կարգաւորման բանակցային գործընթացին, արցախեան վերջին պատերազմում ՀՀ դիւանագիտական եւ ռազմաքաղաքական ձախողումներին՝ կապիտուլեացիայի պատճառներին, հետեւանքներին, ինչպէս նաեւ ստեղծւած իրավիճակից ելքին ու ապագային միտւած ծրագրերին:

«alikonline.ir» - ՀՀ երրորդ նախագահ Սերժ Սարգսեանը հարցազրոյց է տւել «Արմնիւզ» հեռուստաընկերութեանը՝ անդրադառնալով ԼՂ հակամարտութեան կարգաւորման բանակցային գործընթացին, արցախեան վերջին պատերազմում ՀՀ դիւանագիտական եւ ռազմաքաղաքական ձախողումներին՝ կապիտուլեացիայի պատճառներին, հետեւանքներին, ինչպէս նաեւ ստեղծւած իրավիճակից ելքին ու ապագային միտւած ծրագրերին:

 

Պարո՛ն նախագահ Իսկանդերը յիշատակեցիք, դա այս պատերազմի ընթացքում ամենաշատ յիշատակւած, բայց այդպէս էլ թշնամու նկատմամբ չկիրառւած զինատեսակն է, ես հրաշալի յիշում եմ, որ 2016 թւականին, ե՛ւ այն ժամանակ, ե՛ւ 2020 թւականի օգոստոսին Ձեր ասուլիսում Դուք ասացիք, որ իմաստ չունէր ապրիլեան մարտերի ժամանակ կիրառէիք Իսկանդերը, քանի որ թնդանոթից արձակւած կրակոց է ճնճղուկներին: 2020 թւականի պատերազմը լայնամասշտաբ էր, բայց չկիրառւեցին մեր օպերատիւ մարտավարական հրթիռները եւ ոչ միայն դրանք. պարզւեց, որ մենք որեւէ ռազմական օդանաւակայան, խոշոր զօրամիաւորման շտաբ, հրամանատարական կէտ, նաւթագազային ենթակառուցւածք, կամուրջ չենք ոչնչացրել: Ընդ որում, ՀՀ նախագահը, որին, ի դէպ, Դուք էք հրաւիրել, եթէ ժամանակ լինի դրան էլ հակիրճ կանդրադառնանք, մի քանի անգամ տարբեր միջազգային լրատւամիջոցների առջեւ խոստում տւեց, երաշխիք տւեց, որ Հայաստանը չի թիրախաւորելու թշնամու տարածքում գտնւող նաւթագազային ենթակառուցւածքները, ըստ Ձեզ՝ ինչո՞ւ:

- Նախ պէտք է ասեմ, որ այնքան էլ համաձայն չեմ, որ Իսկանդերը չի կիրառւել, մամուլում եղաւ, եւ ես ունեմ հաւաստի տեղեկութիւններ, որ Իսկանդերը կիրառւել է, կիրառւել է պատերազմի վերջին շրջանում, իսկ աւելի կոնկրետ` Շուշիի ուղղութեամբ:

 

Ես դրա համար ասացի՝ թշնամու պետութեան տարածքի ուղղութեամբ:

- Այո, տարածքը, ուրիշ բան: Իսկ թէ ինչո՞ւ չի կիրառւել, ես հարիւր տոկոսով չեմ կարող ասել, բայց ենթադրում եմ, որ չի կիրառւել` վախենալով պատասխան հարւածից: Այսինքն, Հայաստանի որ տարածքից կրակէր, միգուցէ այդ տարածքին էլ հակահարւած կը լինէր:

 

Նմանատիպ հեռահարութեամբ մեգահրթիռո՞վ:

- Մէկ այլ հրթիռով, ոչ նմանատիպ հեռահարութեամբ, ոչ նմանատիպ ճշգրտութեամբ, բայց գիտես, երբ պատերազմի ժամանակ ունենում ես դու շատ մտավախութիւններ, վերջը հասնում ես այս օրին: Իսկ Իսկանդերը պէտք էր կիրառել արդէն պատերազմի չորրորդ-հինգերորդ օրը, երբ Ադրբեջանը հսկայական քանակով կենդանի ուժի եւ զինտեխնիկայի կուտակումներ էր արել Հորադիզում եւ այլ հատւածներում, Իսկանդերը հէնց դրա համար է: Բայց միւս թեզն էլ, կարծում եմ, որ այդքան էլ ճիշտ չէ, երբ ասում են՝ մեր այլ միջոցներ չեն կիրառջել Ադրբեջանի տարածքի նկատմամբ, յիշում էք, որ պարծենկոտ մէկը ասում էր, որ ինքն է հրաման տւել յօդս ցնդեցնել Կիրովաբադի օդանաւակայանը:

