Հա

Քաղաքական

09/05/2021 - 10:10

Մայիսի 9-ի դաժան սիմւոլիզմը

Պատմութիւնը դաժան է նաեւ խորհրդանիշներով, որոնք, որպէս կանոն, լինում են ոչ պատահական։ Ուղիղ երեք տարի առաջ այս օրը՝ մայիսի 9-ին, պսեւդոզինւորական շապիկը վարչապետի փողկապով փոխարինած Նիկոլ Փաշինեանը Ստեփանակերտում յայտարարեց, որ Արցախը պէտք է վերադառնայ բանակցային գործընթաց, որ առանց Արցախի մասնակցութեան՝ բանակցութիւններ չեն կարող լինել։

ՅԱՐՈՒԹԻՒՆ ԱՒԵՏԻՍԵԱՆ

 

Պատմութիւնը դաժան է նաեւ խորհրդանիշներով, որոնք, որպէս կանոն, լինում են ոչ պատահական։ Ուղիղ երեք տարի առաջ այս օրը՝ մայիսի 9-ին, պսեւդոզինւորական շապիկը վարչապետի փողկապով փոխարինած Նիկոլ Փաշինեանը Ստեփանակերտում յայտարարեց, որ Արցախը պէտք է վերադառնայ բանակցային գործընթաց, որ առանց Արցախի մասնակցութեան՝ բանակցութիւններ չեն կարող լինել։

Երեք տարի անց, սակայն, ոչ թէ Արցախը վերադարձաւ բանակցային գործընթաց, այլ Ադրբեջանը վերադարձաւ Շուշի։

Ողբերգական այս խորհրդանշականութեան մէջ թաքնւած են տասնեակ, հարիւրաւոր շերտեր, անցած երեք տարիներին տեղի ունեցած իրադարձութիւններ, որոնց վերջնարդիւնքը դարձաւ արցախեան վերջին պատերազմը․ Նիկոլ Փաշինեանը շարունակեց վայելել զինւորական կեղծ շապիկին փոխարինած վարչապետի անճաշակ փողկապը, իսկ Հայաստանի ու Արցախի 5000 քաղաքացիներ զոհւեցին ամենաիսկական զինւորական համազգեստով։

Ոչ միայն Արցախը չվերադարձաւ բանակցային գործընթաց, այլ ճիշտ այդքան երիտասարդներ չվերադարձան տուն, իսկ Ալիեւը յայտնւեց Շուշիում։

Նիկոլ Փաշինեանը, այսինքն, ամէն դէպքում կատարեց վերադարձի իր խոստումը, վերադարձողը, սակայն, Արցախի փոխարէն՝ եղաւ Ադրբեջանը։

Ուղիղ մէկ տարի առաջ այս օրերին Նիկոլ Փաշինեանն Արցախի սեփական դրածոյի հետ պարում էր Շուշիում։ Երէկ Ալիեւը Շուշին յայտարարեց Ադրբեջանի մշակութային մայրաքաղաք։ Յայտարարեց Շուշիի ազատագրման տօնի նախօրէին։

Աւելի քան քառորդ դար այս օրը համայն հայութիւնը տօնում էր՝ որպէս համազգային յաղթանակների ու վերելքի խորհրդանիշ՝ տեղեակ չլինելով, որ Շուշին ոչ թէ մեր յաղթանակների անկիւնաքարն է, այլ դժբախտ ու դժգոյն քաղաք։

Այս եւ անցած երեք տարիներին տեղի ունեցած շատ իրադարձութիւններ ու արտաբերւած շատ զառանցանքներ ունեն գուցէ ոչ միայն խորհրդանշական իմաստ, այլ հնարաւոր է՝ նաև դաւադրական կապ։ Դրանց արդիւնքում Հայաստանի նորագոյն պատմութեան մէջ առաջին անգամ հայ ժողովուրդը մայիսի 9-ը նշելու է ոչ թէ կամ ոչ միայն՝ յաղթանակածի հպարտութեամբ, այլ գլխիկոր՝ ապաշնորհ կամ դաւադիր պարտութեան ամօթով։

Նիկոլ Փաշինեանը կարողացաւ յաղթանակը փոխարինել պարտութեամբ, հպարտութիւնը՝ ստորացմամբ, իսկ այսօր յայտ է ներկայացնում այդ ամէնը, մեծ իմաստով՝ Արցախը սեփական իշխանութեան հետ փոխարինելու համար։

Նա հասարակութեանն այսօր էլ առաջարկում է վստահել իր իշխանութեանը, իր թիմին, որն ապահովել է Ադրբեջանի վերադարձն Արցախ, Շուշիի հռչակումը Ադրբեջանի մշակութային մայրաքաղաք։

Այս առաջարկը նոյնպէս սեւ սիմւոլիզմ է պարունակում ու որեւէ ձեւով իրագործւելու դէպքում խորհրդանշելու է մայիսի 9-ը եռատօնից եռասգի վերածելու սեփական քաղաքականութեան լեգիտիմացումը հայ հասարակութեան կողմից։

Պատմութիւնը դաժան է նաեւ խորհրդանիշներով։

 

168.am

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։