Հա

Քաղաքական

23/04/2021 - 15:00

«Այս իշխանութիւնները մեր զգօնութիւնը թուլացնելու նպատակով ներկայացնում են լաւ փաթեթաւորմամբ Թուրքիա, որն իրականում գոյութիւն չունի»․ Ռուբէն Մելքոնեան

Թուրքիայի հետ բարեկամութեան, ջերմ յարաբերութիւններ հաստատելու մասին պետական տարբեր պաշտօնեաների կողմից շրջանառւող թեզերը նպատակ ունեն թուլացնելու մեր հասարակութեան դիմադրութիւնը։ Այս մասին «Հայաստանը եւ Թուրքիան Հարաւային Կովկասում. իրողութիւններ եւ ռիսկեր» խորագրով խորհրդաժողովից յետոյ լրագրողների հետ ճեպազրոյցի ժամանակ ասաց թուրքագէտ, ԵՊՀ Արեւելագիտութեան ֆակուլտետի դեկան Ռուբէն Մելքոնեանը։

«alikonline.ir» - Թուրքիայի հետ բարեկամութեան, ջերմ յարաբերութիւններ հաստատելու մասին պետական տարբեր պաշտօնեաների կողմից շրջանառւող թեզերը նպատակ ունեն թուլացնելու մեր հասարակութեան դիմադրութիւնը։ Այս մասին «Հայաստանը եւ Թուրքիան Հարաւային Կովկասում. իրողութիւններ եւ ռիսկեր» խորագրով խորհրդաժողովից յետոյ լրագրողների հետ ճեպազրոյցի ժամանակ ասաց թուրքագէտ, ԵՊՀ Արեւելագիտութեան ֆակուլտետի դեկան Ռուբէն Մելքոնեանը։ Գրում է Tert.am-ը:

Անդրադառնալով «ֆուտբոլային դիւանագիտութեան» համատեքստում Հայաստան-Թուրքիա յարաբերութիւններին՝ Մելքոնեանը նշեց, որ «Ֆուտբոլային դիւանագիտութեան» ժամանակ Հայաստանն էական զիջումներ Հայոց Ցեղասպանութեան եւ Արցախի ճանաչման հարցում չի արել։

««Ֆուտբոլային դիւանագիտութեան» տապալումը ապացոյցն էր այն բանի, որ Թուրքիան պատրաստ չէ կոնստրուկտիւ յարաբերութիւններ հաստատել իր հարեւանի հետ եւ չի պատրաստւում հրաժարւել Հայաստանի հանդէպ թշնամական քաղաքականութիւնից։ Այն յայտարարութիւնները, որոնք հիմա հնչում են իշխանական տարբեր ներկայացուցիչների կողմից, բառի բուն իմաստով վտանգաւոր են։ Այդ մարդիկ վտանգ են ներկայացնում մեր հասարակութեան համար, որովհետեւ թուլացնում են մեր զգօնութիւնը եւ ներկայացնում են լաւ փաթեթաւորմամբ Թուրքիա, որն իրականում գոյութիւն չունի։ Իրականում կայ Թուրքիա, որը շարունակում է Հայաստանի հանդէպ թշնամական քաղաքականութիւն վարել»,- ասաց նա։

Ռուբէն Մելքոնեանն ընդգծեց, որ ՀՀ իշխանութիւնների այսպիսի կեցւածքը մի բացատրութիւն ունի, այն է՝ միտումնաւոր, ուղղորդւած թուլացնել մեր դիմադրողականութիւնը եւ զգօնութիւնը։

Հարցին, թէ աշխարհաքաղաքական ինչ իրողութիւնների պարագայում է հնարաւոր հաւասարը հաւասարի հետ երկխօսել Թուրքիայի հետ, թուրքագէտը նշեց, որ ի պատիւ մեր պետականութեան, մենք մեր անկախութիւնից ի վեր առաջ ենք քաշել մեզ համար կարմիր գծեր, որոնցից մինչեւ 2018 թ.-ը զիջում չի արւել։

«Հայաստանը միշտ առաջ է քաշել հետեւեալ կարգախօսը՝ Թուրքիայի հետ պատրաստ է յարաբերութիւններ հաստատել առանց նախապայմանների։ Այսինքն՝ պատմական խնդիրները, հայութեանը եւ Հայաստանին Թուրքիայի կողմից հասցւած վնասները երբեք հնարաւոր չէ մոռանալ եւ դրանց հաշւին յարաբերութիւններ հաստատելը անընդունելի է։ Թուրքական տրամաբանութիւնը հետեւեալն է՝ եթէ ցանկանում էք բացել սահմանները եւ էժան ապրանքներ ներկրել, ապա մոռացէք Ցեղասպանութեան հարցը, մոռացէք ձեր պատմական յիշողութիւնը, մոռացէք ինքներդ ձեզ»,- ասաց նա։

Ամփոփելով խօսքը՝ Ռուբէն Մելքոնեանը նշեց, որ այդ նախապայմանները կեանքի կոչելու համատեքստում Թուրքական կողմի համար ՀՀ ներկայ իշխանութիւնները շատ ձեռնտու են եւ դիմադրողականութեան բացակայութեան պայմաններում ամենայարմար պահն է Հայաստանին ստիպել, որպէսզի ընդունի այդ նախապայամանները։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։