 

Պարզւեց՝ սուտ է:

- Բայց իրականութիւն է, որ Կիրովաբադի վրայ կրակւել է:

 

Քաղաքի բնակելի թաղամասի:

- Ինչը մեծագոյն յիմարութիւն է, ես չեմ հասկանում այդ մարդկանց գործողութիւնները:

 

Միջազգային հանրութիւնը մեզ սկսեց դատապարտել դրանից յետոյ:

- Իհարկէ, պէտք է դատապարտի, ոչ միայն միջազգային հանրութիւնը սկսեց դատապարտել, այլ դրանից յետոյ սկսեց անխնայ թիրախաւորել Ստեփանակերտն էլ, Մարտունին էլ: Ես չեմ ասում, որ մինչ այդ Ստեփանակերտի վրայ չէին կրակել, բայց այդ կրակը ուղղւած էր երկու թիրախների վրայ` մէկը Պաշտպանութեան բանակի շտաբն էր եւ երկրորդ` էլեկտրակայանը: Սա է, իհարկէ պէտք էր կիրառել, բա ինչի՞ համար էինք ձեռք բերել: Եւ ընդհանրապէս, այդ հաւաստիացումները՝ միջազգային հանրութեան, ո՞ւմ էին պէտք, ես չեմ ասում, որ առաջին թիրախը պէտք է լինէր գազատարները, նաւթատարը եւ այլն, բա այդ Իսկանդերը ինչի՞ համար ենք վերցրել, ինչի՞ համար ենք բերել, որ անհրաժեշտ պահին մենք չենք կիրառում:

 

Պայմանաւորւածութիւն է եղել չկրակելու, կարծո՞ւմ էք:

- Չեմ կարծում, որ պայմանաւորւածութիւն է եղել:

 

Վախեցել են գործարկել դա:

- Եթէ յիշում էք, որ պատերազմի հինգերորդ-վեցերորդ օրը էլի ինչ-որ այսպէս ասած «ուտկաներ» էին պտտացնում, իբր Իսկանդերը մերը չէ, կառավարման համակարգը ուրիշ տեղ է: Դա տգիտութիւն է, Իսկանդերը մերն է, մենք միակն ենք, ում մեր դաշնակիցը տրամադրել է այդպիսի զէնք եւ չկիրառել դա, ես չեմ հասկանում: Այնքան հարցեր կան, որ ինձ համար ուղղակի մի կողմից տարօրինակ են, միւս կողմից՝ չգիտեմ, այլ մտքերի են տանում:

 

Հայկական Շուշին խոցել մեր Իսկանդերով, պարո՛ն նախագահ, սա կարո՞ղ է տեղաւորւել մեր բանականութեան մէջ, եթէ անգամ քաղաքը թողնւած է, թէեւ մենք յստակ տւեալ չունէինք՝ ո՞ր օրւայ եւ պահի դրութեամբ ենք մենք լքել քաղաքը:

- Արդէն այդ մասին բազմաթիւ անգամ խօսւել է, կապիտուլեանտը ամսի 9-ին է գրել, որ Շուշիի համար մարտեր են ընթանում, իսկ արդէն ամսի հինգի գիշերը Շուշին արդէն ադրբեջանցիների վերահսկողութեան տակ էր: Երբ դրանից յետոյ գրում են, որ համառ մարտեր են ընթանում Շուշիի համար եւ այլն, դա ուրիշ բան էր նշանակում, որ մերոնք փորձում էին յետ գրաւել Շուշին, դա էլ է ինձ համար տարօրինակ, քանի որ յետ գրաւելը տասը անգամ աւելի դժւար է, քան պաշտպանելը: Ինչո՞ւ չպաշտպանեցինք եւ յետոյ ինչո՞ւ այդքան զոհեր տւեցինք, եւ, ընդ որում, այդ փորձերի ժամանակ, այսպէս ասած՝ համառ մարտերի ժամանակ մենք ունեցել ենք հարիւրաւոր զոհեր եւ շատ դէպքերում անհասկանալի:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։