Հա

Քաղաքական

10/05/2021 - 13:05

«Քոչարեանի դաշինքի մարտավարութեան հարցում պէտք է կայացւի կարեւոր որոշում. համախմբել հանրային տրամադրութիւնները եւ յաղթել ընտրութիւններից 10 օր առաջ». Վահէ Յովհաննիսեան

Tert.am-ը հրապարակում է «Այլընտրանքային նախագծեր» խմբի անդամ Վահէ Յովհաննիսեանի «Քոչարեան. Առաքելութիւն 911» վերտառութեամբ յօդւածը:

«alikonline.ir» - Tert.am-ը հրապարակում է «Այլընտրանքային նախագծեր» խմբի անդամ Վահէ Յովհաննիսեանի «Քոչարեան. Առաքելութիւն 911» վերտառութեամբ յօդւածը:

Երէկւայ՝ ակնյայտօրէն յաջող մեկնարկից յետոյ յաջողութիւնը զարգացնելու համար պէտք է արւեն կարեւոր հետեւութիւններ։

Քոչարեանի դաշինքի մարտավարութեան հարցում պէտք է կայացւի կարեւոր որոշում. յաղթել է պէտք մինչեւ ընտրութիւնների օրը։ Հանրային կոնսոլիդացիան, դրա աճի տեմպը պէտք է կառուցւեն այդ տրամաբանութեան մէջ։ Փաշինեանն ամէն ինչի ունակ է, նա ամէն քայլի գնալու է՝ իշխանութիւնը հնարաւորինս ձգելու համար։ Սա անպայման պէտք է նկատի ունենալ։ Իմ խորհուրդը դաշինքի շտաբին՝ խնդիր դնել՝ հանրային գիտակցութեան եւ պետական համակարգի գիտակցութեան մէջ յաղթանակը ամրագրել յունիսի 20-ից շատ աւելի վաղ։

Ինչպէս դա անել.

Շատ կարեւոր է՝ ճիշտ գնահատել հանրային տրամադրութիւնները եւ հանրութեան ակնկալիքը Քոչարեանից։ Քոչարեանին յաջողւել է գտնել ճշգրիտ ձեւակերպում՝ «Արժանապատիւ խաղաղութիւնը», որը դարձել է նրա այցեքարտը եւ մեծ թափով մտնում է բոլորի տները։

Ինչո՞ւ այդպէս ստացւեց. որովհետեւ այն ճշգրիտ համընկաւ հանրային սպասումներին։ Եւ նոյն ճշգրտութեամբ պէտք է ինքնաընկալւել եւ ներկայանալ ժողովրդին, պետական համակարգին, սփիւռքին, բոլորին։ Սա Արտակարգ իրավիճակի դաշինքն է։ Քոչարեանն արտակարգ իրավիճակի թեկնածուն է։

Քոչարեանից այսօր մարդիկ ակնկալում են խաղաղութիւն, կայունութիւն, արժանապատւութիւն։ Քոչարեանը գալիս է հէնց այդ առաջարկներով, քանի որ գիտէ խաղաղութեան ու կայունութեան արժէքը։ Ուրեմն՝ պէտք է առաւելագոյնս ներդաշնակ ու օրգանիկ լինել օրւայ հանրային պահանջին ու սեփական գաղափարներին։

Ուրիշ կոստիւմներ պէտք չէ հագցնել Քոչարեանին։

Քոչարեանը եւ դաշինքը որեւէ պարագայում չպէտք է մտնեն «հանդարտ քարոզարշաւի» տրամաբանութիւն։ Հիմա հանդարտ ընտրութիւնների ժամանակ չէ։ Ներկայացւելիք ծրագիրը պէտք է լինի Արտակարգ իրավիճակի ծրագիր։

Փաշինեանն ամէն կերպ ձգտելու է այս պրոցեսը վերածել ընտրութեան, իսկ իրականում այստեղ ընտրութեան խնդիր չէ, սա փրկութեան պրոցես է,  որտեղ Փաշինեանն անելիք չունի։

Երկիրն այն վիճակում չէ, որ մենք մտնենք ծրագրային մանր, անկարեւոր դետալների մէջ։ Երկիրը մտել է ծանր ճգնաժամային փուլ, եւ մեզ պէտք է լուրջ ու հրատապ հակաճգնաժամային ծրագիր։

Քոչարեանը, որպէս հակաճգնաժամային մենեջեր, կարող է ու պէտք է ներկայացնի հէնց այդպիսի մի ծրագիր՝ հետեւեալ պարզ տրամաբանութեամբ.

1. Արտակարգ իրավիճակի դաշինք

2. Արտակարգ իրավիճակի լիդեր

3. Արտակարգ իրավիճակի թիմ

4. Արտակարգ իրավիճակի ծրագիր, քայլեր։

Ինչ-ինչ պատճառներով Քոչարեանին չյաջողւեց կոնսոլիդացնել.

Բոլոր էլիտաներին, ինչն, անշուշտ, դժւարացնում է գործը, իսկ դրա միակ փոխհատուցումը նոր մարդն է՝ ամէն յաջորդ միտինգին եկող նոր մարդը, ելոյթները լսող ու հաւանող նոր մարդը, նրան հաւատացող նոր մարդը։ Իսկ նոր մարդուն հրապարակ բերելու բանաձեւը՝ այդ մարդուն պարզ ասել, որ սա 911-ի ընտրութիւն է։ Այսօրւայ Քոչարեանը 911-ն է, որից կան շատ կոնկրետ սպասումներ՝ կայունացնել վիճակը, փակել թուրքի մուտքը մեր երկիր, կասեցնել պետութեան կազմաքանդումը, ապահովել արժանապատիւ խաղաղութիւն, դնել տնտեսական եւ պետական վերելքի հիմքերը։

Ի դէպ, հէնց այս սպասումներով է բացատրւում այն լատենտ մեծ վարկանիշը, որն ունի Քոչարեանը։ Բայց որպէսզի լատենտ, իսկապէս զգալի վարկանիշը վերածւի «կողմ» քւէաթերթիկի, պէտք է հանրութեան հետ խօսել պարզ, առանց աւելորդ սեթեւեթանքի, ներկայացնել իրական օրակարգը։ Հանդարտ ընտրութիւնների եւ քարոզարշաւի համար այսօր չկայ ո´չ ժամանակ, ո´չ որեւէ նախադրեալ։ Ընտրարշաւի օրերը Հայաստանի անվտանգութեան բարձիկն են. այս օրերի ընթացքում պէտք է  առաւելագոյնս համախմբել հանրային տրամադրութիւնները եւ հաղթանակ արձանագրել ընտրութիւններից 10 օր առաջ։

 

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։